निर्वाचन विशेष

दाङका ४ स्थानमा मतदान अधिकृतदेखि सहयोगीसम्म महिलामात्रै

रासस बिहीबार, मंसिर १, २०७९ २०:४२

देउखुरी– यही मङ्सिर ४ गते हुन गइरहेको प्रतिनिधि सभा र प्रदेश सभा सदस्यको निर्वाचनका लागि दाङको चार मतदानस्थलमा महिला कर्मचारीहरू मात्रै खटाइएको छ। मतदान अधिकृतदेखि सहयोगीसम्म महिला मात्रैलाई जिम्मेवारी दिइएको छ।

घोराही–१८ मा रहेको आधारभूत विद्यालय बेलघारीको मतदान केन्द्र (क)मा महिला कर्मचारीहरू मात्रै रहेका छन्। त्यहाँ मतदान अधिकृत, कर्मचारी र सुरक्षाकर्मी सबै महिला मात्रै रहेको निर्वाचन अधिकृत इन्दु बसेलले बताइन्। उनलाई सहयोग गर्न श्रृजना शर्मा, हेमन्ता थापा, विना शर्मा, सावित्रादेवी शर्मा, दीपसना बीसी, बालिका घिमिरे र गोमा मगर रहेका छन्। सो मतदान केन्द्रमा नौ सय ५२ मतदाता रहेका छन्।

त्यसैगरी सोही विद्यालयको (ख) केन्द्रमा उर्मिला तिमल्सिना मतदान अधिकृत रहेका छन्। उनलाई सहयोग गर्न कमला खड्का,अर्चना चौधरी, इन्दिरा विक, हिरा केसी, गोमा योगी, तिला विक र गीता चौधरी गरी आठ जना महिला कर्मचारी रहेका छन्। सो मतदान केन्द्रमा नौ सय ७३ मतदाता रहेका छन्।

घोराही–१७ मा रहेको प्रवि हरिद्वारको (ग) मतदान केन्द्रमा खिमा भुसाल मतदान अधिकृत रहेका छन्। उनलाई सघाउन वसन्ती पौडेल, विपना बर्तौला, सम्झना कार्कीपरियार, कृतिसा रावत, श्रृजना भण्डारी, दिला केसी र सुमन चौधरी गरी आठ जना महिला कर्मचारी रहेका छन्। सो मतदान केन्द्रमा सात सय ४८ मतदाता रहेका छन्।

सोही वडामा रहेको गोरक्षरत्ननाथ मावि चौघेराको (क) मतादान केन्द्रमा मोतिकुमारी विश्वकर्मा मतदान अधिकृत रहेकी छिन्। उनलाई सघाउन गुप्ताकुमारी अधिकारी, विश्णा नेपाली, अनिता बुढा, सरिता भण्डारी, मनिषा चौधरी, गोमा बस्नेत र पानमती कामी रहेका छ। सो केन्द्रमा आठ सय १२ जना मतदाता रहेका छन्।

दाङ जिल्लाको मुख्य मतदान अधिकृत कृपासुर कार्कीले महिलाहरू हरेक काममा सक्षम छन् भन्ने सन्देश दिने र यसप्रकारको प्रयासले समाजमा सकारात्मक सन्देश जाने बताए। उनी भन्छन्, “महिलाले मात्रै सञ्चालन गरेको नमुना मतदान स्थलले समाजमा सकारात्मक सन्देश प्रवाह हुन्छ जस्तो लाग्छ ।”

गत वैशाखमा सम्पन्न भएको स्थानीय तह निर्वाचन महिला मात्रैले हाकेको मतदान केन्द्र घोराही–१६ सानी अम्बापुर केन्द्रमा कर्मचारीदेखि सुरक्षाकर्मीसम्म महिलाले चलाएकाले सोही अभ्यासलाई निरन्तरता दिएको गोरक्षरत्ननाथ मावि चौघेराको (क) मतदान केन्द्रका मतदान अधिकृत मोती विश्वकर्माले बताए। ‘स्थानीय तहको अनुभव यो निर्वाचनमा सदुपयोग गर्ने छौँ’, उनले भने। महिला कर्मचारी मात्रै खटिएको निर्वाचन केन्द्रमा सुरक्षाकर्मी पनि महिलामात्रै भएमा अझै राम्रो हुने उनको भनाइ छ। दाङमा एक सय ५३ मतदान स्थल र चार सय ६५ मतदान केन्द्र रहेका छन्। चार लाख १४ हजार नौ सय ५६ जना मतदाता रहेका छन्।