गुल्मी– गुल्मीको इस्मा गाउँपालिकामा एक सडकको निर्माण कार्य ठेक्का सम्झौता भएको ५ वर्ष बितिसक्दा पनि पूरा भएको छैन। आधा काम गरेर पेटी ठेकेदार हिँडेपछि उक्त सडक निर्माणको काम अलपत्र परेको छ।
विगत पाँच वर्षदेखि सुरु गरिएको इस्मा गाउँपालिकाको रातचौर–ताल्तुङ्ग–उजुङ्गडाँडा–हर्पुकोट हुँदै नयाँपोखरा–मैदान–कोटकटेरी सडक ग्राभेल गर्ने कार्य अलपत्र परेको हो।
सडक निर्माणको काम अलपत्र परे पनि मुख्य ठेकेदारले भने ९ करोडभन्दा बढी भुक्तानी लगिसकेको पाइएको छ। उक्त रकम पेटी ठेकेदारले नपाएपछि उनीहरु बीचैमा काम छाडेर हिँडेका छन्।
असारसम्म रातचौर–कोटकटेरी खण्डमा फाटफुट ग्राभेल गर्ने काम भए पनि त्यसयता काम ठप्प छ। पेटी ठेकेदारका रुपमा काम गर्दै आएका प्यूठानका वीरबहादुर थापा मुख्य ठेकेदारले रकम नदिएका कारण काम छाडेर हिँड्नुपरेको बताउँछन्।
रौताहा हरिहरि जेभी काठमाडौं नामक निर्माण कम्पनीका सञ्चालक गुल्मीकै सन्तोष भुसालले उक्त सडकमा ६२ प्रतिशत काम भएको प्राविधिक मूल्यांकन देखाई शिवपुरी सडक डिभिजन कार्यालय कपिलवस्तुबाट ९ करोड ३६ लाख २७९ रुपैयाँ ८८ पैसा रकम भुक्तानी लिइसकेको पूर्वाधार विकास कार्यालय गुल्मीले जनाएको छ।
गुल्मी तम्घासमा रहेको सडक पूर्वाधार विकास कार्यालयका प्रमुख सागर मरासिनिका अनुसार २०७४ साल साउन १९ गते तम्घास सिमलटारी प्यूठान सडक आयोजनाबाट उक्त सडकको १३ किलोमिटर चौडा पार्ने, ढल–नाली बनाउने, ग्राभेल गर्ने कार्यका लागि १३ करोड ५० लााख ९७ हजार १७० रुपैयाँ ९० पैसा लागतमा उक्त निर्माण कम्पनीका सञ्चालक सन्तोष भुसालले ठेक्का पाएका थिए।
उनले २०७७ साल फागुन २० गते उक्त काम सम्पन्न गरी बुझाउने सम्झौता भएको थियो। त्यतिबेला बुझाउन नसकेपछि दोस्रोपटक म्याद थप भयो। त्यस क्रममा तम्घास–सिमलटारी प्यूठान सडक आयोजना खारेज भयो र शिवपुरी सडक डिभिजन कार्यालय कपिलवस्तुलाई हस्तान्तरण गरियो। २०७८ पुस महिनादेखि उनका अनुसार त्यसविरुद्ध अख्तियार दुरुपयोग अनुसन्धान आयोगमा उजुरी परेपछि उक्त सडकको पुनः मूल्यांकन गर्न एक टोली आएर फर्किएको छ।
सडककै कारण बस्ती जोखिममा
सडक फराकिलो पार्ने काम सकियो। तर, पर्खाल र व्यवस्थित ढल–नाली नबनाउँदा कैयौं वस्ती उच्च जोखिमा परेका छन्। अहिले उक्त बाटो छेउका बस्तीका लागि जोखिमपूर्ण बनेको छ। पहिरो र भलका कारण उक्त बाटोमा मोटरसाइकलसमेत चल्न सक्दैनन्।
सडक निर्माणका बेला जथाभावी डोजर चलाएका कारण वडा नम्वर १ तोरीखर्क गाउँका मात्रै झण्डै एक दर्जन घर जोखिममा छन्। सडकबाट आएको पहिरोले कैयौंको आँगन भत्काएको छ भने कैयौंले घर नै छाडेका छन्। ‘बाटो बनेपछि ठूलो पर्खाल लगाएर घरको सुरक्षा गरिदिन्छम् भनेकाले हामीले डोजर लगाउन दियौं। तर पर्खाल थोरै लगाएर ठेकेदार नै भागे। कतिबेला पहिरो पस्छ र बगाउँछ भन्ने त्रासमै रात काट्नुपर्छ’, स्थानीय मैया कुँवरले भनिन्।
इस्मा गाउँपालिका–२ मा वडाध्यक्षका उमेदवार लोकनाथ आचार्यले उक्त सडकमा २३ करोड रकम संघीय सरकारबाट विनियोजित भएकोमा ठेकेदार सन्तोष भुसालले १३ करोडमा ठेक्का पारेको दाबी गरे। उनले वडा नम्बर २ का पनि एक दर्जन बढी घर जोखिममा परेको उनको भनाइ छ। घर मात्रै होइन, सडककै कारण सिँचाइ कुलो पनि अवरुद्ध भएको छ।
यता मुख्य ठेकेदार सन्तोष भुसालले भने पेटी ठेकेदार बीरबहादुर थापाले आफूबाट काम गरेकोभन्दा धेरै रकम लिएको दाबी गरेका छन्। असार मसान्तसम्म गरेको कामको रकम पनि सम्बन्धित निकायबाट आफूले भुक्तानी नपाएको उनको गुनासो छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
