काठमाडौं– नेपाली राष्ट्रिय क्रिकेट टोलीका प्रशिक्षक पुबुदु दासानायकेले पदबाट राजीनामा दिएका छन्। क्यानडा र स्कटल्यान्ड भ्रमणबाट नेपाली टोली फर्किएलगत्तै पुबुदुले राजीनामा दिएको जानकारी दिएका हुन्।
पुबदुले एक साताअघि नै मेलमार्फत क्यानलाई राजीनामा पत्र पठाएका थिए। उनले व्यक्तिगत कारणले टिम छाडेको राजीनमामा उल्लेख गरेका छन्। एक साताअघि राजीनामा दिए पनि उनले बुधबार मात्र पत्रकार सम्मेलन गरेर त्यसबारे जानकारी दिएका हुन्।
पत्रकार सम्मेलनमा पनि उनले परिवारलाई समय दिन क्यानडा फर्किनु परेकाले राजीनामा दिएको बताए। उनले भने, 'मैले व्यक्तिगत कारणले राजीनामा दिएको हुँ। क्यानडामा परिवारलाई समय दिन आवश्यक छ। अबका केही वर्ष मैले क्यानडाबाहिर काम गर्न सक्ने अवस्था छैन।'
क्रिकेट वर्ल्डकप लिग-२ खेलिरहेको नेपालले एक दिवसीय अन्तर्राष्ट्रिय (ओडीआई) मान्यता जोगाउन मुस्किल परेपछि पुबुदु दबाबमा थिए। पछिल्लो पटक अमेरिका, क्यानडा र स्कटल्यान्डमा नेपाली राष्ट्रिय क्रिकेट टोलीले राम्रो प्रदर्शन गर्न सकेको थिएन। त्यसअघि क्रिकेट वर्ल्डकप लिग-२ अन्तर्गत अमेरिका भ्रमणमा पनि नेपालले गतिलो प्रदर्शन गरेको थिएन।
अमेरिकामा नेपालले ओमानसँग एक खेल जितेको थियो भने अमेरिकासँग एउटा खेल टाइ भएको थियो। बाँकी दुई खेलमा नेपाल पराजित भएको थियो। त्यसपछि क्यानडासँगको एउटा एक दिवसीयमा पनि नेपाल पराजित भएको थियो।
क्यानडाबाट लिग-२ अन्तर्गत त्रिकोणात्मक श्रृङ्खला खेल्न स्कटल्यान्ड गएको नेपालको लक्ष्य कम्तीमा तीन खेल जितेर लिगको पाँचौँ स्थान बलियो बनाउने थियो। तर, तीन खेलमा हारेर नेपाल छैटौँ स्थानमा नै यथावत् रहेपछि ओडीआई मान्यता जोगाउन मुस्किल बनेको छ। सात देश सम्मिलित लिग-२ मा पुछारका दुई टिमले ओडीआई मान्यता गुमाउँछन्।
पुबुदुले गएको मंसिरमा नेपाल नेपाल क्रिकेट संघ (क्यान)सँग दुई वर्षे सम्झौता गर्दा ओडीआई मान्यता जोगाउने पहिलो लक्ष्य भएको बताएका थिए। तर, पछिल्लो समय नेपालको प्रदर्शन निरन्तर खस्किँदा उनी संकटमा परेका थिए। उनको दोस्रो कार्यकालमा नेपालले लिग-२ अन्तर्गत यूएई, अमेरिका र स्कटल्यान्ड भ्रमण गरी १२ खेल खेलेको थियो। त्यसमा नेपालले चार जित, एउटा बराबरी खेल्दा सात वटामा हार बेहोरेको छ।
पुबुदुले पहिलोपल्ट सन् २०११ देखि २०१५ सम्म नेपाल टिमको प्रशिक्षण संहालेका थिए। त्यस समयमा नेपालले आईसीसी विश्व क्रिकेट लिग डिभिजन ४ देखि १ सम्मको यात्रा गरेको थियो। सन् २०१४ मा बंगलादेशमा आयोजित टी–२० विश्वकपमा उनले छनौट गराएका थिए।
नेपालले सन् २०१८ मा ओडीआई मान्यता पाउँदा त्यसको जग बसाउने श्रेय उनैलाई दिइएको थियो। पुबुदु अगाडि छोटो समयका लागि नेपाली टिम सम्हालेका डेभ ह्वाटमोरले नेपालको ब्याटिङ समस्यालाई केही हदसम्म समाधान गरेका थिए। तर, पुबुदु आएपछि त्यो समस्या फेरि बल्झिएको छ।
गत मंसिर अन्तिममा पुबुदुले पद सम्हाल्दा खेलाडी र क्यानबीच विवाद थियो। खेलाडी पनि विभाजनको अवस्थामा थिए।
क्यानले कप्तान ज्ञानेन्द्र मल्ल र उपकप्तान दीपेन्द्रसिंह ऐरीसहित चार खेलाडीलाई अनुशासनको कारबाही गरेको थियो। यसबाट खेलाडीमा फुट आएको थियो। पछि मल्ललाई क्यानले टिमबाटै हटायो। त्यसलगत्तैका श्रृङ्खलामा नेपालले लगातार कमजोर प्रदर्शन गरेको छ।
तर, पत्रकार सम्मेलनमा भने पुबुदुले अहिलेको नेपाली टिम उत्कृष्ट भएको बताए। उनले विवादकै कारण प्रदर्शन खस्किएको संकेत पनि गरे। पुबुदुले विवादहरू नहुने हो भने राम्रो प्रदर्शन गर्न सक्ने बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
