काठमाडौं– इन्डिय प्रिमियर लिग (आईपीएल)मा आइतबार दुई खेल भए। दुवै खेलमा धेरै चौका र छक्काको वर्षा हुँदा ठूलो स्कोरसमेत बन्यो।
त्यसपछि लक्ष्य पछ्याउने टोलीले पनि राम्रो प्रदर्शन गरे। तर, थोरै रनको अन्तरले परजित भए। दुवै खेलमा पहिले ब्याटिङ गर्ने टोलीले जित हात पारेका थिए।
दिनको पहिलो खेलमा केएल राहुलको नेतृत्वमा रहेको लखनऊ सुपर जायन्ट्सले दिल्ली क्यापिटल्सलाई ७ रनले पराजित गरेको थियो भने दोस्रो खेलमा महेन्द्रसिंह धोनीको नेतृत्वमा रहेको चेन्नई सुपर किंग्सले सनराइजर्स हैदरावादलाई १३ रनले पराजित गर्यो।
यो खेलको एक दिन अघि कप्तानी छोडेका रविन्द्र जडेजाले धोनीलाई फेरि कप्तानी सम्हाल्न आग्रह गरेका थिए, जसलाई उनले स्वीकार गरे।
चेन्नईको टोलीमा रातारात भएको यो परिवर्तनले क्रिकेट जगतमा हलचल मच्चिएको थियो। समर्थक जान्न उत्सुक थिए अचानक के भयो टोलीमा?
खेलपछि यही प्रश्न सोध्दा धोनीले भने, ‘मलाई लाग्छ जडेजालाई गत सिजनमै थाहा थियो यो वर्ष कप्तानी गर्नुपर्छ। मैले पहिलो दुई खेलमा मात्र उनको कप्तानीको सुपरिवेक्षण गरेँ र पछि हस्तक्षेप गरिनँ। त्यसपछि मैले उनलाई आफैँ निर्णय र जिम्मेवारी लिन पनि आग्रह गरेँ।’
उनले थपे, ‘कप्तान बनेपछि धेरै कुराको ख्याल राख्नुपर्छ, जसमध्ये एउटा आफ्नै खेल हो। मलाई लाग्छ कप्तानी जिम्मेवारीले उनको तयारी र प्रदर्शनमा असर परेको छ।’
कप्तानको दबाबबाट मुक्त भएपछि जडेजाले आफ्नो अलराउन्ड फर्मलाई पुन: बलियो बनाउने धोनीले आशा व्यक्त गरे। चेन्नई यस वर्ष फिल्डिङमा धेरै कमजोर देखिएको छ। हैदरावादविरुद्धको खेलमा सिधा हातमा आएका केही सहज क्याचहरू पनि छोडिएका थिए।
धोनीले भने,‘जडेजा कप्तानबाट मुक्त भएका छन् र आफ्नो उत्कृष्ट प्रदर्शन गरिरहेका छन्। हामी यही चाहन्छौँ। हामीले एक उत्कृष्ट फिल्डर पनि गुमाउँदै थियौँ। हामीले अहिलेसम्म १७–१८ क्याचहरू छोडेका छौँ। यो चिन्ताको विषय हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1755350560.jpg)
-1764146706.png)
