काठमाडौंका मेयर शाहविरुद्ध प्रदर्शन

राजनीति

नेपाल लाइभ आइतबार, माघ १५, २०७९ १७:२२

काठमाडौं– काठमाडौं महानगरपालिकाका मेयर बालेन्द्र शाहविरुद्ध प्रदर्शन गरिएको छ। मेयर शाहले गैरकानुनी ढंगले महानगरपालिका भित्र डोजर आतंक फैलाउने काम गरेको भन्दै उपत्यकाव्यापी सडक विस्तार पीडित संघर्ष समिति, काठमाडौंको आह्वानमा आइतबार दिउँसो माइतीघर मण्डलामा विरोध प्रदर्शन गरिएको हो।

प्रदर्शनका क्रममा उनीहरुले जनप्रतिनिधि भएर जनतालाई दुःख दिने काम नगर्न मेयर शाहलाई चेतावनीसमेत दिएका छन्। मेयर शाहले नागरिकको सम्पत्तिको अधिकारमाथिसमेत हनन् हुनेगरी डोजर आतंक फैलाउने काम गरेकाले त्यसो हुन नदिनका लागि खबरदारी गर्न आफूहरु प्रदर्शनमा आउनु परेको नागरिक अगुवा सुमन सायमीले बताए।

उनले जनताको प्रतिनिधि भएर मेयर शाहले जनताले दुःख दिने काम गरिरहे सैह्य नहुने चेतावनीसमेत दिए। प्रदर्शनकारीहरुले गैरकानुनी ढंगले संविधानले व्यवस्था गरेको भूमिको अधिकार, व्यक्तिगत सम्पत्तिको अधिकार हनन् गरेर मेयर शाहले ज्यादति गरेको भन्दै आक्रोश व्यक्त गरेका छन्।

उनीहरुले बिनासूचना, विनाप्रमाण सडक विस्तारको नाममा गैरकानुनी ढंगले सूचना समेत नदिई व्यक्तिगत सम्पत्तिमाथि डोजर चलाउने काम तत्काल बन्द गर्न पनि काठमाडौं महानगरपालिकालाई सचेत गराएका छन्।

त्यस अवसरमा प्रदर्शनकारीहरुले ‘आदिवासीको भूमिको अधिकार सुनिश्चित गर, संविधानले सुनिश्चित गरेको सम्पत्तिको अधिकार सुनिश्चित गर, डोजर आतंक बन्द गर, महानगरको ज्यादति बन्द गर’ लगायतका नाराबाजी गरेका थिए।

काठमाडौं महानगरपालिकाले गैरकानुनी ढंगले व्यक्तिको सम्पत्तिमाथि समेत डोजर चलाउने काम गरेपछि स्थानीयले त्यसको विरोधमा प्रदर्शन गर्दै आएका छन्। अब पनि आफूहरुलाई थप पीडा दिने काम गरे सैह्य नहुने प्रदर्शनकारीहरुको चेतावनी छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

काठमाडौं महानगरका ४९७ पसल अनुगमन गर्दा २० वटामात्रै मापदण्ड अनुसारका

लगानी जुटेसँगै मनाङ मर्स्याङ्दी जलविद्युत् आयोजना निर्माण सुरु

केन्द्रीय बैङ्कको अध्ययनः गण्डकीमा कृषि भूमि घट्यो