काठमाडौं– नेपाल क्रिकेट संघ (क्यान)का अध्यक्ष चतुरबहादुर चन्दले दुईवटा मैदान नहुँदासम्म अन्तर्राष्ट्रिय क्रिकेट परिषद् (आईसीसी)को प्रतियोगिता गर्न नसक्ने बताएका छन्।
नेपाल भ्रमणमा रहेको आईसीसी प्रतिनिधि मण्डले शनिबार सञ्चारकर्मीसँग गरेको अन्तरक्रिया कार्यक्रममा उनले कीर्तिपुरस्थित टीयू क्रिकेट मैदानले मात्रै अन्तर्राष्ट्रिय प्रतियोगिता धान्न नसक्ने बताएका हुन्।
‘हामीसँग एकै मैदान छ। त्यसैमा सबै प्रतियोगिता गरिरहेका छौं। तर, आईसीसीको प्रतियोगिता गर्न यही एक मैदान मात्रै पर्याप्त हुँदैन। हामीलाई दुई मैदान नहुनसम्म आईसीसीको प्रतियोगिता सञ्चालन गर्न गाह्रो छ’, चन्दले भने।
राष्ट्रिय खेलकुद परिषद् (राखेप) सदस्य सचिव टंकलाल घिसिङ र खेलकुदमन्त्री महेश्वरजंग गहतराजसँग पूर्वाधारको विषयमा छलफल गरेको पनि जानकारी दिए।
‘हामी नेतृत्वमा आएको केही दिनमै आईसीसीले निलम्बन फुकुवा गर्यो। तर, आर्थिक रुपमा पूर्ण रुपमा निलम्बन फुकुवा गरेन। हामीले प्राप्त गर्ने अनुदानलाई आईसीसीले सीमित मात्रमा पठाएको थियो। यो २०१४ देखि नै गरेको थियो। अहिले स्वतन्त्र रुपमा क्रिकेटलाई कसरी विकास गर्न सकिन्छ भनेर संघले निर्णय गर्ने अवस्थामा पुगेको छ,’ अध्यक्ष चन्दले भने।
यता, आईसीसीले नेपाली क्रिकेट विकास लागि सँधै सहयोग गर्न तयार रहेको प्रतिबद्धता जनाएको छ।
आईसीसीले क्यानको आर्थिक नियन्त्रण पूर्ण रुपमा हटाएसँगै सम्पूर्ण निलम्बन फुकुवा भएको पनि उल्लेख गरेको छ। छलफलमा आईसीसीका प्रतिनिधि इमरान ख्वाजाले नेपालमाथि लगाएको आंशिक आर्थिक नियन्त्रण फुकुवा भएको औपचारिक जानकारी गराएका थिए।
‘नयाँ कमिटिसँग हामीलेसँगै काम गर्यौं। वर्तमान समयमा क्यानको व्यवस्थापन फ्रोफेसनल आर्थिक रुपमा हामी सन्तुष्ट छौं। त्यसैले क्यान पूर्णरुपमा निलम्बन फुकवा भएको छ,’ आईसीसीका उपाध्यक्ष ख्वाजाले भने।
खेलकुदमन्त्री गहतराजसँगको भेटमा मैदान विकासको लागि छलफल गरेको पनि उनले जानकारी दिए। उनले थपे, ‘हामीले खेलकुदमन्त्रीसँग भेटेका थियौं। त्यसमा मैदान विकासको लागि छलफल भएको थियो। किनभने अन्तर्राष्ट्रिय प्रतियोगिता गर्ने नेपालको उच्च सम्भावना छ।’
राजनीतिक हस्तक्षेप र आर्थिक पारदर्शिता कायम नभएको भन्दै आईसीसीले सन् २०१६ अप्रिलमा क्यानलाई निलम्बन गरेको थियो। यद्यपि, नेपालले अन्तर्राष्ट्रिय प्रतियोगितामा भने सहभागिता जनाउँदै आएको थियो।
२०७६ असोजमा सम्पन्न विशेष साधारण सभामार्फत् चन्दको नेतृत्वमा नयाँ कार्यसमिति गठन भएको थियो।
त्यसपश्चात आईसीसीले क्यानमाथि लगाएको निलम्बन सर्त राख्दै फुकूवा गरेको थियो। आईसीसीले क्यानको आर्थिक गतिविधिमा नियन्त्रण गरेकाले आर्थिक मामिलामा आईसीसीको भर पर्नुपर्ने अवस्था नेपाली क्रिकेटमा थियो।
अब भने आर्थिक गतिविधिसहितको सबै निलम्बन हटेको र क्यानले आफ्नो योजना स्वतन्त तरिकाले अगाडि बढाउन पाउने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
