काठमाडौं– श्रीलंकाका विकेटकिपर ब्याट्सम्यान कुसल मेन्डिस अस्पतालमा भर्ना भएका छन्। छाती दुखेको गुनासो गरेपछि उनलाई ढाकाको एक अस्पतालमा भर्ना गरिएको हो।
बंगलादेशसँगको खेलमा २३औं ओभरको खेल चलिरहँदा मेन्डिसले असहज महशुस गरेका थिए। त्यसपछि उनी भुइँमा पल्टिए। पहिले मेडिकल स्टाफले उनीसँग कुरा गरे र तुरुन्तै उनी दुवै हातले छाती समातेर मैदानबाट बाहिर निस्किए।
बंगलादेश क्रिकेट बोर्ड (बीसीबी)का डाक्टर मञ्जुर हुसेन चौधरीले थप उपचारका लागि उनलाई अस्पताल लैजानुपर्ने बताए।
चौधरीका अनुसार खेलका क्रममा मेन्डिसलाई डिहाइड्रेसन भएको थियो, जुन उनको समस्याको कारण हुन सक्छ। उनले मेन्डिसलाई ग्यास्ट्राइटिस भएको आशंका पनि गरेका छन्। उनी कहिलेसम्म अस्पतालमा रहने र ढाका टेस्टमा उनको सहभागिता रहने या नरहने भनेबारे अझै स्पष्ट भइसकेको छैन।
चट्टोग्राम टेस्टको पहिलो इनिङ्समा मेन्डिसले उत्कृष्ट खेल खेल्दै अर्धशतक बनाएका थिए। त्यसपछि उनले दोस्रो इनिङ्समा ४८ रनको विस्फोटक ब्याटिङ गरेका थिए, जसले श्रीलंकालाई खेल बराबरीमा ल्याएको थियो।
आद्रताका कारण पहिलो टेस्ट म्याचको अवस्था निकै खराब भएको थियो। तमिम इकबालले तेस्रो दिन निकै असहज महशुस गरेका थिए भने अम्पायर रिचर्ड केटलबरोले पनि चौथो दिन प्रचण्ड गर्मीका कारण मैदान छाड्नुपरेको थियो। टेस्टका क्रममा खेलाडीले पटक–पटक पानी पिउने गरेको देखिन्थ्यो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
