काठमाडौं– तीनपिप्ले–बञ्चरेडाँडा सडक खण्डको बाटो निर्माणको ठेक्का पाएको शैलुङ कन्सट्रक्सनकाे ठेक्का रद्द भएको छ। जिल्ला अदालत ललितपुरले यसअघि भएको अन्तरिम आदेशलाई खारेज गर्दै उक्त कम्पनीसँगको सडक विभागले गरेको ठेक्का रद्द गर्ने निर्णयलाई सदर गरेको हो।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ का घरबेटी शारदा अधिकारीको कम्पनी शैलुङ्ग कन्सट्रक्सनसँगको ठेक्का सडक विभागले यसअघि नै रद्द गरिसकेको थियो। तर, कम्पनीले गत असार ८ गते ठेक्का रद्ध गर्ने सडक विभागको निर्णयविरुद्ध जिल्ला अदालत ललितपुरमा मुद्दा दायर गरेको थियो। उक्त मुद्दामा अदालतले शुरुमा अन्तरिम आदेश जारी गर्दै ठेक्का रद्द गर्ने निर्णय कार्यान्वयन नगर्न भनेको थियो।
मंगलबार ललितपुर जिल्ला अदालतकी न्यायाधीश सिता शर्मा अधिकारीको एकल इजालसले उक्त अन्तरिम आदेशलाई खारेज गर्दै सडक विभागले गरेको ठेक्का रद्द गर्ने निर्णयको पक्षमा आदेश दिएको छ। सडक विभागले अधिकारीको कम्पनीलाई ३ वर्षसम्म कालो सूचीमा राख्न पनि सिफारिस गरेको थियाे।
८ वर्षअघि भएको ठेक्कामा सडक विभागले पटक–पटक म्याद थप गर्दा पनि अधिकारीको कम्पनीले काम नगरेपछि गत चैतमा अन्तिम पटक थपिएको म्याद सकिएको थियो। कम्पनीलाई ७ पटकसम्म म्याद थप गर्दा पनि समयमा काम सम्पन्न भएको थिएन। अन्तिमपटक थपिएको म्याद गत चैतमा सकिएपछि सडक विभागले थप म्याद नथप्ने भन्दै गत असार ५ गते ठेक्का तोडेको थियो। तर, अधिकारीको कम्पनी ‘शैलुङ कन्सट्रक्सन’ ले जिल्ला अदालत ललितपुरमा सडक विभागविरुद्ध मुद्दा दायर गरेको थियो।
गत असार १५ गते दायर गरिएको उक्त मुद्दामा जारी अन्तरिम आदेश साेमबार खारेज भएको हो। यसअघि जारी गरिएको अन्तरिम आदेशलाई खारेज गर्दै अदालतले सडक विभागले कम्पनीसँग गरेको ठेक्का रद्दलाई सदर गरेको हो। अन्तरिम आदेश खारेजीपछि सडक विभागले कम्पनीसँग गरेको ठेक्का रद्द गरेर नयाँ ठेक्का गर्न खोजेको विषयलाई नै सदर भएकाे छ। अदालतले उनकाे पक्षमा आदेश नगरेपछि अधिकारीको कम्पनी ‘शैलुङ कन्सट्रक्सन’ लाई ३ वर्षसम्म कालो सूचीमा राख्नसमेत बाटाे खुलेकाे छ । अदालतकाे आदेशपछि तीनपिप्ले–वञ्चरेडाँडा सडकखण्ड निर्माण योजनाको योजना प्रमुख गौतम कुमार श्रेष्ठले कालाे सूचीमा राख्ने बाटाे खुलेकाे बताए।
शैलुङको बैगुन: ८ वर्षमा ५० प्रतिशत काम मात्रै, ७ पटक म्याद थप
हाल काठमाडौं महानगरपालिकाको फोहोर व्यवस्थापनको विषयमा सिसडोल तथा वञ्चरेडाँडा जाने सडकखण्ड नबनेका कारण निकै समस्या भइरहेको छ। हरेक वर्ष वर्षात्को समयमा यो सडकखण्डमा फोहोर बोकेका ट्रक हिँड्न नसक्ने अवस्था हुन्छ।
८ वर्षअघि आर्थिक वर्ष २०७१/०७२ मा सडक विभागमार्फत् यो सडक खण्डको निर्माणको जिम्मा शारदा अधिकारीको कम्पनीले पाएको थियो। सुरुवातमा २ वर्षको म्याद तोकेर निर्माणको काम पाएको उक्त कम्पनीले समयमा काम गर्न नसक्दा पटक–पटक म्याद थपिएको थियो।
