काठमाडौं- मुख्य प्रशिक्षकबाट राजीनामा दिएका पुबुदु दासानायकेले नेपाली क्रिकेट टोलीले सम्भावना बोकेको बताएका छन्। दासानायकेले शुक्रबार सामाजिक सञ्जालमार्फत् नेपाली क्रिकेटको भविष्यबारे टिप्पणी गरेका हुन्।
नेपाली क्रिकेटको मुख्य प्रशिक्षकबाट राजीनामा दिए लगत्तै क्यानाडा क्रिकेट टोलीका प्रशिक्षक नियुक्त भएका दासानायकेले नेपाली टोलीका कप्तान सन्दीप लामिछानेमा कुशल नेतृत्वक्षमता भएको बताए। ‘नेपाली क्रिकेट युवा कप्तान सन्दीप लामिछानेको कुशल नेतृत्वमा छ। सन्दीप र टिमका सदस्यहरू आकाशजत्तिकै अनन्त सम्भावना बोकेका खेलाडी हुन्। त्यसैले नेपाली टिमको भविष्य उज्ज्वल छ,’ उनले लेखेका छन्।
दासानायकेले आफू नेपाली क्रिकेटको हिस्सा हुन पाउँदा धन्य भएको उल्लेख गर्दै आलोचनाले भोलिका दिनमा राम्रो गर्न प्रेरण दिएको बताएका छन्। ‘आलोचनाहरूले मलाई भोलिको दिनमा राम्रो गर्न प्रेरणा दिन्छ। त्यसैले राम्रो र खराब दुवै समयमा साथ दिने सबैलाई धन्यवाद,’ उनले लेखेका छन्।
नेपाली राष्ट्रिय क्रिकेट टोलीको मुख्य प्रशिक्षक पदबाट दासानायकेले बुधबार राजीनामा दिएका थिए। लगत्तै उनी क्यानडाको राष्ट्रिय क्रिकेट टोलीको मुख्य प्रशिक्षकमा नियुक्त भएका थिए।
क्रिकेट वर्ल्डकप लिग-२ खेलिरहेको नेपालले एकदिवसीय अन्तर्राष्ट्रिय (ओडीआई) मान्यता जोगाउन मुस्किल परेपछि पुबुदु दबाबमा थिए। पछिल्लो पटक अमेरिका, क्यानडा र स्कटल्यान्डमा नेपाली राष्ट्रिय क्रिकेट टोलीले राम्रो प्रदर्शन गर्न सकेको थिएन। त्यसअघि क्रिकेट वर्ल्डकप लिग-२ अन्तर्गत अमेरिका भ्रमणमा पनि नेपालले गतिलो प्रदर्शन गरेको थिएन।
अमेरिकामा नेपालले ओमानसँग एक खेल जितेको थियो भने अमेरिकासँग एउटा खेल टाइ भएको थियो। बाँकी दुई खेलमा नेपाल पराजित भएको थियो। त्यसपछि क्यानडासँगको एउटा एकदिवसीयमा खेलमा पनि नेपाल पराजित भएको थियो।
क्यानडाबाट लिग-२ अन्तर्गत त्रिकोणात्मक सिरिज खेल्न स्कटल्यान्ड गएको नेपालको लक्ष्य कम्तीमा तीन खेल जितेर लिगको पाँचौँ स्थान बलियो बनाउने थियो। तर, तीन खेलमा हारेर नेपाल छैटौँ स्थानमा नै यथावत् रहेपछि ओडीआई मान्यता जोगाउन मुस्किल बनेको छ। सात देश सम्मिलित लिग-२ मा पुछारका दुई टिमले ओडीआई मान्यता गुमाउँछन्।
पुबुदुले गएको मंसिरमा नेपाल नेपाल क्रिकेट संघ (क्यान)सँग दुई वर्षे सम्झौता गर्दा ओडीआई मान्यता जोगाउने पहिलो लक्ष्य भएको बताएका थिए। तर, पछिल्लो समय नेपालको प्रदर्शन निरन्तर खस्किँदा उनी संकटमा परेका थिए। उनको दोस्रो कार्यकालमा नेपालले लिग-२ अन्तर्गत यूएई, अमेरिका र स्कटल्यान्ड भ्रमण गरी १२ खेल खेलेको थियो। त्यसमा नेपालले चार जित, एउटा बराबरी खेल्दा सात वटामा हार बेहोरेको छ।
पुबुदुले पहिलोपल्ट सन् २०११ देखि २०१५ सम्म नेपाल टिमको प्रशिक्षण सम्हालेका थिए। त्यस समयमा नेपालले आईसीसी विश्व क्रिकेट लिग डिभिजन ४ देखि १ सम्मको यात्रा गरेको थियो। सन् २०१४ मा बंगलादेशमा आयोजित टी–२० विश्वकपमा उनले छनोट गराएका थिए।
नेपालले सन् २०१८ मा ओडीआई मान्यता पाउँदा त्यसको जग बसाउने श्रेय उनैलाई दिइएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
