काठमाडौं– पाहुना टोली वेस्ट इन्डिजविरुद्धको तीन ओडीआई सिरिज पाकिस्तानले एक खेल अगावै जितेको छ। शुक्रबार राति भएको खेलमा वेस्ट इन्डिजमाथि १२० रनको विशाल जित हात पार्दै घरेलु टोली पाकिस्तानले एक खेल अगावै सिरिज जितेको हो।
पहिलो खेलमा वेस्ट इन्डिज ५ विकेटले पराजित भएको थियो। तेस्रो तथा अन्तिम ओडीआई खेल आइतबार हुनेछ। जितका लागि २ सय ७६ रनको विजयी लक्ष्य पछ्याएको वेस्ट इन्डिज ३२.२ ओभरमा १ सय ५५ रनमा अलआउट भयो।
वेस्ट इन्डिजका शम्राह ब्रुक्सले सर्वाधिक ४६ रन बनाए। उनले ५६ बलमा ४ चौका र १ छक्का प्रहार गरे। यता, काइल मेयर्सले २५ बलमा ४ चौका र २ छक्कासहित ३३ रन जोडे।
निकोलस पुरन २५ र अकिल हुसैनले १४ रन जोडे। पाकिस्तानका मोहम्मद नवाजले १० ओभरमा १९ रन खर्चेर ४ विकेट लिए। मोहम्मद वासिम जुनियरले ३, सादब खानले २ र शाहिन अफ्रिदीले १ विकेट लिए।
त्यसअघि मुल्तान क्रिकेट स्टेडियममा टस जितेर पहिला ब्याटिङ रोजेको पाकिस्तानले निर्धारित ५० ओभरमा ८ विकेट गुमाउँदै २ सय ७५ रन बनायो। पाकिस्तानका कप्तान बाबर आजमले सर्वाधिक ७७ रन बनाए। उनले ९३ बलमा ५ चौका र १ छक्का प्रहार गरे।
अर्का ओपनर इमाम उल हक ७२ बलमा ६ चौकासहित ७२ रनमा रन आउट भए। हकको ओडीआईमा यो लगातार छैटौं अर्धशतक हो।
मोहम्मद वासिम जुनियर १७ र शाहिन अफ्रिदी १५ रनमा अविजित रहे। सादब र खुशदील शाह २२–२२, ओपनर फखर जमान र मोहम्मद वासिम जुनियर १७ र मोहम्मद रिजवान १५ रनमा आउट भए।
वेस्ट इन्डिजका स्पिनर अकिल हुसैनले १० ओभरमा ५२ रन खर्चेर ३ विकेट लिए। एन्डरसन फिलिप र अल्जारी जोशेफले २–२ विकेट लिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
