काठमाडौं– भारतको घरेलु क्रिकेटमा रहेको क्रेज देखेपछि अस्ट्रेलियाकी लेग स्पिनर अलाना किङले पनि महिला इन्डियन प्रिमियर लिग (आईपीएल)को आयोजना गर्नुपर्नेमा समर्थन जनाएकी छन्।
गत महिना पुणेमा भएको महिला टी–२० च्यालेन्ज कपमा किङ उपाधि विजेता टोली सुपरनोभाको महत्त्वपूर्ण सदस्य थिइन्। उनले फाइनलमा भेलोसिटीविरुद्ध तीन विकेट लिएर महत्त्वपूर्ण योगदान दिएकी थिइन्।
किङले आफ्ना आमाबुवा लिरोय र शेरोनको देश (भारत) मा क्रिकेट खेलेको यो पहिलो पटक थियो। उनका आमाबाबु सन् १९८८ मा अस्ट्रेलियामा बसाइँ सरेका थिए र सन् २०१६ यता उनको यो पहिलो भारत भ्रमण थियो।
महिला आईपीएल मार्च २०२३ मा सुरु हुन सक्ने भारतीय सञ्चारमाध्यमहरुले जनाएका छन्। क्रिकेट अस्ट्रेलियाले भविष्यमा सिरिज आयोजना गर्दा यसैलाई ध्यानमा राखेको बुझिएको छ।
‘धेरै महिला क्रिकेटर आईपीएलको लागि उत्सुकतापूर्वक पर्खिरहेका छन्। हामीसँग बिग ब्यास र द हन्ड्रेड लिग छ। तर, आईपीएल भारतका घरेलु खेलाडीहरूका लागि आफ्नो प्रतिभा प्रदर्शन गर्ने ठूलो अवसर हुनेछ,’ किङले ईएसपीएन क्रिकइन्फोसँग भनिन्।
उनले थपिन्, ‘भारतको घरेलु क्रिकेटको असमानता देख्दा डरलाग्दो छ। भारतीय क्रिकेट र विश्व क्रिकेटमा सुधार हुनेछ (महिला आईपीएलबाट) र सबैजना यसका लागि उत्साहित छन्।’
पुणेमा भएको महिला टी–२० च्यालेन्ज कपको फाइनलमा ८ जहार ६२१ दर्शकको अगाडि खेल्नुअघि क्रिकेट मैदानमा यति धेरै कोलाहल कहिल्यै नभएको किङले बताइन्। ‘इमानदारीपूर्वक भन्नुपर्दा यो एक फरक वातावरण थियो। मैले यति भीडको अगाडि कहिल्यै खेलेको थिइनँ। कोलाहलको बीचमा सुन्न पनि गाह्रो थियो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1774336446-1774337130.jpeg)
-1764146706.png)
