काठमाडौं– आइतबारदेखि सुरु भएको प्रधानमन्त्री कप एक दिवसीय राष्ट्रिय क्रिकेट प्रतियोगितामा विभागीय टोलीद्वय एपीएफ क्लब र नेपाल पुलिस क्लबले विजयी सुरुवात गरेका छन्।
त्रिभुवन विश्वविद्यालयको क्रिकेट मैदानमा आइतबार भएको खेलमा एपीएफले अर्को विभागीय टोली त्रिभुवन आर्मीमाथि ५६ रनको जित निकालेको हो। यस्तै, पुलिसले बागमती प्रदेशमाथि १९२ रनको फराकिलो जित निकाल्यो।
एपीएफले दिएको २२० रनको लक्ष्य पछ्याएको आर्मीले ३२.१ ओभरमा सबै विकेट गुमाएर मात्र १६३ रन बनाउन सक्यो। ओपनर हरि चौहान र रोहितकुमार पौडेलले अर्धशतकीय पारी खेलेको खेलमा अन्य ब्याट्सम्यानले दोहोरो अंकको स्कोर गर्न सकेनन्। चौहानले ६७ बलमा ७ चौका र १ छक्कासहित ६५ रन बनाए। यस्तै, पौडेलले ५९ बलमा ७ चौकासहित ५१ रन बनाए।
२ विकेट गुमाउँदा ४७ रन बनाएको आर्मीले तेस्रो विकेटसम्म १४२ रन बनाएको थियो। त्यसपछि मध्यक्रमका ब्याट्सम्यानले जमेर खेल्न सकेनन्। आर्मीविरुद्ध कसिलो बलिङ गर्ने क्रममा एपीएफका लागि अमर रौटेलालले ५.१ ओभरमा २० रन खर्चेर ४ विकेट लिए। यस्तै, कमलसिंह ऐरीले १० ओभरमा ५६ रन खर्चेर १ मेडनसहित ३ विकेट लिए भने किशोर महतोले ८ ओभरमा २९ रन खर्चेर २ विकेट लिए।
त्यसअघि टस जितेर पहिला ब्याटिङ गरेको एपीएफले ४७.४ ओभरमा सबै विकेट गुमाएर २ सय १९ रन जोडेको थियो। एपीएफका लागि ओपनर प्रदीप ऐरीले ८० बलमा ४ चौका र ६ छक्कासहित ७१ रन बनाएश्र अर्का ओपनर आशिफ शेख ९ रन बनाएर पेभेलियन फर्किएका थिए। लोकेश बम शून्यमा पेभेलियन फर्किएपछि भुवन कार्कीले २६ रन बनाएर आउट हुँदा पाँचौं नम्बरमा क्रिजमा उत्रिएका सन्दीप जोराले अर्धशतक बनाएका थिए।
एपीएफका लागि ६२ बलको सामना गरेका सन्दीपले ६ चौका प्रहार गरे। कप्तान शरद भेसावकर १६ रन बनाएर पेभेलियन फर्किंदा अमरसिंह रौटेला १० रनमा अविजित रहे।
आर्मीका विक्रम सोबले सर्वाधिक ४ विकेट लिए। विक्रमले ७.४ ओभरमा २३ रन खर्चिएका थिए। यस्तै, साहब आलम र कुशल मल्लले २/२ तथा सुशन भारी र जितेन्द्र मुखियाले १/१ विकेट निकाले।
आइतबार नै सम्पन्न अर्को खेलमा पुलिसले बागमतीलाई ९७ रनमा रोक्यो। २९० रनको लक्ष्य पछ्याएको बागमती २८ ओभरमै अलआउट भएको थियो।
मूलपानी क्रिकेट मैदानमा जवाफी ब्याटिङ गरेको बागमतीका लागि इशान पाण्डेले बनाएको २४ रन नै सर्वाधिक रह्यो। रामनरेश गिरीले २२ तथा प्रतिष जिसीले १४ रन बनाउँदा नन्दन यादव १० रनमा आउट हुँदा कप्तान ज्ञानेन्द्र मल्ल ४ रनमै पभेलियन फर्किए। पुलिसका दीपेन्द्र सिंह ऐरीले ३ विकेट लिए। करण केसी, गुलसन झा र सागर ढकालले २/२ विकेट लिए।
त्यसअघि टस हारेर पहिले ब्याटिङ गरेको पुलिसले ५० ओभरमा ५ विकेट गुमाएर २८९ रन बनाएको थियो। पुलिसका लागि दीपेन्द्र सिंह ऐरीले १०८ रनको शतकीय इनिङ खेले। उनले ८२ बलमा ११ चौका र ४ छक्का प्रहार गरे। यस्तै कुशल भुर्तेल र सुनिल धमलाले समान ३७ रन जोड्दा आरिफ शेखले ३६ रन बनाए। योगेन्द्र सिंह कार्की १६ रनमा आउट भए। पवन सर्राफ १५ रनमा अविजित रहँदा दिलीप नाथले अविजित १२ रन जोडे।
बागमतीका नन्दन यादवले २ विकेट लिए। रामनरेश गिरी, सूर्य तामाङ र सोनु देवकोटाले नाममा १/१ विकेट लिए।
जितसँगै समूह ‘बी’ मा रहेको पुलिसले पहिलो खेलमै २ अंक जोडेको छ।
प्रतियोगितामा सोमबार पनि दुई खेल हुनेछन्। कीर्तिपुरस्थित त्रिवि क्रिकेट मैदानमा सुदूरपश्चिम प्रदेश र गण्डकी प्रदेशबीच खेल हुनेछ भने मूलपानीमा नेपाल पुलिस र प्रदेश १ बीच प्रतिष्पर्धा हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
