काठमाडौं– नेपाल विद्युत् प्राधिकरणले ५१ स्थानमा विद्युतीय सवारी साधन चार्जिङ स्टेशन सञ्चालन गर्ने भएको छ। विद्युतीय सवारी चार्जिङ पूर्वाधार विकास आयोजनाअन्तर्गत अहिले सात प्रदेशका मुख्य राजमार्ग, बसपार्क र ठूला सहरहरुका ५१ स्थानमा विद्युतीय सवारी साधन छिट्टो चार्ज गर्न मिल्ने चार्जिङ स्टेशन निर्माण भइहेको छ।
त्यसमध्ये २६ वटा ठूला बस, माइक्रो, ट्रक, पिकअप तथा कार र २५ वटा साना/ठूला कारहरु चार्ज गर्न मिल्ने प्रधिकरणले जनाएको छ।
नेपाल प्रहरी र सशस्त्र प्रहरी बलद्वारा सञ्चालित तथा प्रस्तावित पेट्रोल पम्प र कार्यालयहरुका उपयुक्त स्थानमा चार्जिङ स्टेशन निर्माणका लागि समझदारीपत्रमा हस्ताक्षर गरिएको छ।
चार्ज गर्दा कारहरुमा औसत सत्तरी पैसा, एसयूभिहरुमा असी पैसा, माइक्रोबसमा नब्बे पैसा र बसहरुमा एक रुपैयाँ बीस पैसा प्रति किलोमिटर खर्च लाग्ने छ। नेपालमा उपलब्ध सवारी साधनहरुमा रहेको ब्याट्री क्षमता अनुसार कम्तिमा आधा घण्टादेखि १ घण्टासम्ममा चार्ज पूर्ण हुन सक्छ।
आन्तरिक रुपमा विद्युत्को खपत बढाउन, पेट्रोलियम पदार्थको खपत कम गरी आयात घटाउन र विद्युतीय सवारी साधन प्रयोगमार्फत् वातावरणमैत्री यातायात प्रणालीको विकासका चार्जिङ स्टेशन स्थापना गर्न लागिएको हो।
हरेक चार्जिङ स्टेशनमा १४२ किलोवाट क्षमताको चार्जर, त्यसमा विद्युत् आपूर्तिका लागि ५० केभीएको ट्रान्सफर्मर, अनलाइन विलिङ प्रणालीको जडान गरिएको छ। चार्जिङ स्टेशनमा छिटो चार्ज गर्न मिल्ने ६०/६० किलोवाटका डिसी र २२ किलोवाटका एसी चार्जरहरु राखिनेछन्।
यसबाट ठूला बससहित तीनवटा सवारी साधनले एक साथ चार्ज गर्न सक्नेछन्। चार्जिङ स्टेशन निर्माण आपूर्ति, जडान, परीक्षण,सञ्चालन र मर्मतसम्भारका लागि वाङवाङ डिजिटल इनर्जी कर्पोरेसन लिमिटेड, जियाङ्सु, चीनसँग ३७ करोड ७९ लाख ५५ हजार रुपैयाँमा (करबाहेक) ठेक्का सम्झौता भएको थियो।
एसियाली विकास बैकको सहयोगमा चार्जिङ स्टेशन निर्माण गरिएको हो। सञ्चालनमा आएको ५ वर्षसम्म चार्जिङ स्टेशनको मर्मत-सम्भार ठेकेदार कम्पनीले नै गर्ने छ। ३ सयभन्दा बढी चार्जरलाई सेवा दिन सक्ने गरी प्राधिकरणको डाटा सेन्टरमा चार्जिङ स्टेशनको सफ्टवेयर राखिनेछ।
५१ वटै स्टेशनको कन्ट्रोल काठमाडौंबाट हुनेछ। सवारी साधनको चार्ज गरिसकेपछि ग्राहकले क्यूआर कोड र मोबाइल एपमार्फत बिलको भुक्तानी गर्न सक्नेछन्।
यि हुन् चार्जिङ स्टेशन राखिने स्थान
सि .नं | चार्जर राख्ने स्थान | जिल्ला | जम्मा संख्या |
१ | विर्तामोड वसपार्क | झापा | २ |
२ | दमक चार्जिङ केन्द्र | झापा | २ |
३ | विराटनगर वसपार्क | मोरङ | १ |
४ | इनरुवा वसपार्क | सुनसरी | १ |
५ | वेलका चार्जिङ केन्द्र | उदयपुर | २ |
६ | प्रहरी कल्याण कोष पेट्रोल पम्प, कदमाहा | सप्तरि | २ |
७ | हरिऔन रिफ्रेस सेन्टर | सर्लाहि | १ |
८ | इलाका प्रहरी कार्यालय, निजगढ | वारा | २ |
९ | हेटौडा चार्चिङ सेन्टर, रातामाटे | मकवानपुर | २ |
१० | पारस वसपार्क | चितवन | २ |
११ | मुग्लिन पुल | चितवन | १ |
१२ | इलाका प्रहरी कार्यालय, खानीखोला | धादिङ | २ |
१३ | साझा सेवा, वल्खु | काठमाडौं | २ |
१४ | साझा यातायात | ललितपुर | २ |
१५ | साझा सेवा | वनेपा | २ |
१६ | नेपाल पुलिस क्लव | काठमाडौं | १ |
१७ | नेपाल विद्युत प्राधिकरण | काठमाडौं | १ |
१८ | लुम्विनी प्रदेश प्रहरी कार्यालय, वुटवल | रुपन्देही | २ |
१९ | इलाका प्रहरी कार्यालय, वर्दघाट | नवलपरासी | २ |
२० | भैरहवा वसपार्क | रुपन्देही | १ |
२१ | इलाका प्रहरी कार्यालय, गोरुसिँहे | कपिलवस्तु | २ |
२२ | लमही नयाँ वसपार्क | दाङ | २ |
२३ | नेपाल ए पि अफ स्कुल, कोहलपूर | वाके | २ |
२४ | सशस्त्र प्रहरी बल, वैद्यनाथ वाहिनी कैलाली | कैलाली | १ |
२५ | नयाँ वसपार्क, सुर्खेत | सुर्खेत | २ |
२६ | पर्यटक वसपार्क, पोखरा | कास्की | १ |
२७ | लेकसाइड | कास्की | १ |
२८ | वसपार्क र हावा घर | नुवाकोट | २ |
२९ | सिन्धुलीगढी वसपार्क | सिन्धुली | १ |
३० | खुर्कोट रिफ्रेस सेन्टर | सिन्धुली | २ |
३१ | इलाका प्रहरी कार्यालय, वर्दिवास | महोत्तरी | १ |
३२ | सशस्त्र प्रहरी वल, शैलेश्वरी | कन्चनपुर | १ |
जम्मा | ५१ | | |
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।