पोखरा– नेपाल पुलिस क्लब र सशस्त्र प्रहरी बल एपीएफ क्लब नवौं राष्ट्रिय खेलकुद अन्तर्गत महिला क्रिकेटको फाइनलमा प्रवेश गरेका छन्।
सेमिफाइनलमा पुलिसले बागमती प्रदेशलाई र एपीएफले लुम्बिनी प्रदेशलाई पराजित गर्दै फाइनलमा प्रवेश गरेका हुन्।
पोखरा रंगशालामा सोमबार पहिलो सेमिफाइलनमा एपीएफले लुम्बिनी प्रदेशलाई ६७ रनले पराजित गर्यो। एपीएफले दिएको १ सय ३० रनको लक्ष्य पछ्याउने क्रममा लुम्बिनी प्रदेश १८ ओभर २ बलमा ६२ रनमा समेटियो।
लुम्बिनीकी सुस्मिता बजगाईंले सर्वाधिक १२ रन बनाइन्। एपीएफकी नेरी थापाले ४ ओभरमा ७ रन खर्चिएर ४ विकेट लिइन्। इन्दु बर्माले १ विकेट लिइन्।
त्यसअघि पहिले ब्याटिङ गरेको एपीएफले निर्धारित २० ओभरमा ३ विकेट गुमाउँदै १ सय २९ रन बनाएको थियो। एपीएफका लागि ओपनर ज्योति पाण्डे ६९ र रोमा थापा १२ रनमा नटआउट रहिन्।
प्लेयर अफ द म्याच समेत रहेकी ज्योतीले ६१ बलमा ७ चौका प्रहार गरिन्। टिमका लागि ममता चौधरीले १६ तथा कप्तान सीता रानामगरले ११ रन जोडिन्। लुम्बिनीका कृतिका मरासिनीले २ तथा मनिषा रानाले १ विकेट लिए।
दोस्रो सेमिफाइनलमा पुलिसले बागमती प्रदेशलाई ३६ रनले पराजित गर्यो। जितका लागि १ सय २४ रनको बलियो विजयी लक्ष्य पछ्याएको बागमतीले २० ओभरमा ८ विकेट गुमाउँदै ८७ रन बनायो। बागमतीका लागि सुमन खतिवडाले सर्वाधिक २३ र कप्तान अश्मिना कर्माचार्यले १८ रन बनाइन्। पुलिसकी कविता कुँवरले ३ विकेट, ईश्वरी विष्टले २ विकेट लिइन्। कप्तान रुविना र संगिता राईले १÷१ विकेट लिए।
त्यसअघि पोखरा रंगशालामा टस हारेर पहिला ब्याटिङ थालेको पुलिसले निर्धारित २० ओभरमा ४ विकेट गुमाउँदै १ सय २३ रन बनायो। पुलिसकी ओपनर काजल श्रेष्ठले ५१ बलमा ५ चौकासहित सर्वाधिक ४६ रन बनाइन्। पुलिस र एपीएफबीचको फाइनल खेल मंगलबार हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_k6NyB2pvBh-1772612065.jpg)
-1764146706.png)
