काठमाडौं– मुल्तानमा पाकिस्तान र वेस्ट इन्डिजबीचको एकदिवसीय सिरिज अगाडिको तापक्रमलाई लिएर निकै चर्चा चलिरहेको छ। गर्मीबाट बच्न स्थानीय समय अनुसार सबै खेल दिउँसो ४ बजे सुरू हुनेछन्।
तर, गर्मीको चर्चाकाबीच वेस्ट इन्डिजको टोलीले विश्व सुपर लिगका खेल जित्न सक्दो प्रयास गर्नेछ। निकोलस पूरन आफ्नो नियन्त्रणमा नभएका चीजहरूमा ध्यान केन्द्रित गर्न चाहँदैनन्, जस्तै गर्मी। तर, गर्मीलाई ध्यानमा राख्दै किमो पललाई वेस्ट इन्डिजको टोलीले पाकिस्तान बोलाएको छ।
वेस्ट इन्डिजका छनोटकर्ता डेसमन्ड हेन्सले पलले हालैको प्रतियोगितामा ५ खेलमा २० विकेट लिएर आफ्नो फिटनेस प्रमाणित गरेको बताएका छन्। पूरनले गर्मी मौसम भएकाले टोलीमा केही अतिरिक्त खेलाडी राख्नु राम्रो कुरा भएको पनि बताए।
पूरनले भने, ‘हामीले यसअघि नेदरल्यान्ड्ससँग खेलेका थियौं, त्यहाँको मौसम निकै चिसो थियो। तर, पाकिस्तानमा निकै तातो छ। चिसो ठाउँबाट गर्मी ठाउँमा आउन सजिलो छैन। आज हामीले यहाँ पहिलो पटक अभ्यास गरेका छौं। र, मौसम अचम्मको थियो। हामीले ४ बजे अभ्यास गरिरहेका थियौं र त्यतिबेला धेरै हावा चलिरहेको थियो। आशा छ हामी छिट्टै यहाँको अवस्था अनुकूल हुनेछौं।’
पूरन आफ्नो पछिल्लो फर्मलाई लिएर खासै चिन्तित छैनन्। तर, नेदरल्यान्ड्समा उनको प्रदर्शन त्यति राम्रो थिएन। आफ्नो फर्मको बारेमा पूरनले भने, ‘म पूर्णतया ठिक छु। मैले कुनै सिरिजमा राम्रो प्रदर्शन नगरेको यो पहिलो पटक होइन। म नेदरल्यान्ड्समा गरेको प्रदर्शनबाट कत्ति पनि सन्तुष्ट छैन। तर, मैले यसबारे थप सोच्न आवश्यक छैन।’
वेस्ट इन्डिजका लागि पाकिस्तानलाई हराउनु चुनौतीपूर्ण रहेको उनले बताए। तर, उनी आफ्नो टोलीले डराउनुको सट्टा चुनौती स्वीकार गर्नुपर्ने बताउँछन्। पूरन आफ्नो टोलीले यस सिरिजमा सकेसम्म धेरै क्याच समातेर लामो ब्याटिङ गर्ने प्रयास गरोस् भन्ने चाहन्छन्।
‘पाकिस्तानसँग केही विश्वस्तरीय ब्याट्सम्यान र बलरहरू छन्। यद्यपि, हामीले फिल्डिङ गर्दा धेरै क्याचहरू समात्नुपर्छ। साथै हामीले ब्याटिङ गर्दा धेरै रनहरू बनाउनु पर्छ। हामीलाई थाहा छैन परिणाम के हुन्छ,’ पूरनले भने,‘खेल दुई बलमा मात्र परिणत हुन सक्छ। तर, हामीले निरन्तरताका साथ राम्रो गर्ने प्रयास गर्नुपर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
