काठमाडौं–बलियो नेपाल कप अन्डर १५ क्रिकेट प्रतियोगिताको सेमिफाईनल समीकरण पूरा भएको छ। बलियो नेपाल न्युट्रिसन इनिसिएटिभको आयोजना तथा क्विन्स इभेन्ट मेनेजमेन्टको व्यवस्थापनमा जारी प्रतियोगितामा प्रदेश १, लुम्बिनी, मधेश र बागमती प्रदेशले अन्तिम ४ मा आफ्नो स्थान पक्का गरेका छन्।
समूह चरणअन्तर्गतको अन्तिम खेलमा लुम्बिनीलाई ५ विकेटले हराउँदै प्रदेश १ समूह ए को विजेताको रुपमा सेमिफाइनलमा प्रवेश गरेको छ। शुक्रबार मूलपानी मैदानमा सम्पन्न पहिलो खेलमा प्रदेश १ ले लुम्बिनीविरुद्ध रोमाञ्चक जित दर्ता गर्यो। ओसिलो मैदानका कारण १६ ओभरमा छोट्याइएको खेलमा टस जितेर ब्याटिङ गर्दै लुम्बिनीले ७ विकेटको क्षतिमा १०९ रन जोडेको थियो। उसका लागि सन्तोष साउदले सर्वाधिक ३८ तथा रौनक श्रीवास्तवले १४ रनको योगदान गरे। प्रदेश १ का रुशल रिमालले ४ ओभरमा ११ रन खर्चिएर ३ विकेट आफ्नो नाम गरे।
जवाफमा ११० रनको विजयी लक्ष्य लिएर मैदान उत्रिएको प्रदेश १ ले एक बल बाँकी रहँदा ५ विकेट गुमाउँदै लक्ष्य पुरा गर्यो। प्रदेश १ लाई अन्तिम दुई बलमा ३ रन आवश्यक रहँदा बाई स्वरुप ४ रन प्राप्त गरेपछि प्रदेश १ को जित सम्भव बनेको थियो। प्रदेश १ को जितमा आलोक मण्डलले ३७ रन तथा रबिन मण्डलले २४ रनको योगदान गरे। लुम्बिनी प्रदेशका आयुष ओलीले ३ विकेट हात पारेपनि टोलीलाई जित दिलाउन भने सकेनन्।
पहिलाे खेलमा प्लेयर अफ दि म्याच प्रदेश १ का आलोक मण्डल घोषित भए।
यस्तै दोस्रो खेलमा मधेश प्रदेशले बलियाे ११ लाई ४६ रनले पराजित गर्दै समूह बि को बिजेताको रुपमा अन्तिम ४ मा स्थान बनाएको छ।
टस हारेर पहिले ब्याटिंगको निम्तो पाएको मधेश प्रदेशले निर्धारित २० ओभरमा ६ विकेट गुमाएर १३१ रन जोडेको थियो। मधेशका लागि राहुलकुमार महतोले सर्वाधिक ६२ रनको योगदान गरे। यस्तै विशाल यादवले व्यक्तिगत २० रन बनाएका थिए।
बलियो ११ को बलिङ्गमा जेनिश पुन मगर र प्रतिक पण्डितले समान २–२ विकेट हात पारे।
जवाफमा १३२ रनको विजयी लक्ष्य लिएर मैदान उत्रिएको बलियो ११ ले १८.५ ओभरमा सबै विकेट गुमाउन अघि ८५ रन मात्र जोड्न सक्यो। उसका ओपनर ईजाज उल हकले अविजित ४० तथा कप्तान स्मिथ बुढाले १५ रन जोड्न बाहेक अन्य ब्याट्सम्यानले दोहोरो अंकमा रन जोड्न सकेनन् ।
बलियो ११ लाई सस्तैमा समेट्ने क्रममा मधेश प्रदेशका साइमन रोए र रोहन शाहले समान २–२ विकेट हात पारे। खेलको प्लेयर अफ दि म्याच राहुलकुमार महतो घोषित भए।
शनिबार हुने पहिलो सेमिफाइनलको खेलमा प्रदेश १ र बागमती प्रदेश तथा दोस्रो सेमिफाइनल खेलमा मधेश प्रदेश र गण्डकी प्रदेश भिड्ने छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
