काठमाडौं– इन्डियन प्रिमियर लिग (आईपीएल)को यस सिजनको ४९औं खेल बुधबार ४ पटकको उपाधि विजेता चेन्नई सुपर किंग्स र रोयल च्यालेन्जर्स बैंग्लोरबीच हुँदै छ। पुणेको एमसीए स्टेडियममा हुने खेल नेपाली समयअनुसार बेलुका ७:४५ बजेबाट सुरु हुनेछ।
बैंग्लोरले सिजनको सुरुमा लगातार खेल जित्दै आएको थियो। तर, अहिले हार बेहोरिरहेको छ। योसँगै चेन्नईले हारबाट बच्न महेन्द्र सिंह धोनीको हातमा फेरि कमाण्ड सुम्पेको छ। यस्तो अवस्थामा आज रोचक भिडन्त हुने अनुमान गरिएको छ ।
चेन्नईले कप्तान परिवर्तनपछि पुन: लड्ने साहस देखाएको छ। सनराइजर्स हैदरावादजस्तो बलियो बलिङ आक्रमण भएको टोलीलाई १३ रनले हराउँदै चेन्नईले प्लेअफ सम्भावना जीवित्तै राखेको छ। आइतबार भएको खेलमा चेन्नईका ओपनर ऋतुराज गायकवाडले सर्वाधिक ९९ र डेभन कन्वेले ८५ रनको उत्कृष्ट इनिङ्स खेलेका थिए।
आजको खेलमा पनि चेन्नईले आफ्नो शीर्ष क्रमबाट उत्कृष्ट प्रदर्शनको अपेक्षा गर्नेछ। दीपक चाहरको स्थानमा टिममा थपिएका बलर मुकेश चौधरी अन्ततः लयमा आएका छन्। उनले अन्तिम खेलमा ४ विकेट लिएर टोलीको जितमा ठूलो भूमिका खेलेका छन्। महेश ठेक्षानासँग मिलेर उनले फेरि एकपटक म्याच जित्ने बलिङ प्रयास देखाउन सक्छन्।
यता, बैंग्लोरका लागि पावर प्लेमा तीव्र गतिमा रन बनाउन नसक्नु ठूलो समस्या हो। विराट कोहली लयमा फर्किए। शनिबार गुजरात टाइटन्ससँग भएको खेलमा कोहलीले ५३ बलमा ६ चौका र १ छक्कासहित सर्वाधिक ५८ रन बनाएका थिए। यस सिजन खराब लयबाट गुज्रिएका कोहलीले टी२० मा सुस्त शैलीमा अर्धशतक पूरा गरेका थिए।
कोहलीको यसअघिको प्रदर्शन सम्झन लायक थिएन। कोहली सनराइजर्स हैदराबाद र लखनऊ सुपर जायन्ट्सविरुद्ध लगातार गोल्डेन डक हुन पुगेका थिए।
यता, कप्तान फाफ डू प्लेसीको प्रदर्शनमा निरन्तरताको कमी देखिएको छ। उनी गुजरातविरुद्धको खेलमा ४ बल खेल्दै शून्य रनमा आउट भएका थिए। यता, अन्तिममा आएका दिनेश कार्तिकले इनिङ्सलाई टच दिन सकेनन्।
बैंग्लोरसँग ठूला नाम अवश्य छन्। तर, मैदानमा नाम होइन, काम आफैं बोल्छ। १/२ खेल हारे यो टोली प्लेअफको दौडबाट पनि बाहिरिन सक्छ। यस्तो अवस्थामा बैंग्लोर एक भएर मैदानमा आउनुपर्दछ, जहाँ प्रत्येक खेलाडीले टोलीप्रति आफ्नो जिम्मेवारी बुझ्दछन्।
जडेजाको डर
बैंग्लोरको ब्याटिङमा सबैभन्दा ठूलो खतरा हुन् रविन्द्र जडेजा। जडेजाविरुद्ध बैंग्लोरको ब्याटिङ रेकर्ड निकै निराशाजनक रहेको छ। जडेजाले टी२० मा ग्लेन म्याक्सवेललाई ७ पटक आफ्नो शिकार बनाएका छन्। जम्मा १३ इनिङ्समा म्याक्सवेलले जडेजाको ५३ बलमा १३४ को स्ट्राइक रेटमा रन बनाएका छन्।
म्याक्सवेलबाहेक टिमका अर्का बलियो ब्याट्सम्यान कोहलीले यी बायाँ हाते स्पिनर बलरविरुद्ध खेल्न सकेका छैनन्। कोहली १६ इनिङ्समा ३ पटक जडेजाको बलको शिकार भएका छन्। यस अवधिमा उनको स्ट्राइक रेट पनि १०८ मात्र रहेको छ। कोहलीले जडेजाको १२३ बलमा १३३ रन बनाएका थिए।
तर, कोहलीले चेन्नईविरुद्ध आईपीएलमा कुनै एक फ्रेन्चाइजीविरुद्ध सबैभन्दा बढी ९४९ रन (२८ इनिङ्स) बनाएका छन्। उनले चेन्नईविरुद्ध ९ अर्धशतकसहित आफ्नो आईपीएल करिअरको सर्वाधिक अर्धशतक पनि बनाएका छन्।
दिनेश कार्तिक पनि टी२० मा ३ पटक जडेजाको शिकार भएका छन्। जडेजाबाहेक चेन्नईका मिडियम पेस फास्ट बलर ड्वेन ब्राभोले पनि बैंग्लोरका ब्याट्सम्यानलाई खेलमा आछुआछु पार्न सक्छन्।
ब्राभोले टी२० मा म्याक्सवेल र कार्तिकलाई ४/४ पटक प्याभिलियनको बाटो देखाएका छन्। तर, यस अवधिमा दुवै ब्याट्सम्यानले ब्राभोविरुद्ध क्रमशः १६७ (३६ बलमा ६० रन) र १४४ (३४ बलमा ३९ रन)को स्ट्राइक रेटमा रन बनाएका छन्। ब्राभोले कोहली र डु प्लेसिसलाई पनि २/२ पटक आउट गरेका छन्।
पटेलबाट आश
चेन्नईका अधिकांश ब्याट्सम्यानहरू बैंग्लोरका बलरहरूमाथि हावी छन्। तर, अम्बाती रायडुलाई बैंग्लोरका फास्ट बलर हर्षल पटेलविरुद्ध खुलेर खेल्न निक्कै गाह्रो छ। रायुडुले टी२० मा हर्षलको बलमा कुल ५ पटक विकेट गुमाइसकेका छन्। उनले हर्षलबाट ४४ बलमा १२३ को स्ट्राइक रेटमा ८ इनिङ्समा ५४ रन बनाएका छन् ।
रायुडुबाहेक धोनीले पनि हर्षलको बलमा हात खोल्न सकेनन्। टी२० मा धोनी हर्षलको बलमा २ पटक आउट भएका छन्। ७ इनिङ्समा उनले हर्षलको ३१ बलको सामना गर्दै ७७ को स्ट्राइक रेटमा २४ रन बनाएका छन् ।
रोबिन उथप्पाले हर्षलको बलमा १९७ रन बनाएका छन् भने ऋतुराज गायकवाडले २०० रन बनाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
