काठमाडौं– अष्ट्रेलियामा जारी टी–२० विश्वकपअन्तर्गत सुपर १२ को खेलमा भारतले बंगादेशमाथि रोमाञ्चक जित हासिल गरेको छ। लक्ष्य पछ्याउने क्रममा जितका लागि अन्तिम ओभरसम्म खेलेको बंगलादेश अन्ततः भारतसँग पराजित हुन पुग्यो।
पाँच रनको रोमाञ्चक जित हात पार्दै भारतले सेमिफाइनलमा पुग्ने सम्भावना बलियो बनाएको छ। वर्षाले प्रभावित खेलमा भारतले बुधबार बंगलादेशलाई डीएल पद्दतिका आधारमा हराएको हो ।
भारतले दिएको १ सय ५१ रनको लक्ष्य पछ्याएको बंगलादेशले निर्धारित १६ ओभरमा ६ विकेट गुमाएर १ सय ४५ रन मात्र बनाउन सक्यो। बंगलादेशले जवाफी ब्याटिङ गरिरहँदा वर्षाले प्रभावित गरेपछि खेल १६ ओभरमा झारिएको थियो । बंगलादेशले १६ ओभरमा नयाँ लक्ष्य पायो।
बंगलादेशका लिटोन दासले सबैभन्दा धेरै ६० रनको अर्धशतकीय इनिङ खेले। नाजमुल होसेनले २१ रन जोड्दा कप्तान शकिब अल हसनले १३ रन बनाए।
नुरुल हसन २५ तथा तास्किन अहमेद १२ रनमा अविजित रहे। भारतका अर्शदीप सिंह र हार्दिक पाण्ड्याले २÷२ विकेट लिए भने मोहमद शामीले १ विकेट लिए।
यसअघि पहिले ब्याटिङ गरेको भारतले २० ओभरमा ६ विकेट गुमाएर १ सय ८४ रन बनाएको थियो। भारतका लागि विराट कोहलीले अविजित रहँदै ६४ रनको अर्धशतकीय इनिङ खेले।
यस्तै, केएल राहुलले पनि ५० रनको अर्धशतकीय इनिङ खेले। यसैगरी, सूर्यकुमार यादवले ३० रन बनाए।
बंगलादेशका लागि हसन ममुदले ३ तथा शकिब अल हसनले २ विकेट लिएका थिए।
जितसँगै भारत समूह २ को शीर्ष स्थानमा उक्लिएको छ। उस ४ खेलमा ६ अंक जोडेको छ। पराजित बंगलादेशले ४ खेलमा ४ अंक जोडेर तेस्रो स्थानमा रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
