काठमाडौं– प्रधानमन्त्री शेरबहादुर देउवा र लोकतान्त्रिक समाजवादी पार्टी (लोसपा)का अध्यक्ष महन्थ ठाकुरबीच भेटवार्ता भएको छ। प्रदेश तथा प्रतिनिधि सभा निर्वाचनको नतिजा अन्तिम चरणमा पुग्दै गर्दा गठबन्धनका २ शीर्ष नेताबीच भेटवार्ता भएको हो।
२ नेताबीच बुधबार साँझ प्रधानमन्त्रीको सरकारी निवास बालुवाटारमा छलफल भएको हो। भेटमा निर्वाचन परिणामको समीक्षासहित नयाँ सरकार गठनका विषयमा छलफल भएको नेता ठाकुरनिकट स्रोतले जानकारी दियो।
मंसिर ४ गते सम्पन्न प्रदेश तथा प्रतिनिधि सभा निर्वाचनमा लोसपाले सत्ता गठबन्धनबाटै उम्मेदवारी दिएको थियो।
प्रतिनिधि सभा सदस्यका लागि लोसपाले मधेस प्रदेशका ७ सिटमा गठबन्धनका दलसँग तालमेल गरेको थियो। जसमध्ये ३ सिटमा लोसपाले जित हासिल गरेको छ।
यस्तै, मधेस प्रदेश सभामा लोसपाले प्रत्यक्षतर्फ ७ सिट जितेको छ।
यस्तै, लोसपा नेता सर्वेन्द्रनाथ शुक्ला रुपन्देहीबाट निर्वाचित भएकाले प्रतिनिधि सभामा लोसपाको सिट संख्या ४ पुगेको छ।
लोसपा हाल समानुपातिकतर्फ थ्रेसहोल्ड कटाउन संघर्षरत छ। तर, मतगणना अन्तिम चरणमा पुग्दै गर्दा लोसपाले थ्रेसहोल्ड कटाउने गरी कूल सदर मतको ३ प्रतिशत मत ल्याउने सम्भावना कम छ।
लोसपा केन्द्र र प्रदेशमा पनि सरकारमा सहभागी हुने योजनामा छ। खास गरेर मधेस प्रदेशको सरकारमा आफूहरुको सम्मानजनक सहभागिता हुनुपर्ने लोसपाका नेताहरुको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
