काठमाडौं– प्रतिनिधि सभा र प्रदेश सभा सदस्यको मतगणना जारी छ। यो सँगै केही चर्चित महिला उम्मेदवारहरु भने निर्वाचित भएका छन्।
रेखा शर्मा, तोसिमा कार्की, सोविता गौतम र विद्या भट्टराई निर्वाचित भएका छन्। दाङ–२ मा नेकपा माओवादीकी रेखा शर्मा विजयी भएकी छन्।
उनीसँग नेकपा एमालेका महासचिव शंकर पोखरेल पराजित भएका हुन्। शर्माले २६ हजार ८७७ मत प्राप्त गर्दा पोखरेलले २६ हजार ६८१ मत ल्याएका छन्।
शर्मा २०७० को संविधान सभा निर्वाचन र २०७४ को प्रतिनिधि सभा निर्वाचनमा समानुपातिकतर्फबाट सांसद बनेकी थिइन्।
संसदीय समितिमा सक्रियतापूर्वक भूमिका निर्वाह गर्ने सांसदको रुपमा उनी परिचित छिन्। कास्की–२ बाट नेकपा एमालेकी विद्या भट्टराई निर्वाचित भएकी छन्। उनीसँग राष्ट्रिय स्वतन्त्र पार्टीका माधवप्रसाद कँडेल पराजित भएका छन्।
भट्टराईले १६ हजार ९९८ मत ल्याउँदा कँडेलले १२ हजार ४९५ मत ल्याएका छन्। भट्टराई प्रतिनिधि सभाको निवर्तमान सदस्य हुन्। २०७६ मंसिरमा भएको उपनिर्वाचनमा कास्की–२ बाट निर्वाचित भएकी थिइन्।
श्रीमान रवीन्द्र अधिकारीको निधन भएपछि संसदीय प्रतिस्पर्धामा होमिएकी उनले विजय हासिल गरेकी थिइन्।
यस्तै ललितपुर ३ बाट राष्ट्रिय स्वतन्त्र पार्टिकी तोसिमा कार्की निर्वाचित भएकी छन्। तोसिमा कार्कीले ३१ हजार १३६ मत प्राप्त गरिन् भने उनका प्रतिस्पर्धी नेकपा एमालेका अमृत खड्काले १२ हजार ९६३ मत ल्याए। उर्जामन्त्रीसमेत रहेकी नेकपा माओवादी केन्द्रकी पम्फा भुसाल भने तेस्रो स्थानमै सिमित बनिन्। भुसालले ८ हजार ७६९ मत प्राप्त गरेकी छन्।
३३ वर्षीय कार्कीको पृष्ठभूमि चिकित्सा पेशासँग जोडिएको छ। उम्मेदवार बन्नुअघि उनी पाटन स्वास्थ्य विज्ञान प्रतिष्ठानको अध्यापकमा कार्यरत थिइन्। उनी जागिरबाट राजीनामा दिएर राजनीतिमा आएकी हुन्।
साथै नेपाल मेडिकल काउन्सिलको सदस्यसमेत रहेकी उनले सोही पदमा रहेर उम्मेदवार बनेको भन्दै उजुरी परेपछि निर्वाचन आयोगले उम्मेदवारी खारेज गरेको थियो।
तर सर्वोच्च अदालतले उनको उम्मेदवारी कायमै रहने भन्दै अन्तरिम आदेश दियो।
काठमाडौं–२ बाट राष्ट्रिय स्वतन्त्र पार्टीकी सोविता गौतम निर्वाचित भएकी छन्। गौतमले १५ हजार २२९ ल्याउँदा एमालेका मणिराम फुँयाल ११ हजार ५५५, राप्रपाकी कुन्तीदेवी पोखरेलले ११ हजार १४ र माओवादीकी ओनसरी घर्तीले ९ हजार ४४९ मत ल्याएकी छन्।
२७ वर्षीया गौतम राष्ट्रिय स्वतन्त्र पार्टीको केन्द्रीय सदस्य हुन्। उनी अधिवक्तासमेत हुन्। संम्भवतः उनी कान्छी सांसद बनेकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
-1788425345.png)
