काठमाडौं– वेस्ट इन्डिजमा जारी भ्रमणमा भारतीय ब्याट्सम्यान सूर्यकुमार यादवले पहिलो पटक टी–२० खेलमा ओपनिङ गरेका छन्।
पहिलो दुई खेलमा २४ र ११ रन मात्र बनाएका उनले सेन्ट किट्समा मंगलबार भएको तेस्रो खेलमा भारतले ७ विकेटको जित निकाल्दा ८ चौका र ४ छक्कासहित ७६ रनको योगदान दिएका थिए।
उनको भर्खरैको फर्मलाई हेर्दा केएल राहुल भारतीय टोलीमा फर्किँदा प्लेइङ इलेवनमा स्थान बनाउन गाह्रो हुने आंकलन गरिएको छ। न्यूजिल्यान्डका पूर्वअलराउन्डर स्कट स्टाइरिसले पनि यो कुरा नकार्न सक्दैन।
सूर्यकुमारको मैदानको वरिपरि सटहरू प्रहार गर्ने क्षमताले उनलाई ‘अद्वितीय’ ब्याट्सम्यान बनाएको भन्दै उनले सिनियर खेलाडीहरूका लागि स्थान बनाउन गाह्रो हुने बताउँछन्।
स्टाइरिसले भने, ‘धेरै राम्रा खेलाडीहरू जुनसुकै ठाउँमा पन खेल्छन्। मलाई अचम्म लाग्दैन कि उसले ओपनिङमा पनि प्रभाव पारेको छ। म यस्तो संकटलाई ईर्ष्याका साथ हेर्छु। हुनसक्छ जब सिनियर खेलाडी फर्किन्छन्, उसले चौथो नम्बरमा खेल्नुपर्नेछ।’
स्टाइरिसले राहुल र विराट कोहलीजस्ता ब्याट्सम्यानलाई औंल्याएका थिए। कोहलीलाई यो भ्रमणका लागि आराम दिइएको छ र राहुल चोटबाट निको भएर टोलीमा फर्कने तयारीमा थिए।
तर, सुरूमा कोरोना संक्रमणका कारण एकदिवसीय सिरिजको टोली छाड्नुपरेको थियो। उनी आफ्नो चोटबाट पूर्णरूपमा निको हुन नसकेकाले जिम्बाब्वेमा हुने आगामी एकदिवसीय सिरिजका लागि भारतीय टोलीमा नरहने बताइएको छ।
भारतका लागि उनले टी–२० ढाँचामा ४०.६८ को औसत, १४२.४९ को स्ट्राइक रेट र दुई शतक र १६ अर्धशतकको सहयोगमा ५६ खेलमा १८३१ रन बनाएका छन्। राहुल सामान्यतया कप्तान रोहित शर्मासँग ओपनिङ जोडीको हिस्सा बन्छन्।
उनले फेब्रूअरी २०२१ मा वेस्ट इन्डिजविरूद्धको एकदिवसीय खेलपछि भारतका लागि कुनै खेल खेलेका छैनन्। उनको अनुपस्थितिमा भारतका लागि इशान किशन, ऋतुराज गायकवाड, ऋषभ पन्त र सूर्यकुमारले ओपनिङ गरेका थिए। पन्तले वेस्ट इन्डिजअघि इङ्ल्यान्डमा खेलेको सिरिजमा रोहितसँग ओपनिङ गरेका थिए।
इङ्ल्यान्डमा भएको अन्तिम टी–२० खेलमा सूर्यकुमारले उत्कृष्ट इनिङ्स खेल्दै चौथो नम्बरमा ११७ रन बनाएका थिए। ‘उसले जहाँ पनि बल प्रहार गर्न सक्छ। यो विपक्षी टोलीका लागि यो निकै कठिन चुनौती हो। उनीसँग फास्ट बलरहरूविरूद्ध एक्स्ट्रा कभरदेखि फाइन लेगसम्मको विकल्प छ,’ स्टाइरिस भन्छन्,‘राहुल चोटका कारण टोलीबाट बाहिर छन्, सूर्यकुमार र पन्त धेरै रन बनाएर अगाडि आउँदैछन्। त्यसैले छनोटकर्ताहरूले राहुलको आवश्यकता छ कि छैन? भनेर सोच्ने छन्।’
सूर्यकुमारले यस साताको अन्त्यमा फ्लोरिडामा आफ्नो दाबी सिमित गर्न थप दुई मौका पाउनेछन्। भारतले अहिले सिरिजमा २–१ को अग्रता बनाएको छ। यदि सूर्यकुमारले ओपनरका रूपमा थप दुई ठूला योगदान दिन सके भने एसिया कपमा भारतको ब्याटिङ लाइनअपको रूपरेखामा राम्रो विवाद हुन सक्छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
