काठमाडौं– नेत्रबिक्रम चन्द (विप्लव) नेतृत्वको नेपाल कम्युनिस्ट पार्टीसहित ४ पार्टीले मंगलबारका लागि घोषणा गरेको नेपाल बन्दको प्रभाव देशभर नै सामान्य मात्रै परेको छ।
काठमाडौं उपत्यकमा न्यून प्रभाव देखिएको बन्दको तराईंका जिल्लामा भने सामान्य असर देखिएको छ। यस्तै, केही पहाडी जिल्लामा पनि बन्दकर्ताले सवारी साधनमाथि तोडफोड गर्ने प्रयास गरेपनि सुरक्षाकर्मीले नियन्त्रणमा लिएका छन्।
नेपाल बन्दका कारण सडक यातायातसँगै, उद्योग कलकारखाना, विद्यालय लगायतमा असर नपरेपनि केही ठाउँमा शंकास्पद वस्तु फेला पर्दा स्थानीय नागरिक त्रसित बनेका छन्।
प्रहरी प्रधान कार्यालयका अनुसार मंगलबार बिहान, कैलाली, बैतडी, रुपन्देही काभ्रे लगायत जिल्लाका केही ठाउँमा शंकास्पद वस्तु फेला परेको विवरण प्राप्त भएका छन्।
कैलाली अत्तरीया र काभ्रेको धुलिखेलमा भेटिएको शंकास्पद वस्तु नेपाली सेनाले निष्क्रिय पारिसकेको प्रहरी प्रधान कार्यालयले जानकारी दिएको छ। अन्य ठाउँमा पनि निष्क्रिय पार्ने काम भइरहेको प्रहरी प्रवक्ता प्रहरी नायव महानिरीक्षक टेक प्रसाद राईले जानकारी दिए।
हालसम्म फेला परेर डिस्पोज गरिएका शंकास्पद वस्तु ‘नक्कली बम’ भएको प्रहरीले जानकारी दिएको छ। आम सर्वसाधारणमा आतंक फैलाउन र त्रास सिर्जना गर्न बमजस्तो देखिने गरी बपडा बेरेर विभिन्न वस्तुहरु राखेको भेटिएको प्रहरीले जानकारी दिएको छ।
सरकारसँग भएको ३ बुँदै सम्झौताअनुसार आफ्नो पार्टीका नेता/कार्यकर्तामाथि लगाइएका मुद्दा फिर्ता, थुनाबाट मुक्त गर्नुपर्ने माग अगाडि सार्दै विप्लव नेतृत्वको नेकपाले मंगलबारका लागि देशव्यापी बन्दको घोषणा गरेको हो।
विप्लवको पार्टीले आह्वान गरेको बन्दलाई ऋषि कट्टेल नेतृत्वको नेपाल कम्युनिस्ट पार्टी, वैज्ञानिक समाजवादी कम्युनिस्ट पार्टी र नेकपा माओवादी समाजवादी पार्टीले समर्थन गरेका छन्। अमेरिकासँग गरिएको एमसीसी सम्झौता खारेज गर्नुपर्ने, महंगी नियन्त्रण गर्नुपर्ने लगायतका माग राखेर अन्य ३ पार्टीले बन्दमा समर्थन गरेका हुन्।
बन्दको घोषणापछि मंगलबार विहानैदेखि प्रहरीले सुरक्षा व्यवस्था कडा पारेको छ। काठमाडौं उपत्यकासहित देशभरकै प्रमुख सहर र राजमार्गमा सुरक्षा गस्ती बढाइएको प्रहरी प्रवक्ता राईको भनाइ छ।
अहिलेसम्म देशका विभिन्न ठाउँबाट गरी करिब ३५ जनाभन्दा बढी बन्दकर्ता पक्राउ परेका छन्। काठमाडौं उपत्यकाबाट मात्रै करिब १९ जना बन्दकर्ता पक्राउ परेका छन्।
यस्तै, दाङ, कैलाली, काभ्रे, रुपन्देही, डोटी लगायत जिल्लाबाट पनि बन्दकर्ताहरु पक्राउ परेका छन्।
केही ठाउँमा सार्वजनिक यातयातमाथि तोडफोड भएको छ भने दाङमा एउटा टिपरमाथि आगजनी भएको छ। दाङको घोराही उपमहानगरपालिका–३ बबइ पुल नजिकै रा १ ख १६९४ नम्बरको टिप्परमा आगलागी भएको जिल्ला प्रहरी कार्यालय दाङका प्रहरी प्रमुख सुरेशप्रसाद काफ्लेले जानकारी दिए।
मंगलबार बिहान ५ बजे आगलागी भएको घटना थाहा पाएर घटनास्थलमा पुगेको प्रहरीले टिप्पर चालकलाई नियन्त्रणमा लिएको छ। बन्द आह्वान गरेको पक्षले टिपरमा भएको आगजनीमा आफूहरुको संलग्नता नरहेको बताएपछि प्रहरीले चालकलाई नियन्त्रणमा लिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
