काठमाडौं– रोहित पौडेलको शतकमा नेपाली राष्ट्रिय क्रिकेट टोलीले दोस्रो अभ्यास खेलमा ह्युस्टन हरिकेन्सलाई २९ रनले पराजित गरेको छ। नेपालले आईसीसी विश्वकप लिग–२ मा ओमान र अमेरिकासँग खेल्ने त्रिकोणात्मक ओडीआई सिरिजअघि दुई अभ्यास खेल खेलेको हो।
जितका लागि २ सय ५१ रनको विजयी लक्ष्य पछ्याएको हरिकेन्स ४३.३ ओभरमा २ सय २१ अलआउट भयो। हरिकेन्सका निनाद निम्बालकरले सर्वाधिक ९९ रनको योगदान दिए। उनले ८१ बलमा १२ चौका र २ छक्का प्रहार गरे। निनाद सोमपाल कामीको अन्तिम विकेटका रुपमा बोल्ड हुँदै शतक बनाउन एक रनले चुके।
ओपनर एन्ड्रिस गौसले २९ बलमा ६ चौकासहित २८ रन बनाए। रमिज राजा २२ र गौरभ बजाजले १५ रन बनाए। नेपालका लागि सोमपाल कामीले ८.३ ओभरमा ३८ रन खर्चेर ५ विकेट लिए। किशोर महतो र सागर ढकालले २/२ विकेट लिए ।
त्यसअघि प्रेर क्रिकेट भ्यू कम्प्लेक्समा टस हारेर ब्याटिङको निम्तो पाएको नेपाल ४९.१ ओभरमा २ सय ५० रनमा अल आउट भएको थियो । नेपालका रोहितले शतकीय इनिङ्स खेले । उनले ९० बलमा ५ चौका र ४ छक्कासहित सर्वाधिक १ सय १ रनको इनिङ्स खेले।
आरिफ शेख र रोहित पौडेलले पाँचौं विकेटका लागि १ सय ८ रनको महत्त्वपूर्ण शतकीय साझेदारी गरेका थिए। आरिफ ६३ बलमा ३ चौकासहित ४१ रनमा आउट भए। दीपेन्द्रसिंह ऐरीले ३५ बलमा ३ चौका र १ छक्का प्रहार गरे। देव खनाल १९, सुनिल धमाला १३ र सुशन भारी १२ रनमा आउट भए।
हरिकेन्सका मोहम्मद इलियासले १० ओभरमा ६४ रन खर्चेर ५ विकेट लिए। हरमित सिंहले १० ओभरमा १ मेडनसहित २६ रन खर्चेर २ विकेट लिए।
पहिलो अभ्यास खेलमा नेपाल नेपाली अल स्टार्ससँग ४ विकेटले पराजित भएको थियो। नेपालले पहिलो खेल जेठ २६ मा ओमानसँग खेल्दै आईसीसी विश्वकप लिग-२ को सुरुआत गर्नेछ। खेल अमेरिकाको ह्युस्टनस्थित मुसा क्रिकेट स्टेडियमा हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
