काठमाडौं– न्यूजिल्यान्डका पूर्वब्याट्सम्यान रोस टेलरले इन्डियन प्रिमियर लिग (आईपीएल)को फ्रेन्चाइजी टोली राजस्थान रोयल्सका एक टिम मालिकले आफूलाई ‘थप्पड’ हानेको आरोप लगाएका छन्। टेलरका अनुसार सन् २०११ को सिजनमा उक्त घटना भएको हो।
आफ्नो आत्मकथा ‘रस टेलर: ब्ल्याक एन्ड ह्वाइट’मा लेख्दै टेलरले किंग्स इलेभेन पञ्जाबसँग आफ्नो टोलीले हार बेहोरेपछि आफूलाई थप्पड हानेको आरोप लगाएका हुन्।
टेलरले लेखेका छन्, ‘हामीले १९५ रनको लक्ष्य पाएका थियौं। म शून्य रनमा आउट भएँ। हाम्रो टोलीले यो खेलमा लज्जास्पद हार बेहोरेको थियो। हारपछि एक टोली मालिकले तँलाई शून्यमा आउट हुन करोडौं रुपैयाँ दिएको हो? भन्दै मेरो गालामा तीन–चार पटक थप्पड हाने। उनी हाँसेका पनि थिए। थप्पड त्यति जोडदार थिएन। म यसलाई मुद्दा बनाउन चाहन्नँ, तर मेरो लागि यो धेरै अप्रत्याशित थियो।’
राजस्थान रोयल्सले टेलरको आरोपबारे कुनै प्रतिक्रिया दिएको छैन। टेलरले २०११ मा राजस्थानका लागि १२ खेल खेलेका थिए। ११९ को स्ट्राइक रेटमा उनले १८१ रन बनाएका थिए। त्यसपछि उनले अर्को सिजन दिल्ली डेयरडेभिल्सबाट खेले।
टेलरले यस पुस्तकमा न्यूजिल्यान्ड क्रिकेटमा व्याप्त नस्लवादको मुद्दा पनि उठाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768049575.png)
-1764146706.png)
