काठमाडौं– कतारमा जारी २२औं संस्करकणको विश्वकप फुटबलमा सहभागी ३२ ओटै राष्ट्रले आफ्नो पहिलो खेल खेलिसकेका छन्।
प्रत्येक समूहमा चार देशका दरले आठ समूह बनाएर समूह चरणको खेल भइरहेको छ। आज शुक्रबारबाट भने समूह चरणका दोस्रो खेल सुरु हुँदैछन्।
समूहमा रहेका प्रत्येक देशले तीन खेल खेल्नुपर्ने हुन्छ। तीन खेल खेलिसक्दा आफ्नो समूहको शीर्ष दुई टोली अन्तिम १६ (नकआउट) चरणमा प्रवेश गर्नेछन्। जसअन्तर्गत पहिलो खेल सकिँदासम्म कसको अवस्था कस्तो छ वा कुन टिमलाई अर्को चरणमा जान सहज र असहज छ भन्नेबारे उल्लेख गर्दैछौं।
समूह ‘ए’
समूह ‘ए’ मा आयोजक राष्ट्र कतार, नेदरल्याण्ड, इक्वेडर र सेनेगल छन्। पहिलो खेलमा जित निकालेका नेदरल्याण्ड र इक्वेडरले समान तीन–तीन अंक जोड्दै समूहको पहिलो र दोस्रो स्थानमा छन्।
उद्घाटनमा आयोजक राष्ट्र कतारलाई इक्वेडरले २–० ले पराजित गरेको थियो। बाँकी २ खेल मध्ये एकमा जित निकालेको अवस्थामा इक्वेडर अन्तिम १६ मा प्रवेश गर्नेछ। यता कतारलाई भने बाँकी दुबै खेल जित्नुपर्ने दबाब छ। जसकारण कतार समूह चरणबाटै बाहिरिने सम्भावना छ।
यही समूहको अर्को खेलमा नेदरल्याण्डले सेनेगललाई २–० गोलले नै पराजित गरेको थियो। जसकारण नेदरल्याण्डलाई अर्को चरणमा प्रवेश गर्न बाँकी दुई खेल मध्ये एकमा जित निकाले पुग्छ। यता सेनेगललाई भने दुई खेल नै जित्नुपर्ने दबाब छ।
आज कतार र सेनेगल, नेदरल्याण्ड र इक्वेडर एकअर्कामा प्रतिस्पर्धा गर्दैछन्।
समूह ‘बी’
यो समूहमा इंग्ल्याण्ड, वेल्स, अमेरिका र इरान छन्। इंग्ल्याण्डको अर्को चरणको सम्भावना सबैभन्दा पहिलो छ। पहिलो खेलमा इरानलाई ४–० गोलले पराजित गर्दै इंग्ल्याण्ड ३ अंक जोड्दै शीर्ष स्थानमा छ। अब खेल्ने दुई खेल मध्ये एक खेलमा जित निकालेको अवस्थामा इंग्ल्याण्ड अर्को चरण प्रवेश गर्नेछ।
यता पहिलो खेलमै ४ गोल खाएको इरानको अर्को चरण प्रवेशको सम्भावना कम छ। बाँकी दुई खेल नै जित निकाल्नुपर्ने दबाब इरानसँग छ।
यही समूहका वेल्स र अमेरिकाले पहिलो खेल बराबरीमा सकाएका थिए। यी दुवैको समान एक–एक अंक छ। जसकारण यी दुवैको अर्को चरणको सम्भावना जीवितै छ।
समूह ‘सी’
यो समूहमा साउदी अरेबिया, पोल्याण्ड, मेक्सिको र अर्जेन्टिना छन्। अर्र्जेन्टिनाविरुद्ध २–१को सनसनीपूर्ण कमब्याक जित निकालेको साउदी ३ अंक जोड्दै समूहको शीर्ष स्थानमा छ। जसकारण अन्य टिमलाई भन्दा साउदीलाई अर्को चरण प्रवेशका लागि सहज देखिन्छ।
साउदी र अब पोल्याण्ड र मेक्सिकोसँग खेल्न बाँकी छ। यी मध्ये एक खेलमा जित निकालेको अवस्थामा साउदी अर्को चरणमा जान सक्छ।
साउदीसँगै अप्रत्याशित हार ब्यहोरेको अजेन्टिना भने कठिन अवस्थामा छ। अर्को चरण प्रवेशका लागि अर्जेन्टिनालाई पोल्याण्ड र मेक्सिकोसँगको खेल जित्नै पर्ने दबाब छ।
यता पहिलो खेल बराबरी गरेका पोल्याण्ड र मेक्सीको अर्को चरण जाने सम्भावना पनि बलियो छ। यी दुवै एक–एक अंक जोड्दै आफ्नो समूहको दोस्रो र तेस्रो स्थानमा छन्।
समूह ‘डी’
यो समूहमा फ्रान्स, ट्युनिसिया, डेनमार्क, अष्ट्रेलिया सम्मिलत छन्। पहिलो खेलमा अष्ट्रेलियालाई ३–० ले हराएको फ्रान्स ३ अंकका साथ शीर्ष स्थानमा छ। फ्रान्सको अर्को चरण सम्भावना बलियो छ। अब खेल्न बाँकी दुई खेल मध्ये एकमा जित निकालेको अवस्थामा फ्रान्स अर्को चरणमा प्रवेश गर्नेछ।
पहिलो खेलमा फ्रान्ससँग ३–० को हार ब्योहोर्दै अंकबिहीन भएको अष्ट्रेलियाको अर्को चरण प्रवेशको सम्भावना भने झिनो छ। अब खेल्न बाँकी दुवै खेल जितेको अवस्थामा मात्रै अष्ट्रेलिया अर्को चरणमा प्रवेश गर्नेछ।
