काठमाडौं– कतारमा जारी विश्वकपअन्तर्गत शुक्रबार राती अर्जेन्टिना र नेदरल्याण्ड्सबीच दोस्रो क्वाटरफाइनल खेल हुदैछ। समूह ‘ए’ को विजेता नेदरल्याण्ड्स र समूह ‘सी’ को विजेता अर्जेन्टिना दोहाको लुसिल रंगशालामा प्रतिस्पर्धा गर्दैछन्।
यी दुई देशको विश्वकपमा पुरानो प्रतिस्पर्धा छ। सन् १९७८ मा अर्जेन्टिनाले पहिलो पल्ट विश्वकप जित्दा फाइनलमा नेदरल्याण्ड्सलाई नै पराजित गरेको थियो। ८ वर्षअघि ब्राजिलमा भएको सन् २०१४ को विश्वकपको सेमिफाइनलमा पनि पेनाल्टीमा नेदरल्याण्ड्सलाई पराजित गर्दै अर्जेन्टिना फाइनल प्रवेश गरेको थियो।
नकआउट चरणमा यी दुई देशबीच तेस्रो ठूलो भिडन्त हुदैछ। जसमा डच टोलीका प्रशिक्षक लुई फान खाल पुरानो पराजयको बदला लिन आतुर देखिन्छन्। आजको खेलमा दुवैतर्फ तीन जनाको खेल विशेष मानिएको छ।
लिओनल मेसीविरूद्ध भर्जेल भान दायक
अर्जेन्टिनी कप्तान लिओनल मेसी अहिले पूर्ण लयमा देखिन्छन्। उनले जारी विश्वकपमा मेक्सिको र अस्ट्रेलियाविरूद्ध असाधारण गोल गर्दै आफू लयमा रहेको प्रमाणित गरिसकेका छन्। त्यसैले आजको खेलमा नेदरल्याण्ड्सले उनलाई चक्रब्यूमा पार्ने रणनीति अख्तियार गरेको छ। र, त्यसको जिम्मा लिभरपुलका डच सेन्टर हाफ भर्जेल भान दायकको काँधमा रहने छ।
उनको जिम्मेवारीभित्र मेसीको पेसलाई रोक्नु मात्र हुने छैन, छलाउने कला र गोलका लागि सिर्जना गर्ने पासलाई बीचैमा अवरोध गर्ने काम पनि हुनेछ।
दायक नेदरल्याण्ड्सका प्रभावशाली डिफेन्डर हुन्। उनले पनि जारी विश्वकपमा प्रभावशाली प्रदर्शन गरेका छन्। मेसीलाई डिबक्सभित्र गतिविधि गर्न नदिने रणनीति उनको हुनेछ। उनको नेतृत्वमा डच टोलीले ४ खेलमा २ गोल मात्र खाएको छ। डायकले डिबक्सभित्र २२ वटा सम्भावित खतरा टारेका थिए।
मेसीले जारी विश्वकपमा ३ गोल गरिसकेका छन्। उनले ४ खेलमा गोलका लागि ११ वटा मौका निकालेका थिए। त्यसैले आजको खेलमा डच गोल पोस्टमा यी दुईबीचको भिडन्त रोचक हुनेछ।
कोडी गाक्पोविरूद्ध क्रिस्टियन रोमेरो
मेसी र भान दायकको लडाई जस्तै आजको खेलमा डच टोलीका अग्रपंक्तिका खेलाडी कोडी गाक्पो र अर्जेन्टिनी डिफेन्डर रोमेरोबीचको भिडन्त पनि उत्तिकै रोचक हुनेछ। रोमेरोलाई अर्जेन्टिनी टिमको भविस्य भनेर हेरिएको छ।
तर, चोटका कारण उनी आजको खेलमा उत्रिने सम्भावना रहस्यमय छ। साउदी अरेबियाविरूद्ध २–१ ले पराजित खेलमा उनले त्यति राम्रो खेल्न सकेका थिएनन्। उनलाई मेक्सिकोविरूद्धको खेलमा पदस्थापन गर्दै लिसान्द्रो मार्टिनेजलाई प्रवेश गराइएको थियो। तर, पोल्याण्ड र अस्ट्रेलियाविरूद्ध उनले उत्कृष्ट पुनरागमन गरेका थिए।
अहिले डच फरवार्ड गाक्पाको विषयमा चर्चा चुलिएको छ। अग्रपंक्तिमा उनको फिनिसिङलाई लिएर ठूला क्लबहरूले आँखा लगाएका छन्। उनले ४ खेलमा ३ गोल पनि गरिसकेका छन्। उनी एरियल बल र थ्रु बल दुवैमा पोख्त देखिएका छन्। विपक्षी टोलीको पर्खाल भेदन गर्नसक्ने उत्कृष्ट कलाका कारण उनलाई मार्क गरिरहन गाह्रो पर्ने गर्छ।
त्यसैले आज अर्जेन्टिनाले उनलाई रोक्ने भए रोमेरोको प्रदर्शन उच्च दर्जाको हुनु जरुरी छ। गाक्पोले जारी विश्वकपमा ३४० मिनेट खेल्दै गोलका लागि ५ अवसर प्रदान गरेका थिए।
साउदीसँग खराब प्रदर्शन गरे पनि पछिल्लो दुई खेलमा राम्रो फर्ममा फर्किएका रोमेरोले १० वटा अवसर जोगाएका थिए।
रोड्रिगो डि पलविरूद्ध फ्रान्की डि जोङ
नेदरल्याण्ड्स र अर्जेन्टिनाबीचको आजको भिडन्तलाई यी दुई खेलाडीका कारण ला–लिगाको भिडन्तको रूपमा पनि हेरिएको छ। एट्लेटिको मड्रिडबाट खेल्ने अर्जेन्टिनाका रोड्रिगो डि पल र नेदरल्याण्ड्सको टिममा रहेका बार्सिलोनाका डि जोङबीच क्लब फुटबलमै प्रतिस्पर्धा छ। त्यसैले आजको खेलमा यी दुईबीचको प्रतिस्पर्धा रोचक हुने सम्भावना प्रबल छ।
दुवै जना आफ्नो देशको मिडफिल्डका प्रभावशाली खेलाडी हुन्। तर, दुवैको खेल्ने तरिका फरक छ। डि पल ठूलो क्षेत्र ओगटेर खेल्छन्। उनी डिफेन्स र मिड दुवैको बीचको पुलको काम गरिरहेका हुन्छ। उनी अगाडि बल सप्लाई गर्न जहाँ खप्पिस मानिन्छन्, विपक्षी टोलीको आक्रमणलाई रोक्न तल पनि झर्ने गर्छन।
यसको उल्टो डि जोङ परम्परागत डिफेन्सिभ मिडफिल्डको अवधारणामा फिट बस्दैनन्। उनी सिर्जनशील प्लेमेकर हुन्। बललाई नियन्त्रणमा राख्ने र गोलका लागि अवसर मिलाउने उनको कला प्रभावकारी देखिन्छ। राम्रो फर्ममा रहेका गाक्पो र मेम्फेस डिपाइलाई ‘फाइनल थर्ड’ बाट बल निकाल्न उनी खप्पिस मानिन्छन्। त्यसैले यी दुई खेलाडीबीच मिडफिल्डमा घम्साघम्सी पर्ने निश्चित देखिन्छ।
डि पलले जारी विश्वकपमा ४ वटा गोलका लागि मौका मिलाएका थिए। डि जोङले पनि यति नै संख्यामा गोलको मौका निकालेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
