काठमाडौं- २०२१ को टी–२० विश्वकपमा खराब प्रदर्शन गरेपछि हार्दिक पाण्ड्यालाई भारतीय टोलीबाट हटाइयो। त्यसपछि उनी इन्डियन प्रिमियर लिग (आईपीएल) २०२२ मा गुजरात टाइटन्सको कप्तान बने र उनले उपाधिसमेत दिलाए।
हार्दिकले टिमको कप्तानी गर्दा बल र ब्याटिङमा उत्कृष्ट प्रदर्शन गरेका थिए। त्यसैकारण भारतीय टोलीमा उनले सानदार पुनरागमन गरे। उनी दक्षिण अफ्रिकाविरूद्धको सिरिजका लागि भारतीय टोलीमा फर्किएका थिए। र, उपकप्तानको पनि जिम्मेवारी पाए। अब हार्दिकले आयरल्यान्ड भ्रमणमा भारतीय टोलीको कमाण्ड सम्हाल्ने छन्।
भारतीय टोलीको कप्तान बन्ने भएपछि हार्दिकले यो आफ्नो लागि गर्वको कुरा भएको बताएका छन्। तर, ७ महिनाअघिसम्म कसैले पनि उनी भारतीय टोलीको कप्तान बन्नेछन् भन्ने सोचेका थिएनन्।
दक्षिण अफ्रिका विरूद्धको चौथो टी–२० खेलअघि हार्दिकलाई भारतीय टोलीको कप्तान चुनिएपछि कस्तो महसुस भइरहेको छ भनेर सञ्चारकर्मीहरुले प्रश्न सोधेका थिए।
यसमा उनले भने, ‘यस सिरिज सुरू हुनुअघि नै मलाई थाहा थियो कि म अर्को सिरिजमा कप्तान बन्ने छु। देशको प्रतिनिधित्व गर्नु सधैं गर्वको कुरा हो। सात महिनाअघि कसले सोचेको थियो? तपाईंको जीवन परिवर्तन हुन सक्छ। यदि तपाइँ आफ्नो दिमाग ठीक राख्नुहुन्छ र कडा परिश्रम गरिरहनु हुन्छ भने सबै कुरा सम्भव छ।’
यस क्रममा हार्दिकलाई फिनिशर र बलरको भूमिकाबारे पनि प्रश्न गरिएको थियो। यसमा उनले भने, ‘यो पक्कै पनि आवश्यक छ, जब मेरो टोलीलाई आवश्यक हुन्छ। म दुई ओभर बलिङ गर्न तयार हुनेछु। मैले कहाँ ब्याटिङ गर्छु र के गर्छु भन्ने कुरा महत्त्तवपूर्ण होइन। मैदानमा आउने सबै परिस्थितिको मजा लिनु महत्त्वपूर्ण कुरा हो। मैले जस्तोसुकै चुनौती सामना गरे पनि म त्यसलाई आनन्द लिन्छु।’
आईपीएल २०२२ हार्दिकका लागि उत्कृष्ट रह्यो। आफ्नो कप्तानी क्षमता देखाउनुबाहेक हार्दिकले बल र ब्याटमा पनि टोलीका लागि महत्त्वपूर्ण योगदान दिए। उनले यस प्रतियोगितामा ४ सय ८७ रन बनाएका थिए भने ८ विकेट पनि लिए।
त्यसपछि उनले दक्षिण अफ्रिकाविरूद्धको टी–२० सिरिजमा पनि ब्याटिङबाट उत्कृष्ट प्रदर्शन गरेका छन्। हार्दिकले यो सिरिजमा ५८.५० को औसत र १५३.९५ को स्ट्राइक रेटमा १ सय १७ रन बनाएका छन्। यो सिरिजमा रन बनाउने हिसाबले उनी तेस्रो नम्बरमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
