काठमाडौं– अमेरिकामा आयोजना हुने आईसीसी पुरुष क्रिकेट विश्वकप लिग–२ अन्तर्गतको त्रिदेशीय एकदिवसीय सिरिज खेल्ने नेपाली राष्ट्रिय क्रिकेट टोलीको बिदाइ गरिएको छ।
नेपाल क्रिकेट संघ (क्यान) ले शनिबार नेपाली टोलीलाई बिदाइ गरेको हो। नेपाली टोली शनिबार नै सिरिजका लागि अमेरिकाको टेक्सस प्रस्थान गर्नेछन्।
नेपाली टोलीलाई युवा तथा खेलकुद मन्त्री महेश्वर गहतराज, क्यानका अध्यक्ष चतुरबहादुर चन्दलगायतले बिदाइ गरे। कार्यक्रममा बोल्दै क्यानका अध्यक्ष चन्दले नेपाल विश्वकप छनोटको अघिल्लो चरणमा प्रवेश गर्नेमा आफू विश्वस्त रहेको बताए।
‘एकदिवसीय मान्यता कायम राख्न यो सिरिज निकै महत्त्वपूर्ण छ। यो सिरिजसँगै नेपाल अघिल्लो चरणमा प्रवेश गर्नेछ भन्ने मैले विश्वास लिएको छु,’ उनले भने।
यस्ता, खेलकुदमन्त्री गहतराजले नेपालले विगतका कमिकमजोरी सुधार्दै राम्रो प्रदर्शन गर्नेमा आफू विश्वस्त रहेको बताए। ‘विगतको कमिकमजोरीलाई सुधार्दै नेपालले उत्कृष्ट प्रदर्शन गर्नेमा आशावादी छु। अहिले यो अवस्थामा एभरेष्ट प्रिमियर लिग (ईपीएल) को विषयमा केही नसम्झियौं,’ उनले भने।
बिदाइ कार्यक्रममा कप्तान सन्दीप लामिछानेले अहिले टिम पनि सन्तुलित रहेको बताउँदै राम्रो खेल प्रदर्शन गर्ने बताए। ‘लिग–२ अब हामीले २४ खेल खेल्न बाँकी छ र अहिले टिम पनि सन्तुलित छ। लिग–२ मा धेरैभन्दा धेरै अंक जोड्दै विश्वकप सम्भावनालाई कायम राख्न चाहन्छौं,’ उनले भने।
यस्तै, नेपाली टिमका मुख्य प्रशिक्षक पुबुदु दासानायकेले पछिल्लो दुई तीन हप्तादेखि निकै कडा मिहेनत गरिरहेको बताउँदै चौथो स्थानमा उक्लिने आफूहरुको लक्ष्य भएको बताए।
‘अमेरिका भ्रमणका लागि हामीले पछिल्लो दुई तीन हप्तादेखि निकै कडा मेहनत गरिरहेका छौं। युवा प्रतिभा र टिम सन्तुलित छ। सिरिजसँगै लिगको चौथो वा पाँचौ स्थानमा उक्लिने हाम्रो लक्ष्य छ,’ उनले भने।
सिरिजमा नेपाल, अमेरिका र ओमानबीच प्रतिस्पर्धा हुनेछ। सिरिजका लागि क्यानले सन्दीप लामिछानेको कप्तानीमा १५ सदस्सीय टोलीको घोषणा गरिसकेको छ।
सिरिजअन्तर्गत नेपालले पहिलो खेलमा ओमानविरुद्ध जुन ९ मा खेल्ने छ। यस्तै, नेपालले दोस्रो खेल अमेरिकाविरुद्ध जुन ११ र तेस्रो खेल फेरि ओमानविरुद्ध जुन १४ मा खेल्ने छ। अन्तिम खेलमा नेपालले अमेरिकाविरुद्ध जुन १५ मा खेल्ने तालिका रहेको छ।
लिग–२ को अंक तालिकामा नेपाल छैटौं स्थानमा रहेको छ। नेपालले १२ खेलमा ६ जित र ६ खेलमा हार व्यहोरेको छ। नेपालले सिरिजअघि दुई अभ्यास खेल खेल्नेछ। क्यानले नेपाली टोलीले अमेरिकामा रहेका पूर्वखेलाडीहरुको क्लब नेपाली अल स्टार्स र ह्युस्टन हरिकेन्ससँग एकदिवसीय अभ्यास खेल खेल्ने जनाएको छ।
नेपालले अल स्टार्ससँग जुन २ र हरिकेन्ससँग जुन ४ मा खेल्ने तालिका रहेको छ।
नेपाली टिम–
सन्दीप लामिछाने, आसिफ शेख, कुशल भुर्तेल, रोहित पौडेल, दिपेन्द्र सिंह ऐरी, आरिफ शेख,विनोद भण्डारी, सुनिल धमला, देव खनाल, आदील अन्सारी, करण केसी, सोमपाल कामी, बिक्रम सोब, किशोर महतो, सागर ढकाल
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1764146706.png)
