काठमाडौं– पाकिस्तान र वेस्ट इन्डिजबीचको एकदिवसीय सिरिजमा बाबर आजमको प्रदर्शन निक्कै उत्कृष्ट रह्यो। बाबरले यो सिरिजका दुई खेलमा धेरै कीर्तिमान बनाए।
सिरिजमा उनले कप्तानको रूपमा सबैभन्दा कम खेलमा १७ एकदिवसीय शतक र सबैभन्दा छोटो इनिङ्समा एक हजार रन बनाउने कीर्तिमान पनि बनाए।
बाबरका अलावा ओपनर इमाम–उल–हक पनि उत्कृष्ट लयमा छन्। उनले दुई खेलमा दुई अर्धशतक बनाए। दोस्रो खेलमा इमामले ७२ रन बनाए र बाबरसँग १२० रनको साझेदारी गर्दै आफ्नो टोलीलाई राम्रो स्थितिमा पुर्याए।
यस खेलमा इमाम उत्कृष्ट लयमा देखिएका थिए र उनीसँग शतक बनाउने राम्रो मौका थियो। तर, कप्तान बाबरको गल्तीका कारण उनी रनआउट हुन पुगे। ७२ रन बनाएर पेभिलियन फर्किने क्रममा इमाम निकै क्रोधित देखिन्थे। रनआउट भएपछि ब्याट भुइँमा फ्याँकेर रिसाउँदै उनी पेभिलियन तर्फ लागे।
इमालको उक्त आक्रोशित भिडियो सामाजिक सञ्जालमा भाइरल भइरहेको छ। केही समर्थकले यस रनआउटको लागि बाबरलाई दोष दिइरहेका छन् भने कोहीले इमामको रिसलाई।
पाकिस्तानको इनिङ्सको २८औं ओभरमा वेस्ट इन्डिजका स्पिन बलर अकिल हुसेन बलिङ गर्दै थिए। इमामले मिडविकेटतर्फ आफ्नो बल खेले र रनका लागि दौडिए। अर्को छेउमा उभिएका बाबरले पहिले रन लिने संकेत गरे। तर, पछि भाग्न अस्वीकार गरे।
यस्तो अवस्थामा इमाम अर्को छेउबाट फर्किनु पर्यो। फर्कनुअघि फिल्डरले बल विकेटकिपरलाई दिए र विकेटकिपरले स्टम्पिङ गर्दै इमामलाई रनआउट गरे।
आउट भएपछि इमामले ब्याटले पिचमा प्रहार गरे र रिसाउँदै मैदान छाडे। इमाम आउट भएपछि पाकिस्तानको टोलीले नियमित अन्तरालमा विकेट गुमाउने क्रम जारी राख्यो र २ सय ७५ रन मात्रै बनाउन सक्यो।
यसअघि पाकिस्तानको स्कोर ३ सय नाघेको थियो। इमाम एकदिवसीयमा उत्कृष्ट फर्ममा छन्, पछिल्ला पाँच इनिङ्समा लगातार ५० भन्दा बढी रन बनाएका छन्।
तीन एकदिवसीय सिरिजको पहिलो दुई खेल जितेर पाकिस्तानले यो सिरिज एक खेल अगावै जितेको छ। सिरिजको तेस्रो खेल आइतबार मुल्तानमा हुनेछ।
यसअघि पाकिस्तानले १–० को अग्रता लिएको थियो। दोस्रो एकदिवसीयमा पाकिस्तानले टस जितेर पहिले ब्याटिङ गर्दै २७५ रन बनाएको थियो। जवाफमा वेस्ट इन्डिजको टोलीले १५५ रन मात्र बनाउन सक्यो। खेलमा वेस्ट इन्डिज १२० रनको ठूलो अन्तरले पराजित भयो।
बाबरले ७७ र इमामले ७२ रन बनाए। मोहम्मद नवाजले सर्वाधिक चार विकेट लिए। उनीबाहेक मोहम्मद वासिम जुनियरले तीन र सादाब खानले दुई विकेट लिए। शाहिन अफ्रिदीले एक विकेट लिए।
वेस्ट इन्डिजका लागि मायर्सले ३३ र ब्रूक्सले ४२ रन बनाए। कप्तान पूरनले २५ रन बनाए। बलिङमा अकिल हुसेनले ३, एन्डर फिलिप र अल्जारी जोसेफले २र२ विकेट लिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