सडक विभागअन्तर्गत उक्त सडकखण्ड निर्माण योजना प्रमुख गौतमकुमार श्रेष्ठका अनुसार कम्पनीलाई ७ पटकसम्म म्याद थप गरिएको थियो। ‘सुरुवातमा २ वर्ष समय तोकिएको थियो’, नेपाल लाइभसँग कुराकानी गर्दै उनले भने, ‘बीचमा भूकम्पले समस्या भयो । बीचमा जग्गाको विवाद आयो। के–के समस्या भयो। हामीले म्याद थपि रह्यौं। निरन्तर म्याद थप गर्दा पनि ७ पटकसम्म म्याद थप भएको थियो। त्यसपछि भने ठेक्का रद्द गरेका हौं।’
सडक निर्माण कार्य समयमा सम्पन्न नगर्दै गत चैतमा ७औं पटक थपिएको म्याद पनि सकिएको थियो। म्याद सकिएपछि विभागले ठेक्का रद्द गर्दा कम्पनीले भने अदालतमा मुद्दा हाल्दै ‘स्टे अर्डर’ को माग गरेको थियो ।
योजना प्रमुख श्रेष्ठकाअनुसार गत वर्ष चैतमा अन्तिमपटक थपिएको म्याद सकिँदा ५० प्रतिशत सडक निर्माण भएको अवस्था थियो। तर, हाल वर्षा र अन्य कारण निर्माणको प्रगति भने शून्यसरह रहेको छ। ८ वर्ष अघि ठेक्का लिएको उक्त कम्पनीलाई पटक–पटक सडक विभागले समयमा नै काम सक्न ताकेता गरे पनि कम्पनीले भने काम गरेको थिएन।
कुल २५ किलोमिटर लम्बाइ रहेको यो सडकखण्डमा ८ किलोमिटर सडक उपत्यकाबाट फोहोर फ्यांक्न जाने गाडी कुद्ने बाटो थियो। सडक विभागले ३१ करोड लागतमा शैलुङ्ग कन्सट्रक्सनलाई निर्माणको जिम्मा दिएको थियो।
ललितपुर जिल्ला अदालतले शैलुङ्गको पक्षमा जारी अन्तरिम आदेश खारेज गरेसँग अब सडक निर्माणका लागि नयाँ ठेक्काको बाटो समेत खुलेको छ। सार्वजनिक टेण्डर आह्वान गरेर नयाँ कम्पनीलाई ठेक्का दिइने योजनाका प्रमुख श्रेष्ठले बताए।
सडक विभागले निर्माण कम्पनीसँग १ करोड ५५ लाख रुपैयाँ जरिवाना असुल गर्ने निर्णय समेत गरेको थियो। अदालतको आदेशपछि जरिवाना असुल गर्ने बाटो पनि खुलेको योजना प्रमुख श्रेष्ठको भनाइ छ।
अदालतको आदेशपछि प्रचण्डमाथि बालेन्द्रको कटाक्ष
काठमाडौं महानगरपालिकाका मेयर बालेन्द्र शाहको सचिवालयका एक सदस्यका अनुसार सो सडकखण्डकै कारण पनि फोहोर व्यवस्थापनमा समस्या भइरहेको छ। मेयर बालेन्द्र शाह स्वयंले पनि समय समयमा सडकको अवस्थाका कारण फोहोर व्यवस्थापनमा समस्या भएको बताउँदै आएका थिए।
मंगलबार अदालतको आदेश आएसँगै शाहले सामाजिक सञ्जालमार्फत् नेकपा माओवादी केन्द्रका अध्यक्ष प्रचण्डलाई कटाक्ष गरेका छन्। सो सडक खण्डको दूरावस्था देखाउने भिडियो क्लिप सामाजिक सञ्जालमा राख्दै बालेनले लेखेका छन्, ‘श्रीमान् प्रचण्डज्यु! उपत्यकाको फोहोर लैजान प्रयोग गरिने ककनीको बाटो विगत ८ वर्षदेखि यस्तो हालतमा बनाउने मान्छेको घरमै अंगरक्षक जस्तो बसेर कुन नैतिकताले भन्नु म देश बनाउँदै छु भनेर?’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
