दाङ– जिल्लाको शान्तिनगर गाउँपालिका–३ स्थित वीपी कोइराला माध्यामिक विद्यालय पातेटाकुराका एक शिक्षकले विद्यार्थीलाई निर्घात कुटपिट गरी घाइते बनाएका छन् ।
विद्यालयका शिक्षक उदयराज भण्डारीले कक्षा ९ मा अध्यनरत १५ वर्षका छात्र सुशील बुढाथोकीलाई निर्घात कुटपिट गर्दा उनको दाहिने हातकाे औला नै भाँचिएकाे छ । कुटपिटबाट शरीरमा निलडाम परेको र दुवै हात सुन्निएको छ।
शिक्षक भण्डारीले विद्यार्थीलाई कक्षा कोठाबाट बाहिर ल्याएर पाइपले प्रहार गर्दा छात्र बुढाथोकीको हातमा गहिराे चाेट लागेकाे हाे । चाेटका कारण हड्डी फुटेकाे छ। विद्यार्थीको दायाँ हात फ्याक्चर भएको अवस्था रहेको जिल्ला प्रहरी कार्यालय दाङका प्रवक्ता राजन कुमार गौतमले बताए ।
‘बाहिर ल्याएर गोरु चुटे जसरी पाइपको लठ्ठीले कुटेको देखेँ । अन्य सरहरुले यस्तो नगर्नुस सर भन्दा पनि मान्नुभएन । दया भएको मान्छेले यस्तो गर्नै सक्दैन ।’ एक शिक्षकले नाम नबताउने सर्तमा भने ।
यता आरोपी शिक्षक भण्डारीले कक्षा कोठामा विद्यार्थी आपसमा झगडा गरेपछि लाठीले हिर्काउँदा हातमा लागेर औला फ्याक्चर भएको प्रतिक्रिया दिएका छन् । ‘यो मिडियामा ल्याउने खालको छैन । सामान्य हो । आफैं औषधोपचार गर्न विद्यार्थीलाई ल्याएर हस्पिटल आएको छु’ उनका् भनाइ छ ।
घाइते छात्रा बुढाथोकीको फ्याक्चर भएको औंलाको अप्रेसनका लागि भोलि बिहीबार ७ बजेको समय तोकिएको बुझिएको छ । शिक्षकको कुटाइबाट घाइते बुढाथोकीलाई राप्ती प्रादेशिक अस्पतालबाट सिटी हस्पिटलमा लगिएको थियो ।
यता प्रहरीले पीडित बालकका अभिभावकले किटानी जाहेरी दिएमा मुद्दा चल्ने बताएको छ । प्रहरीमा जाहेरी नआएको तर जाहेरी आएमा शिक्षक भण्डारीलाई पक्राउ गरेर कारबाही प्रक्रिया अघि बढाउने दाङ प्रहरीले बताएको छ ।
विद्यार्थी कुटपिट गर्ने ४१ वर्षका शिक्षक उदयराज भण्डारी तुलसीपुर–१२ क्वाङीका हुन् । उनले विगत दुई वर्षदेखि कक्षा ९ देखि १२ कक्षासम्म पढाउँदै आएको विद्यालय प्रशासनले जनाएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
