काठमाडौं- नेपाल क्रिकेट संघ (क्यान)ले आफूले आयोजना गर्ने फ्रेन्चाइजी लिगबाहेक अन्यलाई मान्यता नदिने भएको छ।
क्यानका कार्यबहाक सचिव प्रशान्तविक्रम मल्लले कुनै पनि देशमा एउटा मात्रै फ्रेन्चाइज क्रिकेट लिग हुने गरेको बताउँदै आफूहरुले आयोजना गर्ने लिगबाहेक अरुलाई मान्यता नदिने बताएका हुन्।
‘क्यानले गर्ने भनेको नेपाल टी २० लिग मात्रै हो। हामीले आधिकारीक लिग गर्ने तयारीमा छौं। त्योबाहेक अरु टी२० लिगलाई मान्यता नदिने तयारीमा छौं,’ उनले भने।
बिहीबार मात्रै कात्तिक अन्तिम साताबाट आयोजना हुने पाँचौं संस्करणको एभरेष्ट प्रिमियर लिग (ईपीएल) क्रिकेट प्रतियोगिताका लागि क्यानले मान्यता दिएको जोहरा इन्टरनेसनले जनाएको थियो।
तर, यसबारे आफूलाई कुनै जानकारी नभएको कार्यबहाक सचिव मल्लले बताए। ‘ईपीएल आयोजनाका लागि कार्तिक २६ गतेदेखि मंसिर १० गतेसम्मको समय सार्वजनिक भएको भन्ने भर्खरै सुनें। तर,यस विषयमा क्यानलाई कुनै जानकारी छैन,’ उनले भने।
आयोजक जोहरा इन्टरनेसनले बिहीबार प्रेस विज्ञप्ति जारी गर्दै प्रतियोगिता कात्तिक २६ देखि मंसिर १० गतेसम्म हुने जानकारी दिएको छ।
यस मितिलाई क्यानले समेत स्वीकृति दिएको जोहरा जारी गरेको विज्ञप्तिमा उल्लेख छ।
ईपीएलमा काठमाडौं किंग्स ११, ललितपुर प्याट्रिओट्स, पोखरा राइनोज, चितवन टाइगर्स, विराटनगर वारियर्स र भैरहवा ग्लाडियटर्स गरी ६ टोलीको सहभागिता रहने गरेको छ।
यसअघि प्रतियोगिताको पछिल्लो संस्करणको उपाधि चितवन टाइगर्सले जितेको थियो। कीर्तिपुरस्थित त्रिवि क्रिकेट मैदानमा गत २३ असोजमा भएको फाइनलमा चितवनले पोखरा राइनोजलाई चार विकेटले पराजित गर्दै उपाधि जितेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