पहिलो खेल गोलरहित बराबरी खेल्दै अंक बाँडेका ट्युनिसिया र डेनमार्क दुवैको अर्को चरणको सम्भावना छ।
समूह ‘ई’
‘गु्रप अफ डेथ’को रुपमा हेरिको यो समूहमा स्पेन, जापान, जर्मनी र कोस्टारिका छन्। पहिलो खेलमा कोस्टारिकामाथि ७–० को ऐतिहासिक जित निकालेको स्पेन शीर्ष स्थानमा छ। जसकारण अर्को चरण प्रवेशका लागि स्पेनलाई सहज देखिन्छ। अब खेल्न बाँकी दुई खेल मध्ये एकमा जित निकालेको अवस्थामा स्पेन अर्को चरणमा प्रवेश गर्नेछ।
जर्मनीमाथि २–१को सनसनीपूर्ण कमब्याक जित निकालेको एसियन पावरहाउस जापानको पनि अर्को चरण प्रवेशको सम्भावना बलियो छ। जापान पनि ३ अंक जोड्दै समूहको दोस्रो स्थानमा छ। जापानले अब खेल्न बाँकी स्पेन र कोस्टारिकामध्ये एक खेलमा जित निकालेको अवस्थामा जापान अर्को चरणमा जानेछ।
यो समूहका जर्मनी र कोस्टारिका भने कठिन अवस्थामा छ। पहिलो खेल हार्दै अंकबिहीन भएका यी दुई टोलीलाई अर्को चरणका लागि दुवै खेल जित्नुपर्ने दबाब छ।
समूह ‘एफ’
बेल्जियम, क्रोएसिया, मोरक्को र क्यानडा रहेको यो समूहमा बेल्जियमा ३ अंकका साथ शीर्ष स्थानमा छ। पहिलो खेलमा क्यानडामाथि १–० को संघर्षपूर्ण जित निकालेको बेल्जियमलाई अर्को चरणका लागि सहज देखिन्छ। अब खेल्न बाँकी क्रोएसिया र मोरक्कोसँग खेल मध्ये एकमा जित निकालेको अवस्थामा बेल्जियम अर्को चरणमा जानेछ।
पहिलो खेल गोलरहित बराबरी खेलेका क्रोएसिया र मोरक्को समान एक–एक अंकका साथ दोस्रो र तेस्रो स्थानमा छन्। दुवै टोलीको अर्को चरणको सम्भावना छ। खेल्न बाँकी दुई खेलको नतिजाबाट अर्को चरणको टुंगो लाग्नेछ।
अंकबिहीन हुँदै पुछारमा रहेको क्यानडाको भने अर्को चरणको सम्भावना कठिन छ। बाँकी दुवै खेल जितेको अवस्थामा मात्रै क्यानडा अर्को चरणमा प्रवेश गर्नेछ।
समूह ‘जी’
ब्राजिल, स्वीट्जरल्याण्ड, क्यामरुन र सर्बिपया रहेको यो समूहमा ब्राजिल र स्वीट्जरल्याण्डले जित निकालेका छन्। यी दुवै तीन अंकका साथ पहिलो र दोस्रो स्थानमा छन्। यी दुवैलाई अर्को चरण प्रवेशका लागि सहज देखिन्छ। अब खेल्न बाँकी दुई खेल मध्ये एकमा जित निकालेको अवस्थामा यी दुवै टोली अर्को चरणमा जानेछन्।
यता अंकबिहीन बनेका क्यामरुन र सर्बियालाई अर्को चरण प्रवेशका लागि भने निकै कठिन देखिन्छ। खेल्न बाँकी दुवै खेलमा जित निकालेको अवस्थामा मात्रै क्यारुन र सर्बिया अर्को चरणमा जानेछन्। क्यारुनले अब ब्राजिल र सर्बियासँग खेल्न बाँकी छ। सर्बियाले भने स्वीट्जरल्याण्ड र क्यारुनसँग खेल्नेछ।
समूह ‘एच’
अर्को कठिन समूहको रुपमा चिनिएको समूह ‘एच’ मा पोर्चुगल, साउथ कोरिया, उरुग्वे र घाना छन्। घानामाथि ३–२ को संघर्षपूर्ण जित निकालेको पोर्चुगल ३ अंकका साथ समूहको शीर्ष स्थानमा छ। शीर्ष स्थानमा रहेको पोर्चुगलको अर्को चरण जाने सम्भावना अन्यको भन्दा बढी सहज छ।
पोर्चुगलले अब साउथ कोरिया र उरुग्वेसँग खेल्न बाँकी छ। यी दुई मध्ये एकमा जित निकालेको अवस्थामा पोर्चुगल अर्को चरण जानेछ।
यता गोलरहित बराबरी खेल्दै अंक बाँडेका उरुग्वे र साउथ कोरियाको पनि अर्को चरण जाने सम्भावना छ। खेल्न बाँकी दुई खेलेको नतिजाले को अर्को चरण पुग्ने भन्ने टुंगो लगाउनेछ।
पोर्चुगलसँग पराजित भएको घानाको भने अर्को चरण पुग्ने सम्भावना कठिन बनेको छ। घानाले अब खेल्न बाँकी साउथ कोरिया र उरुग्वेसँग खेल्न बाँकी छ। यी दुवै खेल जितेको अवस्थामा घाना अर्को चरणमा पुग्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
