तस्बिर : क्यान।
काठमाडौं– सुदूरपश्चिम प्रदेश काठमाडौंमा जारी वाई वाई यु–१९ पुरुष राष्ट्रिय क्रिकेट प्रतियोगिताको फाइनल नजिक पुगेको छ।
कीर्तिपुरस्थित त्रिभुवन विश्वविद्यालयको मैदानमा बुधबार सम्पन्न खेलमा सुदूरपश्चिम प्रदेशले मधेस प्रदेशमाथि ७ विकेटको जित निकालेसँगै फाइनल नजिक पुगेको हो।
सुदूरपश्चिमले सम्पन्न पाँच खेलमध्ये सबै खेलमा स्पष्ट जित निकालेको छ। सुदूरपश्चिमले अंक तालिकामा १० अंक जोडेको छ। लगातार पाँचौं जित निकाल्ने क्रममा स्पिनर नरेन साउदको पाँच विकेट र दीपक बोहराको अर्धशतकमा सुदूरपश्चिम प्रदेशले पाँचौं खेलमा पनि जित निकाल्यो।
जितका लागि १ सय २३ रनको लक्ष्य पछ्याएको सुदूरपश्चिमले १८.५ ओभरमा ३ विकेट गुमाउँदै पूरा गर्यो। सुदूरपश्चिमको जितमा दीपक बोहराले ५८ बलमा ६ चौका र २ छक्कासहित सर्वाधिक ५३ रनको अर्धशतकीय इनिङ खेले।
गजेन्द्र बोहरा १० बलमा २ चौका र २ छक्कासहित २४ रन र अनुराग सिंह २ रनमा अविजित रहे। मधेसका अभिषेक तिवारीले सर्वाधिक दुई विकेट लिए।
यसअघि टस जितेर पहिला ब्याटिङको निम्तो पाएको मधेसले ३८.१ ओभरमा सबै विकेट गुमाएर १ सय २२ रन जोड्न सक्यो। मधेसका अनिल अन्सारीले ५६ बलमा ५ चौकासहित सर्वाधिक ३२ रनको पारी खेल्दा चौंथो नम्बरका ब्याटर इमरान शेखले ३८ बलमा ५ चौकासहित २८ रन जोडे।
कप्तान अभिषेक तिवारी शून्य, राजेश यादव ६, नितेश यादव ४ र अब्जित मण्डल ६ रनमा आउट भए। बलिङतर्फ सुदूरपश्चिमका नरेन साउदले ९.१ ओभरमा १ मेडनसहित २४ रन खर्चेर ५ विकेट लिए। युवराज खत्रीले ९ ओभरमा १ मेडनसहित १५ रन खर्चेर २ विकेट लिए। हेमन्त धामीले ६ ओभरमा १ मेडनसहित २७ रन खर्चेर ३ विकेट लिए। सुदूरपश्चिमले अब अन्तिम खेल शुक्रबार बागमतीसँग खेल्नेछ। उक्त खेलमा पराजित हुँदा पनि फाइनलमा पुग्नसक्छ।
तस्बिर : क्यान।
प्रतियोगिता अन्तर्गत बुधबार नै मुलपानी मैदानमा भएको खेलमा लुम्बिनी प्रदेशले बागमती प्रदेशलाई ८५ रनले पराजित गर्यो। जितका लागि लुम्बिनीले दिएको २ सय ३५ रनको लक्ष्य पछ्याएको बागमतीले ३५.३ ओभरमा सबै विकेट गुमाएर मात्र १ सय ४९ रन बनाउन सक्यो।
बागमतीका लागि कप्तान अशोक पौडेलले ५४ बलमा ३१ रनको योगदान गरे। प्रतिक श्रेष्ठले २७ तथा रोशन विकले २३ रन बनाए। कसिलो बलिङ गरेको बागमतीलाई सस्तैमा समेट्ने क्रममा लुम्बिनीका दुर्गेश गुप्ताले ४ विकेट लिए। अभिषेक गौतम र तुलबहादुर थापाले समान २/२ तथा नर सार्की र निर्मल गुरुङले समान १/१ विकेट हात पारे।
यसअघि पहिले ब्याटिङ गरेको लुम्बिनीले ४९ ओभरमा सबै विकेट गुमाएर २ सय ३४ रन बनाएको थियो। लुम्बिनीका लागि देव खनालले ५४ बलमा ४६ तथा आकाश त्रिपाठीले ७० बलमा ४० रन बनाए। दुर्गेश गुप्ताले २५ बलमा ३८ रन तथा तुलबहादुर थापाले २८ रन बनाए।
विशाल भुषालले २० रन जोड्दा कप्तान विशालविक्रम केसीले ११ रन जोडे। बागमतीका लागि प्रतिक श्रेष्ठले ३ तथा अभिषेक कोइराला र ओमकार यादवले समान २/२ विकेट निकाले। अहमद राजा र योगेश भाटको नाममा समान १/१ विकेट रह्यो। यससँगै बागमतीले एक खेल अगावै फाइनल पुग्ने अवसर गुमाएको छ।
पाँच खेलमा ८ अंकका साथ बागमती दोस्रो स्थानमा रहेको छ। उता जित निकालेको लुम्बिनीको ४ खेलबाट ६ अंक भएको छ। प्रतियोगितामा बिहीबार पनि दुई खेल हुनेछन्। कीर्तिपुरमा लुम्बिनी प्रदेश र प्रदेश १ बीच खेल हुनेछ भने मुलपानी मैदानमा गण्डकी प्रदेश र कर्णाली प्रदेशबीच खेल हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
