काठमाडौं– नवनियुक्त मुख्य प्रशिक्षक मनोज प्रभाकरले नेपाली राष्ट्रिय क्रिकेट टोलीको प्रमुख समस्या ब्याटिङमा रहेको स्वीकार गर्दै सुधार गर्ने प्रतिबद्धता जनाएका छन्।
मनोज शनिबार मात्र नेपाल आएका हुन्। नेपाल आएको भोलिपल्ट सञ्चारकर्मीहरुसँग कुरा गर्दै मनोजले नेपाली ब्याट्सम्यानमा टेक्निकको अभाव देखेको बताए। उनले यसमा सुधार गर्ने आफूसँग योजना रहेको बताउँदै समय दिन अनुरोध गरे।
‘मैले आज सबै ब्याट्सम्यानहरूसँग भेटेँ। उनीहरूले इन्डियन प्रिमियर लिग (आईपीएल) हेरेका छन् र हार्ड हिटिङ (छक्का) प्रहार गर्न खोज्छन्। तर, त्यो सही टेक्निकमा देखिँदैन। म उनीहरूलाई सही टेक्निकमा ब्याटिङ गर्न सिकाउँछु। तर, मलाई २/३ महिना समय चाहिन्छ,’ उनले भने।
मनोजले सही टेक्निक प्रयोग जुन सुकै फर्म्याटमा जुन सुकै बेला रन बनाउन सकिने पनि बताए। टी-२० मा पावर आवश्यक नरहेकोसमेत उनको भनाइ थियो।
‘केएल राहुलले सही टेक्निकका साथ खेलेको र १०० रन बनाएको मैले देखेको छु। विराट कोहलीले टेक्निक प्रयोग गर्छन् र शतक बनाउँछन्। टी-२० मा पावर गेम खेल्नु पर्दैन। अहिले नेपाली ब्याट्सम्यानहरुमा त्यही अभाव देखेको छु,’ उनले भने।
मुख्य प्रशिक्षक पुबुदु दासानायकेले साउन ४ गते राजीनामा दिएपछि नेपाल क्रिकेट संघ (क्यान)ले मनोजलाई नियुक्त गरेको हो। क्यानले उनीसँग एक वर्षको सम्झौता गरेको छ।
नेपालको मुख्य प्रशिक्षकका रुपमा मनोजको पहिलो प्रतियोगिता केन्याविरुद्धको रहने छ। नेपाली टोली भदौ पहिलो साता केन्या भ्रमणमा निस्कने छ।
केन्यामा रहँदा नेपालले ५ खेलको टी-२० सिरिज खेल्नेछ। नेपालको ३ खेलको ५० ओभरको सिरिज पनि रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
