काठमाडौं- स्पिनर संगिता राईको उत्कृष्ट बलिङ सहयोगमा नेपालले एसीसी महिला टी–२० च्याम्पियनसिप २०२२ मा विजयी सुरुआत गरेको छ। मलेसियामा शुक्रबारदेखि सुरु भएको प्रतियोगितामा नेपालले भुटानलाई ५० रनले हराउँदै विजयी सुरुआत गरेको हो।
जितको लागि ९५ रनको विजयी लक्ष्य पछ्याएको भुटान १७.५ ओभरमा ४४ रनमा अलआउट भयो। भुटानकी छिरिङ जाङ्मोले २८ बलमा सर्वाधिक १६ रन बनाइन्। भुटानका अन्य ब्याटरले भने राम्रो प्रदर्शन गर्न सकेनन्।
भुटानकी एनगावाङ छोडेन ८, सोनाम छोदेन ५, पेमा सोल्डेन ४ रनमा आउट भइन्।
नेपालकी स्पिनर संगिता राईले २.५ ओभरमा ६ रन खर्चेर ४ विकेट लिइन्। कविता कुँवर र सीता रानामगरले २/२ विकेट लिइन्। इन्दु बर्मा र अश्मिना कर्माचार्यको नाममा १/१ विकेट रह्यो।
त्यसअघि मलेसियाको यूएसडी यूकेएम ओभलमा टस जितेर पहिले ब्याटिङ गरेको नेपालले २० ओभरमा ९ विकेट गुमाएर ९५ रन बनाएको थियो।
नेपालका लागि काजल श्रेष्ठले सर्वाधिक २६ रन जोडिन्। उनले ३५ बलमा एक चौका प्रहार गरिन्। यता, कप्तान रुविना क्षेत्रीले २२ बलमा १ चौकासहित २१ रन जोडिन्। इन्दु बर्माले २६ बलमा एक चौकासहित २० रन जोडिन्।
डोली भट्ट ५, सीता मगर ४, ममता चौधरी ३ र विन्दु रावल १ रनमा आउट भइन्। अश्मिना कर्माचार्य र ज्योति पाण्डेले भने खाता खोल्न सकिनन्।
कविता कुँवर १ रनमा अविजित रहिन्। भुटानकी सोनम पाल्डोनले ४ ओभरमा १ मेडनसहित १३ रन खर्चेर ४ विकेट लिइन्।
अन्जु गुरुङ र टासी छेकीले १/१ विकेट लिइन्। समूह बी मा नेपाल, हङकङ, कुवेत, भुटान र बहराइन छन्। समूह ए मा युएई, मलेसिया, ओमान, कतार र सिंगापुर छन्। शीर्ष २/२ टोली सेमिफाइनलमा पुग्नेछन्।
फाइनल पुग्ने दुई टोली एसिया कप महिला टी–२० क्रिकेट प्रतियोगिता खेल्न पाउने छन्। जहाँ भारत, पाकिस्तान, बंगलादेश, श्रीलंका हुनेछन्। अब नेपालले दोस्रो खेल शनिबार कुवेतसँग खेल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772936454.png)
-1772926073.png)
-1764146706.png)
