प्रचण्डको दाबी– ओनसरी प्रधानमन्त्री बन्न लायक उम्मेदवार हुन्

राजनीति

नेपाल लाइभ बिहीबार, मंसिर १, २०७९ १८:०५

काठमाडौं– नेकपा (माओवादी केन्द्र)का अध्यक्ष एवम् पूर्वप्रधानमन्त्री पुष्पकमल दाहाल प्रचण्डले पूर्वसभामुख ओनसरी घर्ती प्रधानमन्त्री बन्न लायक रहेको दाबी गरेका छन्।

काठमाडौं क्षेत्र नम्बर २ बाट उठेकी प्रतिनिधि सभाकी उम्मेदवार घर्तीलाई आफूले सानैदेखि चिनेको र उनमा प्रधानमन्त्री बन्ने दृढता रहेको प्रचण्डको भनाइ थियो।

‘ओनसरी घर्ती महिला प्रधानमन्त्री बन्न लायक संघर्षशील महिला हुन्’, बिहीबार काठमाडौंमा आयोजित चुनावी सभालाई सम्बोधन गर्दै उनले भने, ‘त्यसकारण यो निर्वाचन यस क्षेत्रका लागि एक ऐतिहासिक अवसर भएर आएको छ।’

प्रचण्डले मंसिर ४ को निर्वाचनलाई नेपाली जनताले प्रतिगमनलाई परास्त गर्ने अवसरको रूपमा लिनुपर्ने दोहो¥याए।
उनले एमाले अध्यक्ष केपी शर्मा ओली र उनको गठबन्धन फेरि जितेर आए संविधान च्यात्ने भएकाले उनीहरूलाई नेपाली जनताले तिरस्कार गरेर अघि बढनुपर्ने बताए। ओली संविधानमा हस्ताक्षर गरेर पनि संविधानको रक्षक र गणतन्त्रको पक्षधर हुन नसकेको उनको आरोप थियो।

अहिलेको निर्वाचनमा दुईवटा गठबन्धन रहेको भन्दै प्रचण्डले सत्ता गठवन्धन पक्ष संविधानको रक्षा, स्थिरता र विकासको निम्ति भएको बताए । तर ओलीको नेतृत्वमा रहेको गठबन्धन राजावादी र राजतन्त्र फर्काउने चाहनेहरूको भएको उनले दाबी गरे।

‘देशको एकता खलबल पार्ने कुरा गर्छन्। उनीहरू दक्षिणपन्थी हुन्। संविधान मिच्ने र च्याप्ने कुरा गर्छन्’, उनले भने, ‘अनि फेरि भोट माग्न जनता कहाँ आउँछन्। त्यसरी आउनेलाई जनताले सोध्नुपर्छ –तपाईंहरूलाई भोट किन चाहियो, संविधान च्यात्न?’

जनताको सार्वभौम प्रतिनिधि सभा पटक–पटक विघटन गरियो, फेरि विघटन गर्न मत मागेको? भन्दै उनले प्रश्न गरे।
‘भ्रष्टाचार त गरियो, अझै धेरै भ्रष्टाचार गर्नुपर्ने भएकाले मत दिनुस् भनेको हो ओलीले?’, उनले भने, ‘यो जनताले उनीहरूलाई सोध्नुपर्ने प्रश्न हो। नैतिकताका आधारमा अब म राजनीतिमा रहन्न भन्नुपर्ने अवस्था ओलीको रहिसक्यो।’

ओलीको गोरुगाडा सिद्धान्त असफल भएको भन्दै प्रचण्डले एकचोटी कुनै जालझेल गरेर शक्तिमा पुगियो भने संविधान पनि च्यातच्युत, गणतन्त्र पनि उल्टयाउँछौं भन्ने पो हो कि? भनी प्रश्न गरे।

उनले मंसिर ४ गतेको निर्वाचनमा प्रतिगमनलाई परास्त गर्न सकिए मुलुक विकास र समृद्धिको दिशामा अघि बढने विश्वाससमेत व्यक्त गरे। उनले सत्तारुढ दलहरू प्रतिगामी शक्तिहरूलाई परास्त गरेर सम्पूर्ण शक्तिको साथ मुलुकको समृद्धिको अभियानमा लाग्न प्रतिबद्ध रहेको दाबी गरे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

मौसम बदली : बादलले ढाके पनि वर्षा कम, बुधबारदेखि सुधार हुने

पूर्वसांसद मिना गुरुङ पक्राउ

सहकारी ठगी प्रकरणमा प्रतिवादीहरूको बयान जारी