काठमाडौं– प्रधानमन्त्री पुष्पकमल दाहाल ‘प्रचण्ड’ले अहिलेको राजनीतिक उपलब्धि र जनताको अधिकार ठूलै संघर्षबाट प्राप्त भएको बताएका छन्।
आदिवासी जनजाति आयोगले शनिबार काठमाडौंको भृकुटीमण्डपमा आयोजना गरेको वार्षिकोत्सव तथा आदिवासी जनजाति अध्ययन पुस्तकको लोकार्पण कार्यक्रममा बोल्दै प्रधानमन्त्रीले यस्तो बताएका हुन्।
कार्यक्रममा प्रधानमन्त्रीले भने, ‘हामीले संविधानसभाबाट नयाँ संविधान बनाउने क्रममा विभिन्न संवैधानिक आयोगहरुका बारेमा गम्भीर रुपमा छलफल गरेका थियौं। गम्भीर छलफलपछि हामी आदिवासी, महिला, दलित, मुस्लिम लगायतका आयोग बनाउने निष्कर्षमा पुगेका हौं। यो सानो संघर्ष र बलिदानीबाट प्राप्त भएको होइन।’
उनले नेपाल बहुजातीय, बहुभाषिक, बहुसांस्कृतिक मुलूक भएको भन्दै सबै वर्ग, जाति र समुदायलाई समान अवसर र प्रतिनिधित्व गराएर मात्र आन्तरिक राष्ट्रियता बलियो बनाउन सकिने बताए।
उनले भने, ‘राज्यका सबै अंगमा समावेशी प्रतिनिधित्व भएको छ। यद्यपि, यो पूर्ण छैन। तर, यो निकै महत्वपूर्ण कुरा हो। यसलाई अझै समावेशी र पूर्ण समानुपातिक बनाउने छलफल चलि नै रहेको छ। त्यसका लागि हाम्रो प्रयास जारी रहनेछ।’
उनले महिला राष्ट्रपति, महिला प्रधानन्यायाधीश, महिला सभामुख हुनुमा आफूलाई गर्वको महशुस भइरहेको बताए। उनले आफूहरुकै संघर्ष र बलिदानका कारण यो अधिकार सम्भव भएको दाबी गरे।
‘यो अधिकार हाम्रै संघर्षको परिणाम हो। एकीकृत र केन्द्रिकृत राज्यले अपमान र विभेदमा पारिएका समुदायको पक्षमा लड्दै आएको छु। भोलि पनि लड्नेछु। कुन पार्टीबाट को आए भन्ने कुरा मेरा लागि खास अर्थ राख्दैन। जुन पार्टीबाट आए पनि हाम्रो मुद्दाका कारण आउनुभएको छ, हाम्रो आन्दोलनका कारण आउनुभएको छ’, उनले भने।
उनले समाज रुपान्तरणका लागि संघर्ष र त्याग गरेका वर्गलाई सम्मान गर्न चुकेको भन्दै आन्दोलनलाई सम्मान गर्न नसके प्राप्त उपलब्धि खोसिने खतरा रहेको दाबी गरेका छन्।
उनले भने, ‘सिंगो देश नै हामीले गरेको आन्दोलन र मुद्दाको वरिपरि नै छ । हाम्रो आन्दोलनको विजय भएको छ। तर, एउटा प्रश्न त आउँछ नै। एउटा नेतृत्वले समाजको रुपान्तरणका लागि जे जस्तो संघर्ष र त्याग ग¥यो, त्यसलाई सम्मान गर्न हामी चुकेका त छैनौं? हाम्रो आन्दोलनबिना यी मुद्दा सम्वोधन हुन सम्भव थिएन । तर, यसको उचित सम्मान गर्न, नेतृत्व स्थापित गर्न हामी चुकेका छौँ । त्यसलाई सम्मान गर्न सकिएन भने प्राप्त उपलब्धि पनि खोसिने खतरा रहन्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
