काठमाडौं– सामाजिक सञ्जालमा निकै ‘ट्रोल’ हुने गरेका प्रशिक्षकमध्ये एक हुन् रवि शास्त्री। उनलाई सामाजिक सञ्जालमा ‘ट्रोल’ गर्दै भनिन्थ्यो– रक्सी र पार्टी कल्चर प्रवर्द्धन गर्नेलाई प्रशिक्षकको जिम्मेवारी दिए भारतीय टोलीले कसरी जित्ला? तर, अहिले शास्त्री भारतीय टोलीको प्रशिक्षक छैनन्।
उनको स्थानमा राहुल द्रविड उभिएका छन्। कल्पना गर्नुहोस् त, यदि शास्त्रीको प्रशिक्षणमा भारतीय क्रिकेट टोलीले इंग्ल्यान्डमा जस्तै लज्जास्पद हार बेहोरेको भए के हुन्थ्यो? पक्कै पनि उनीमाथि ट्रोलको वर्षा।
एक वर्षअघि शास्त्री प्रशिक्षक हुँदा भारतीय टोली इंग्ल्यान्ड भ्रमणमा निस्किएको थियो। चार टेस्ट खेलपछि भारत सिरिजमा २–१ ले अगाडि थियो। कोरोना महामारीले भारतीय टोलीलाई नरोकेको भए सायद सिरिज पनि जित्ने थियो।
१० महिनापछि द्रविड टोलीको प्रशिक्षक भए। उनी प्रशिक्षक भएसँगै भारतले १५ वर्षपछि इंग्ल्यान्डमा टेस्ट सिरिज जित्ने मौका गुमायो। द्रविडले प्रशिक्षकको जिम्मेवारी सम्हालेयता भारतीय टोलीले हात पारेको यो पहिलो असफलता भने होइन।
द्रविडको प्रशिक्षणमा रहेको भारतीय टोलीलाई पहिलो झट्का दक्षिण अफ्रिका भ्रमणमा लागेको थियो। दक्षिण अफ्रिकी भ्रमणमा गएको भारतीय टोली कागजमा निकै बलियो देखिन्थ्यो।
जुन मैदानमा पनि देखियो। टेस्ट सिरिजमा भारतले राम्रो सुरुआत गरेको थियो। सेन्चुरियनमा भएको पहिलो खेलमा भारत विजयी भयो।
सेन्चुरियनमा एसियाली टोलीले टेस्ट जितेको यो पहिलो पटक थियो। साथै, दक्षिण अफ्रिकी टोलीले सन् २०१४ पछि यस मैदानमा टेस्ट म्याच हार बेहोरेको पनि पहिलो पटक!
यसका बाबजुद दक्षिण अफ्रिकाले अर्को दुई खेलमा सानदार पुनरागमन गर्दै सिरिज २–१ ले जित्यो। यो सिरिजपछि विराट कोहलीले टेस्ट टोलीको कप्तानी छोड्ने घोषणा गरे।
टेस्ट सिरिजमा द्रविडको प्रशिक्षण निकै सामान्य देखियो। टोली व्यवस्थापनका केही निर्णयहरू थिए, जुन कसैले बुझेनन्। चेतेश्वर पुजारा र अजिंक्य रहाणे लगातार ‘फ्लप’ भए पनि टोलीमा अवसर पाइरहेका थिए।
पूरै टोली खेलमाभन्दा पनि विपक्षीसँग लड्नमा केन्द्रित थियो। द्रविडको प्रशिक्षणमा भारतीय टोली हार्ने क्रम यहीँ रोकिएन। दक्षिण अफ्रिकासँगको एकदिवसीय सिरिजमा पनि भारत पराजित भयो। तीन खेलको सिरिजमा भारतीय टोलीले एक खेल पनि जित्न सकेन।
इंग्ल्यान्डविरुद्ध खराब रणनीति
बर्मिङ्घम टेस्टमा भारतीय टोली‘फिल्ड प्लेसमेन्ट’ बुझ्नै नसकिने देखिन्थ्यो। जोनी बेयरस्टो र जो रुट ब्याटिङ गरिरहेका बेला इंग्ल्यान्डका प्रशिक्षक ब्रेन्डम म्याकुलमले लगातार ‘ड्रेसिङ रुम’बाट राम्ररी खेल्न संकेत गरिरहेका थिए। तर, द्रविड मौन देखिए।
‘स्लिप’मा फिल्डिङ गरिरहेका चेतेश्वर पुजाराको औंलामा चोट लागेपछि हनुमा विहारीलाई उनको ठाउँमा उभ्याइएको थियो। विहारी स्लिपमा उभ्याइनुपर्ने खालका फिल्डर होइनन्। बेयरस्टोले प्रहार गरेको बल क्याच छोडेपछि उनले यसको प्रमाण पनि दिए।
शुभमन गिल, श्रेयस अय्यरजस्ता खेलाडीले स्लिपमा राम्रो फिल्डिङ गर्दै आएका छन्। यसका बाबजुद विहारीलाई उनीहरुको स्थानमा राखिएको थियो।
यससँगै जब भारतीय बलरले बलिङ गरिरहेका थिए, मैदान पूरै खुला देखिन्थ्यो। ब्याट्सम्यानहरू रन बनाइरहेका थिए र खेल भारतीय टोलीको हातबाट गुम्दै गएको थियो। तीन दिनको खेलमा अग्रता लिए पनि भारतले हार बेहोर्न बाध्य भयो। प्रशिक्षक द्रविड मूक दर्शक बने।
विराटको युगमा सफल
शास्त्री–विराटको युगमा भारतीय टोलीले विदेशी भूमिमा टेस्टमा उत्कृष्ट प्रदर्शन गरेको थियो। अस्ट्रेलियालाई हराएर भारतीय टोलीले सिरिज कब्जा पनि गरेको थियो। योसँगै इंग्ल्यान्ड भ्रमणमा पाँच टेस्ट सिरिजमा भारत २–१ ले अगाडि थियो। भारतीय टोली विश्व टेस्ट च्याम्पियनसिपको फाइनलमा पनि पुगेको थियो।
शास्त्रीको प्रशिक्षणमा भारतीय टोलीले ४३ टेस्टमध्ये २५ जितेको छ। योसँगै एकदिवसीयमा ७६ मध्ये ५१ जित हासिल गरेको छ। त्यस्तै, टी–२० मा भारतले ६० मध्ये ४० खेल जितेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
