काठमाडौं– १५ महिनाअघि उद्घाटन भएको धरहरा पटक पटक निर्माणका लागि समय थपिँदा पनि सम्पन्न हुन हुन सकेको छैन। धरहराको काम अझैं २५ प्रतिशत रहेको छ। पटक पटक गरि हाल असोज मसान्तसम्म म्याद थपिएको धरहरा निर्माण सम्पन्न हुन अझैं २५ प्रतिशत काम बाँकी रहेको हो।
विसं २०७५ मा सरकारले रमन कन्स्ट्रक्सनलाई निर्माणको जिम्मा दिएको धरहरा काम हालसम्म ७५ प्रतिशत सकिएको शहरी विकास मन्त्रालयको भवन विभागअन्तर्गतको केन्द्रिय आयोजना कार्यानवयन इकाई (भवन तथा आवास)का प्रमुख कोषनाथ अधिकारीले बताए। उनका अनुसार पछिल्लो पटक चैत ३० मा सकिएको धरहरा निर्माणको म्याद काम नसकिएकाले असोज मसान्तसम्मलाई थपिएको हो।
अधिकारीका अनुसार धरहराको भवन निर्माणका लागि असोज मसान्तसम्मको म्याद थपिएको छ। त्यस्तै, धरहराको पछिल्तिरको भागको निर्माणका लागि पुस मसान्तसम्मको म्याद तोकिएको छ। अधिकारीले भने, ‘पछिल्लो पटक म्याद सकिएपछि धरहरा अगाडि र पछाडिको भाग निर्माणका लागि असोज र पुससम्मको म्याद तोकिएको छ।’
१५ महिनाअघि नै भएको थियो उद्घाटन
तत्कालीन प्रधानमन्त्री केपी शर्मा ओलीले निर्माण सम्पन्न नहुँदै १५ महिनाअघि नै धरहराको उद्घाटन गरेका थिए। उनले गत वर्ष वैशाख ११ गते उद्घाटन गरेको धरहराको त्यो बेला ६० प्रतिशत मात्रै काम सम्पन्न भएको थियो।
त्यसयता थप प्रगतिका रुपमा धरहरामा १५ प्रतिशत काम बढेर हालसम्म ७५ प्रतिशत काम भएको छ।
२०७२ को भूकम्पमा क्षतिग्रस्त धरहराको पुनर्निमाणका लागि तत्कालीन प्रधानमन्त्री ओलीले सोही वर्ष ‘मेरो धरहरा म बनाउँछु’ अभियान घोषणा गरेका थिए। २०७३ असार २९ गते मन्त्रिपरिषद्को बैठकले राष्ट्रिय पुनर्निर्माण प्राधिकरण र पुरातत्व विभागसँगको समन्वयमा धरहरा निर्माणको प्रक्रियालाई अघि बढाएको थियो। प्राधिकरणले धरहरा निर्माणको जिम्मा पाएपछि २०७५ पुस १२ गते तत्कालिन प्रधानमन्त्री ओलीले यसको शिलान्यास गरेका थिए।
सोही वर्षबाट काम सुरु भएको धरहरा निर्माणको कामका लागि निर्माण अवधि २०७७ कात्तिक मसान्तसम्मको समय तोकिएको थियो। निर्माणको जिम्मा लिएको कम्पनी रमन कन्स्ट्रक्सनले कोरोना महामारीलगायतका कारणले काम ढिलो भएको बताएपछि प्राधिकरणले ठेक्का अवधिलाई ६/६ महिना गरेर दुई पटकसम्म लम्ब्याएको थियो। जसअनुसार २०७८ चैत ३० सम्म निर्माण सम्पन्न गर्नुपर्ने भएको थियो।
तर, तोकिएको सो अवधिमा पनि काम नसकिएपछि गत चैतमा रमन कन्स्ट्रक्सनले धरहरा निर्माणको जिम्मेवारी पाएको शहरी विकास मन्त्रालय अन्तर्गतको भवन विभागको केन्द्रीय आयोजना कार्यान्वयन इकाई (भवन तथा आवास)मा म्याद थप्न निवेदन दिएको थियो।
कम्पनीले कोरोना महामारी लगायतका कारणले निर्माणको काममा ढिलाई भएको भन्दै थप डेढ वर्षसम्म समय माग गरेको थियो। सरकारले समन्वयन नगरेका कारण निर्माणको काम ढिलो सुरु भएको र ठेक्का सम्झौतापछि पनि सरकारले समयमा नै काम थाल्ने वातावरण नबनाईदिँदा समयमा काम सम्पन्न नभएको रमन कन्स्ट्रक्सनका धरहरा निर्माण प्रोजेक्ट म्यानेजर सञ्जय नकर्मीले बताएका थिए।
तर, कम्पनीले थप डेढ वर्ष समय माग गरेपछि सरकारले भने आगामी असोजसम्मको म्याद तोकिदिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
