काठमाडौं– दिल्ली क्यापिटल्सका कप्तान ऋषभ पन्तले शुक्रबार राजस्थान रोयल्सको खेलमा अन्तिम ओभरमा अम्पायरको निर्णयमा थर्ड अम्पायरले हस्तक्षेप गर्नुपरेको महसुस गरेका छन्।
पन्तका अनुसार नो–बल नदिने निर्णयले दिल्लीलाई गहिरो असर पारेको थियो। जसका कारण दिल्ली राजस्थानसँग १५ रनले पराजित भयो। तर, पन्तको तर्कमा टोलीका सहायक प्रशिक्षक शेन वाट्सन सहमत देखिएनन्। वाट्सनले यो घटनाबाट आफूलाई टाढा राख्दै अम्पायरको निर्णय मान्नुपर्ने बताए।
राजस्थानले दिएको २२३ रनको लक्ष्य पछ्याएको दिल्लीले अन्तिम ओभरसम्म ब्याटिङ गरेको थियो। अन्तिम ओभरमा दिल्लीलाई जितको लागि ३६ रन चाहिएको थियो। जसमा तीव्र गतिका बलर ओबेद म्याककोयको बललाई रोभम्यान पावेलले पहिलो तीन बलमा लगातार तीन छक्का प्रहार गरे।
तेस्रो फुलटस बलमा उनले मिडविकेटमा छक्का प्रहार गरेपछि दिल्लीको आशा जिवितै रह्यो। अम्पायरले छक्का हानेको संकेत गरे, तर दिल्ली नो–बलको संकेत पर्खिरहेको थियो।
नो–बलले दिल्लीलाई अतिरिक्त बल र फ्री हिट प्रदान गर्ने थियो। त्यसपछि पावेलले त्यही कुरा दोहोर्याउन सक्थे, जुन बिहीबार मुम्बई इन्डियन्सविरुद्धको खेलमा महेन्द्रसिंह धोनीले गरेका थिए। तर, अम्पायरले बललाई नो–बल घोषित गरेन, जसका कारण पावेल र कुलदीप यादव मैदानमा रहेका अम्पायर नितिन मेनन र निखिल पटवर्धनसँग विवाद गर्न लागे।
उता, डगआउटमा उपस्थित कप्तान पन्त र टिमका अन्य खेलाडीले पनि पावेल र कुलदीपको समर्थनमा अम्पायरसँग बहस गरेका थिए।
अम्पायरहरू निर्णयमा अडिग रहेको देखेर डगआउटमा उपस्थित कप्तान पन्तले आफ्ना खेलाडीहरूलाई मैदानबाट बाहिर निस्कन भने। तर, राजस्थानका लेग स्पिनर युजवेन्द्र चहलले कुलदीपलाई त्यसो गर्नबाट रोके।
यसैबीच पन्तले दिल्लीका अर्का सहायक प्रशिक्षक प्रवीण अमरेलाई अम्पायरहरूसँग कुरा गर्न पठाए। सोही क्रममा वाट्सन पन्तलाई शान्त गराउँदै थिए। यता, राजस्थानलाई ठूलो लक्ष्यमा पुर्याउने जोस बट्लर पनि पन्तसामू गए। खेल पुन: सुरु भयो, तर दिल्ली विजयबाट १५ रन टाढा थियो। म्याककोयले ब्रेकपछि आफ्नो लाइन सच्याए र ढिलो बलिङ गर्न थाले।
यो सबै नाटकीय घटनाक्रम पछि पन्त आफ्नो बचावमा देखिए। खेल सकिएपछि पन्तले भने, ‘अन्तिम मिनेटमा पावेलले जितको आशा जगाएको थियो। मलाई लागेको थियो यो नो–बल हाम्रो लागि निर्णायक कारक साबित हुनेछ। मलाई लाग्छ कुनै बललाई जाँच्न सकिँदैन। तर, सबै कुरा मेरो हातमा थिएन, म निराश छु, तर यसमा केही गर्न सकिँदैन।’
मैदानमा रहेका अम्पायरले नो–बल घोषणा नगर्ने निर्णयको प्रतिक्रिया दिँदै पन्तले भने, ‘सबैले देखे कि यो नो–बल थियो। मलाई लाग्छ तेस्रो अम्पायरले हस्तक्षेप गरेर नो–बल भएको बताएको हुनुपर्छ।’
तर, प्रवीण अमरेलाई मैदानमा अम्पायरसँग बहस गर्न पठाउने निर्णय गर्दा पन्तले आफ्नो गल्ती स्वीकार गरे। उनले भने, ‘पक्कै पनि यो ठीक थिएन, तर जे भयो त्यो पनि ठिक थिएन। मलाई लाग्छ यो हाम्रो मात्र होइन दुवै पक्षको गल्ती थियो। किनभने हामीले यो प्रतियोगितामा खेलेका छौं। राम्रो अम्पायरिङ देखेका छौं, त्यसैले हामीले धेरै राम्रो गर्न सक्थ्यौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
