काठमाडौं- चुनावी अभियानका क्रममा गत कात्तिक ३० गते माओवादी केन्द्रका अध्यक्ष तथा वर्तमान प्रधानमन्त्री पुष्पकमल दाहाल ‘प्रचण्ड’ले भोजपुरको तिवारी भञ्याङमा आयोजित चुनावी सभालाई सम्बोधन गरेका थिए। त्यसक्रममा उनले भने- 'मैले सुदनजीलाई पुरानै ऋण तिर्नुछ। पहिले पनि मन्त्री बनाउन खोजेकै हो तर सकिएन। अब रोजेकै मन्त्रालय दिन्छु। तपाईंहरु जिताएर पठाउनुस्।'
प्रचण्डको आग्रहलाई भोजपुरवासीले स्वीकार गरे। उनले २८ हजार ५९१ मत ल्याउँदै प्रतिनिधि सभाको यात्रा सुनिश्चित गरे। उनले एमालेका उम्मेदवार शेरधन राईलाई पराजित गरेका थिए। राईले भने २६ हजार २०२ मत मात्रै पाए। किराती र राईबीचको यो तेस्रो प्रतिस्पर्धा थियो। यसअघि एकपटक किराती र एकपटक राईले जितेका थिए।
त्यसो त, त्यसअघि पनि प्रचण्डले उनलाई राष्ट्रपति, प्रधानमन्त्री वा मन्त्री बन्न सक्ने बताएका थिए। भदौ २८ मा किरातीद्वारा लिखित पुस्तक ‘पलपलको मृत्यु’को विमोचन कार्यक्रममा बोल्दै प्रचण्डले भनेका थिए, ‘राजनीतिमा मन्त्री या राष्ट्रपति अब सुदनका निम्ति ठूलो कुरा रहेन। माननीय हुनुहुन्छ, मन्त्री त भई नै हाल्नुहुन्छ। हुनसक्छ, राष्ट्रपति पनि हुने नजिकै छ।’
प्रचण्डले किरातीलाई लिएर गरेको सार्वजनिक वाचा पूरा भएको छ। अब उनी संस्कृति, पर्यटन तथा नागरिक उड्डयन मन्त्री बनेका छन्। प्रचण्ड प्रधानमन्त्री भएको २३औं दिनमा मंगलबार गरिएको मन्त्रिपरिषद् विस्तारमा उनले सो मन्त्रालयको जिम्मेवारी पाएका छन्। तेस्रो पटक सांसद भएका भए पनि मन्त्रीका रुपमा उनको पहिलो अनुभव हो।
४३ वर्षीय किराती नेकपा माओवादी केन्द्रका केन्द्रीय सदस्य हुन्। विद्यार्थी राजनीतिबाट अघि बढेका उनी तत्कालीन माले र खम्बुवान राष्ट्रिय मोर्चासँग आबद्ध भएर पार्टी राजनीतिमा प्रवेश गरेका हुन्। २०६२ मा उनी किराती राष्ट्रिय मोर्चाको केन्द्रीय अध्यक्ष समेत भएका थिए। उनी माओवादीको भोजपुर जिल्ला अध्यक्ष पनि भएका थिए।
मन्त्री हुने टुंगो लागेपछि किरातीलाई आफ्नो पिताले सम्झाएका छन्- ‘हाम्रो वंशमा वडा अध्यक्षसम्म कोही भएनौँ, राम्रो गर्नु।’
पितासँगको संवादबारे मंगलबार बिहान उनले फेसबुकमा लेखेका छन्, ‘पाउनु ठूलो कुरा होइन, काम गर्नु ठूलो कुरा हो। म मेहनत गर्छु।’
‘ठमेलदेखि थाइल्यान्डसम्म’ जोडिने र ’दोहोरीदेखि डान्सबारसम्म’को संरक्षणको जिम्मेवारी रहने भनिएको मन्त्रालयको नेतृत्व लिन अघि सरेका किरातीलाई सफल हुने चुनौती छ, त्यो पनि मन्त्रीको रुपमा पहिलो कार्यकालमै। माओवादी केन्द्रका युवा नेताहरुमध्ये उनलाई असल ठान्नेहरू धेरै छन्। त्यसैले उनले पिताको अपेक्षा र आफ्नै वाचा अनुसार काम गर्ने चुनौतीमा खरो उत्रिनुपर्ने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791212224.jpg)
-1786602170.png)
-1791090469.jpeg)
