काठमाडौं– भारतीय ब्याट्सम्यान श्रेयस अय्यरले सर्ट बलमा आफ्नो कमजोरी सुधार्न नसके अन्य खेलाडीका लागि ठाउँ खाली गर्नुपर्ने न्यूजिल्यान्डका पूर्वअलराउन्डर स्कट स्टाइरिसले बताएका छन्। उनले श्रेयसको विकल्प दीपक हुड्डा हुने बताएका छन्।
स्पोर्ट्स १८ को टक शो ‘स्पोर्ट्स ओभर द टप’मा बोल्दै स्टाइरिसले भने,‘श्रेयस उत्कृष्ट खेलाडी हुन् र उनीसँग नेतृत्व गर्ने क्षमता पनि छ। उनी भविष्यमा भारतको कप्तान पनि बन्न सक्छन्। त्यसैले खराब फर्मका बाबजुद पनि म उनलाई साथ दिनेछु। साथै म उनलाई अतिरिक्त मौका दिन चाहन्छु। तर, यसका लागि उसले जतिसक्दो चाँडो आफ्ना कमजोरीहरू हटाउनु पर्छ।’
२०२१ श्रेयसका लागि निकै राम्रो वर्ष रह्यो। उनले सीमित ओभरमा उत्कृष्ट प्रदर्शन गर्दै टेस्ट टोलीमा स्थान बनाएका थिए भने डेब्यू खेलमा शतक प्रहार गर्दै ‘प्लेयर अफ द म्याच’को उपाधि जितेका थिए। त्यसपछि यस्तो लाग्थ्यो कि श्रेयस टिम इन्डियाका सीमित खेलाडीमध्ये एक हुन्, जसको तीनवटै ढाँचामा स्थान सुरक्षित छ।
उनका लागि २०२२ को सुरुआत पनि राम्रो रह्यो। फेब्रुअरी २०२२ मा श्रीलंकाविरुद्धको तीन खेलको टी–२० आई सिरिजका सबै खेलहरूमा अर्धशतक बनाएर उनी ‘प्लेयर अफ द सिरिज’ बने। यसपछि श्रीलंकाविरुद्धको बैंग्लोर टेस्टमा दुवै इनिङ्समा ९२ र ६७ रन बनाएर उनी ‘प्लेयर अफ द म्याच’ बनेका थिए।
उनले इन्डियन प्रिमियर लिग (आईपीएल) २०२२ मा पनि राम्रो प्रदर्शन गरे र १४ इनिङ्समा तीन अर्धशतक र १३४.५ को स्ट्राइक रेटमा ३०.९ को औसतमा ४०१ रन बनाए। तर, त्यसपछि उनको प्रदर्शनमा लगातार गिरावट आएको छ।
आईपीएल २०२२ देखि उनले ६ टी–२० आई इनिङ्समा मात्र २४ को औसतमा १२२ रन बनाएका छन्, जसमा एउटा पनि अर्धशतक समावेश छैन। त्यस्तै, इंग्ल्यान्डविरुद्धको बर्मिङ्घम टेस्टमा पनि उनले खेल्ने अवसर पाए, जहाँ पनि उनले निराश बनाए। यस क्रममा उनी सर्ट बलले निकै समस्यामा परेका छन्।
स्टाइरिसले थपे,‘श्रेयसलाई सर्ट डेलिभरिमा समस्या छ भन्ने कुरा गोप्य छैन। अहिले धेरैजसो टोलीले उनको विरुद्धमा सर्ट बलको रणनीति अपनाइरहेका छन् र उनको शरीरलाई निशाना बनाएर बाउन्सरहरू फ्याँकिरहेका छन्। सुरेश रैनाको कुरा पनि त्यस्तै छ। यो पहिले श्रेयसको विरूद्ध थियो। अब यो कमजोरीलाई कसरी पार गर्ने हो भन्ने कुरा उनकै हातमा छ। उसको अथाह प्रतिभालाई हेरेर म उसलाई थप मौका दिन चाहन्छु। यद्यपि, उसले पनि जतिसक्दो चाँडो सम्बोधन गर्ने बाटो आफैं खोज्नुपर्छ। अन्यथा त्यहाँ खेलाडीहरू छन्, जो टोलीको वरिपरि घुमिरहेका छन्।’
स्टाइरिसले श्रेयसको स्थानमा दीपक हुड्डाको नाम सिफारिस गरेका थिए। स्टाइरिस भन्छन्,‘दीपकले एउटा ढाँचामा धेरै अवसर पाएका छन् र त्यसको सदुपयोग गरिरहेका छन्। अब अन्य ढाँचामा पनि कस्तो प्रदर्शन गर्छ भनेर हेर्नको लागि उनलाई मौका दिनुपर्छ, यो भारतीय क्रिकेटको सार हो। सबैभन्दा राम्रो पक्ष यो भारतीय टोलीसँग ठूलो समूह छ। अहिले भारतले आफ्ना सिनियर खेलाडीहरूलाई नियमित आराम दिइरहेको छ र यसले अन्तर्राष्ट्रिय स्तरमा युवा र प्रतिभाशाली खेलाडीहरूलाई अवसर प्रदान गरिरहेको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
