काठमाडौं– कपिलबस्तु क्षेत्र नम्बर ३ बाट मंगलप्रसाद गुप्ता विजयी भएका छन्। २०४८ सालदेखि उनी यस क्षेत्रबाट निरन्तर उम्मेदवार छन्। हरेकपटक उपविजेता बनिरहेका उनी पहिलोपटक जित हासिल गर्न सफल भएका हुन्।
यसपल्ट नेकपा एमालेबाट उम्मेदवार बनेका गुप्तादले २२ हजार ६१९ मत प्राप्त गरे। निवर्तमान सांसद कांग्रेसका अभिषेकप्रताप शाह १८ हजार ९८२ मतमा सीमित रहे। २०७४ को निर्वाचनमा साहले १९ हजार ९ सय ६६ मत ल्याउँदा गुप्ताको १५ हजार ८ सय ३ मत आएको थियो।
गुप्ता २०४८ सालदेखि चुनाव लडिरहेका छन्। २०४८ र २०५६ मा उनी कांग्रेसबाट चुनाव लडेका थिए, तर जित्न सकेनन्। २०७० मा तत्कालीन तराई मधेश लोकतान्त्रिक पार्टी (तमलोपा) र २०७४ मा फोरमबाट सांसद उठेका थिए। सवै निर्वाचनमा ‘उपविजेता’मै चित्त बुझाउनु पर्यो।
२०७८ पुस ६ गते उनी एमाले प्रवेश गरे। उनलाई पार्टीमा प्रवेश गराउन अध्यक्ष केपी शर्मा ओलीका साथै उपाध्यक्ष विष्णु पौडेल, महासचिव शंकर पोखरेललगायतका नेताहरु कपिलवस्तु पुगेका थिए।
एमालेमा प्रवेश गर्नुअघि उनी जनता समाजवादी पार्टीका केन्द्रीय सदस्य रहेका थिए। २०७४ सालमा एमालेले उक्त क्षेत्रमा उठाउन बलियो उम्मेदवार पाएको थिएन। त्यतिबेला हृदयेश त्रिपाठीका उम्मेदवार ईश्वर दयाल मिश्रलाई समर्थन गरेको थियो। मिश्र तेस्रो नम्बरमा थिए।
कपिलवस्तुको पहाडी समुदायमा राम्रै पकड रहेको एमाले मधेशी समुदायबीच कमजोर थियो। त्यहाँ प्रभाव जमाउन उक्त समुदायमा भिजेको नेताको खोजीमा थियो एमाले। विभिन्न दलमा पुगेर चुनाव लडेपनि जित्न नसकेका गुप्तालाई पहाडी समुदायमा संगठन भएको पार्टी चाहिएको थियो। दुवैको साझा आवश्यकताका कारण गुप्ता एमालेमा पुगेका थिए।
राजमार्गको दक्षिण क्षेत्रमा लोकप्रिय रहेका गुप्ताकले पहाडी समुदायको मत नपाउँदा पराजित हुन पुगेको महसुस यसअघि गरेका थिए। अघिल्लो निर्वाचनमा पहाडी समुदायको मत कांग्रेसका साह र एमालेले समर्थन गरेका मिश्रलाई गएको थियो।
गुप्ताको प्रवेशले कपिलवस्तु जिल्लामै एमालेको प्रभाव बढेको यो निर्वाचनबाट देखिएको छ। कपिलवस्तु १ मा एमालेकै बलराम अधिकारीले जितेका छन् भने प्रदेशमा पनि ६ मध्ये ४ वटा क्षेत्रमा एमालेले जितेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
