काठमाडौं– हङकङलाई पराजित गर्दै घरेलु टोली मलेसिया एसीसी महिला टी–२० च्याम्पियनसिपको फाइनलमा पुगेको छ।
शुक्रबार भएको दोस्रो सेमिफाइनल खेलमा हङकङलाई १२ रनले पराजित गर्दै मलेसिया उपाधिनजिक पुगेको हो। योसँगै उपाधिका लागि मलेसिया र युएई भिड्ने भएका छन्। यी दुवै टोलीले एसिया कपमा स्थान बनाएका छन्।
जितको लागि ८७ रनको विजयी लक्ष्य पछ्याएको हङकङले निर्धारित ११ ओभरमा ८ विकेट गुमाउँदै ७४ रन बनायो। वर्षाका कारण खेल ११–११ ओभरमा झारिएको थियो।
हङकङकी कर्या चानले सर्वाधिक १९ रन बनाइन्। उनले १० बलमा ३ चौका प्रहार गरिन्। मारिको हिल ९ बलमा १ चौकासहित १२ रनमा आउट भइन्।
यस्मिन दस्वानी १० र नताशा मिल्स ८ रनमा आउट भइन्। मलेसियाकी सषा अज्मी र निक नुरले २/२ विकेट लिइन्।
त्यसअघि किनरारा एकेडेमी ओभलमा टस हारेर पहिला ब्याटिङ गर्दै मलेसियाले निर्धारित ११ ओभरमा ४ विकेट गुमाउँदै ८६ रन बनाएको थियो। मलेसियाकी मास एलिसाले सर्वाधिक ३३ रनमा अविजित रहिन्। उनले २४ बलमा २ चौका र १ छक्का प्रहार गरिन्।
विनिफ्रेड दुराईसिंघमले २१ बलमा ३ चौकासहित २६ रन बनाइन्। वान जुलिया र ईशा हुन्टरले १०/१० रन बनाइन्। हङकङकी मर्याम विबीले २ विकेट लिइन्।
पहिलो सेमिफाइनलमा भने युएई समूह विजेताको रुपमा फाइनलमा पुग्यो। किनरारा ओभलमा टस हारेर ब्याटिङ थालेको युएई १९.५ ओभरमा ८१ रनमा अलआउट भएको थियो।
तर, वर्षाका कारण दोस्रो इनिङ्स हुन नसक्दा युएई समूह विजेताको रुपमा फाइनलमा पुगेको हो। युएई समूह ‘ए’ को विजेता र मलेसिया उपविजेता हुन्। नेपाल समूह ‘बी’ को उपविजेता र हङकङ समूह विजेता रुपमा सेमिफाइनल खेलेका थिए।
युएईका लागि वैष्णवी महेशले सर्वाधिक १६ रन बनाइन्। उनले ११ बलमा एक चौका प्रहार गरिन्। यता, इशा रोहितले २१ बलमा २ चौकासहित १५ रन बनाइन्।
कप्तान छाया मुघलले १९ बलमा १ चौकासहित १४ रन जोडिन्। यस्तै, खुसी शर्माले १९ बलमा १२ रनमा बनाएर विकेट गुमाइन्। युएईका आधा दर्जन ब्याटरले भने नेपालविरुद्ध दोहोरो अंकमा रन बनाउन सकेनन्।
नेपालकी अस्मिना कर्माचार्यले सर्वाधिक ५ विकेट लिइन्। उनले ३.५ ओभर बलिङ गर्दै १० रन दिएकी थिइन्। यस्तै, उपकप्तान इन्दु वर्माले ४ ओभर बलिङ गर्दै १६ रन खर्चिएर ३ विकेट लिइन्। सीता रानाले २ विकेट हात पारिन्। उनले ४ ओभरमा १९ रन खर्चिइन्।
कप्तान रुविना क्षेत्री बेलबासे, संगीता राई र कविता कुँवर भने विकेटविहीन रहिन्। मलेसिया र युएईबीचको फाइनल शनिबार हुनेछ। एसिया कपमा भारत, पाकिस्तान, श्रीलंका, बंगलादेश, थाइल्यान्ड, मलेसिया र युएई हुनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
