काठमाडौं– व्यस्तताका कारण एकदिवसीय अन्तर्राष्ट्रिय क्रिकेटको भविष्यप्रति चिन्ता व्यक्त गर्ने मोइन अली अर्को अन्तर्राष्ट्रिय खेलाडी बनेका छन्।
हालैका समयमा जोस बटलर, जो रूट र बेन स्टोक्स जस्ता मोइनका धेरै सहकर्मीहरूले यस विषयमा बोलेका छन्। आफ्नो तालिका अनुसार इङ्ल्यान्डले २५ दिनमा भारत र दक्षिण अफ्रिकासँग क्रमशः १२ सीमित ओभरका खेल खेलेको थियो।
‘द हन्ड्रेड’ क्रिकेट प्रतियोगितामा आफ्नो टोली बर्मिङ्घम फिनिक्सको पहिलो खेलअघि एक प्रायोजकको कार्यक्रममा मोइनले भने, ‘तालिका एकदमै टाइट छ। फ्रेन्चाइजी क्रिकेट खेल्न चाहनुहुन्छ भने तपाईंले एकदिवसीय खेल मिस गर्नुपर्ने हुन्छ।’
उनले थपे,‘यो लामो बोरिंग ढाँचा हो। दुई वर्षपछि हामीले एकदिवसीय क्रिकेट गुमाउनेछौं भन्ने डर मलाई लाग्छ। टी–२० ले यसको स्थान लिने छ। यसका अलवा टेस्ट क्रिकेट छ, जुन उत्कृष्ट छ। यी दुईबीच ५० ओभरको क्रिकेटले कुनै महत्त्व पाउँदैन। एक अर्थमा यो खेलको लागि राम्रो छ, तर यसले अन्तर्राष्ट्रिय क्रिकेट रोक्नु हुँदैन।’
स्टोक्सले भर्खरै टेस्ट र टी–२० क्रिकेटलाई निरन्तरता दिन एकदिवसीयबाट सन्यास लिएका थिए। आफ्नो स्वास्थ्यलाई ध्यानमा राखेर अरू धेरै खेलाडीले यस्तो कदम चाल्न सक्ने मोइन बताउँछन्। उनले आफैंले २०२१ मा टेस्ट क्रिकेटबाट सन्यासको घोषणा गरेका थिए। तर, यो जुनमा भने उनी पुन: टेस्ट क्रिकेट खेल्न इच्छुक छन्।
मोइनले भने,‘सबैभन्दा राम्रो विकल्प भनेको तीनवटै ढाँचामा अन्तर्राष्ट्रिय क्रिकेट खेल्नु हो। तर, आजकल यति धेरै खेलहरू भइरहेका छन् कि खेलाडीहरूले एउटै फर्म्याटबाट सन्यास लिइरहेका छन्। जबसम्म कार्यक्रमहरू यस्तै चलिरहन्छ तबसम्म यस्तै हुनेछ।’
मोइन आफैं अहिले कुनै पनि फर्म्याटमा इङ्ग्ल्यान्डका लागि खेल गुमाउन चाहँदैनन्। ३५ वर्षीय मोइनलाई पाकिस्तानमा हुने टेस्ट सिरिजका लागि टोलीमा समावेश गर्ने सम्भावना छ। तर, उनले युवा खेलाडीलाई क्रिकेटमा प्रवेश दिन एक या दुई ढाँचा खेल्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
