काठमाडौं– नाबालिग बलात्कार आरोपपछि ‘सम्पर्कविहीन’ भएका क्रिकेटर सन्दीप लामिछानेले बिहीबार नेपाल आएने जनाएपछि प्रहरी पर्खाइमा बसेको छ। उनी हवाईमार्ग भएर आउँछन् या स्थलमार्ग भनेर प्रहरी चनाखो बनेको छ।
सन्दीपले गत शनिबार सामाजिक सञ्जाल फेसबुकमा एक सन्देश लेख्दै आफू अक्टोबर ६ (असोज २०) गते नेपाल आउन लागेको जानकारी दिएका थिए। उनी साँच्चै बिहीबार नेपाल आउँछन् या त्यो जानकारी उनको 'चाल' मात्र हो भन्ने एकिन भइसकेको छैन।
लामिछानेले, उनकै शब्दमा, नेपाल आएर आफूविरुद्धको ‘झुठो आरोप’ को प्रतिवाद गर्ने बताएका छन्। उनले नेपालको न्याय प्रणालीमा विश्वास रहेको र आफू निर्दोष रहेको दावी गरेका छन्।
आफूले कुनै गल्ती नगरेको सन्दीपको भनाइ छ। आफूमाथि लगाइएका ‘गलत आरोप’का विषयमा समयक्रमसँगै रहस्य खुल्दै जानेमा विश्वस्त रहेको उनले बताए।
एक १७ वर्षीया बालिकालाइ बलात्कारको आरोप लागेसँगै सम्पर्कविहीन भएका लामिछानेविरुद्ध असोज १० गते 'डिफ्यूजन नोटिस' जारी भएको थियो।
लामिछानेविरुद्ध अन्तर्राष्ट्रिय प्रहरी संगठन इन्टरपोलले डिफ्यूजन नोटिस जारी गरेसँगै इन्टरपोल अन्तर्गतका देशहरूले आफ्नो देशमा खोजी थालेका थिए। इन्टरपोलमा १९५ देश आबद्ध छन्।
आफूलाई सन्दीपले काठमाडौंको एक होटलमा लगेर बलात्कार गरेको भन्दै १७ वर्षीया किशोरीले सन्दीपविरुद्ध प्रहरीमा जाहेरी दिएकी थिइन्।
त्यसपछि ‘सम्पर्कविहीन’ सन्दीप कुन देश छन् भन्ने खुलेको छैन। यता क्यानले भने उनीविरुद्ध जाहेरी परेपछि नेपाली राष्ट्रिय क्रिकेट टिमको कप्तानबाट निलम्बन गरिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1750489406.png)
-1749826086.png)
