काठमाडौं– वेस्ट इन्डिज भ्रमणका लागि भारतीय टोलीको घोषणा भएको छ। टोलीको कमान्ड शिखर धवनलाई सुम्पिएको छ।
तर, विराट कोहली, रोहित शर्मा, केएल राहुल, जसप्रित बुमराह, ऋषभ पन्त र मोहम्मद शामीजस्ता सिनियर खेलाडीलाई आराम दिइएको छ।
इंग्ल्यान्डविरुद्धको तीन एकदिवसीय र तीन टी–२० सिरिजपछि भारतीय टोली वेस्ट इन्डिजको भ्रमणमा जान लागेको हो। भ्रमण २२ जुलाईबाट सुरु हुनेछ।
भारतीय टोलीले वेस्ट इन्डिजमा तीन एकदिवसीय र पाँच टी–२० खेलको सिरिज खेल्ने छ। टी–२० सिरिजका लागि टिम छनोट भएको छैन।
यसैबीच, कप्तान रोहित शर्माबाहेक भारतको सीमित ओभरको टोली साउथह्याम्पटन पुगेको छ। भारतले इंग्ल्यान्ड भ्रमणको आफ्नो सीमित ओभरको सिरिज बिहीबार (जुलाई ७) पहिलो टी–२० खेलबाट सुरु गर्नेछ।
भीभीएस लक्ष्मणले पहिलो टी–२० खेलमा भारतीय टोलीको प्रशिक्षकको भूमिका निर्वाह गर्ने सम्भावना छ। यस खेलमा राहुल द्रविड टोलीसँग नहुने भएका छन्।
भारतले एजब्यास्टन टेस्टको दुई दिनपछि मात्रै पहिलो टी–२० खेल्न लागेको हो। विराट कोहली र जसप्रित बुमराहले पनि इंग्ल्यान्डविरुद्धको पहिलो टी–२० खेल खेल्ने छैनन्।
वेस्ट इन्डिज सिरिजका दुई टी–२० खेल अमेरिकाको फ्लोरिडामा खेलाइँदैछन्। यी दुवै खेल अगस्ट ६ र ७ मा हुनेछन्। बिहीबार सार्वजनिक गरिएको तालिका अनुसार भारतीय टोलीले जुलाई २२ देखि अगस्ट ७ सम्म वेस्ट इन्डिज र अमेरिकाको भ्रमण गर्नेछ।
त्यहाँ पहिलो तीन एकदिवसीय खेल २२ देखि २७ जुलाई सम्म हुनेछ। त्यसपछि २९ जुलाईदेखि ७ अगस्टसम्म पाँचवटा टी–२० खेल हुनेछन्।
भारतीय टोली:
शिखर धवन (कप्तान), रविन्द्र जडेजा (उपकप्तान), ऋतुराज गायकवाड, शुभमन गिल, दीपक हुडा, सूर्यकुमार यादव, श्रेयस अय्यर, इशान किशन (विकेटकिपर), सञ्जु सैमसन (विकेटकिपर), शार्दुल ठाकुर, युजवेन्द्र चहल, अक्षर पटेल, आवेश खान, प्रसिद्ध कृष्ण, मोहम्मद सिराज, अर्शदीप सिंह।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
