काठमाडौं- इन्डियन प्रिमियर लिग (आईपीएल)२०२२ को यो सिजनको ३६औं खेल ब्रेबोर्न स्टेडियममा सनराइजर्स हैदराबाद र रोयल च्यालेन्जर्स बैंग्लोरबीच हुँदैछ।
आईपीएलमा हैदराबादको टोली अहिलेसम्म बैंग्लोरमाथि हाबी भएको छ। तर, यो सिजन दुवै टोली लयमा रहेको देखिन्छ।
बेंग्लोर ७ खेलमा ५ जित र २ हारसहित १० अंकका साथ तेस्रो स्थानमा छ। हैदराबाद ६ खेलमा ४ जित र २ हारसहित ८ अंक भए पनि नेटरनरेटको कारण पाँचौं स्थानमा छ।
यता, राजस्थान रोयल्स ७ खेलमा ५ जित र २ हारसहित १० अंकका साथ शीर्ष स्थानमा छ। गुजरात ६ खेलमा ५ जित र १ हारसहित १० अंकका साथ नेटरनरेटको कारण दोस्रो स्थानमा छ।
आजको खेलमा जित हात पारे हैदराबादको पनि समान १० अंक हुनेछ। यस्तो अवस्थामा हैदराबाद र बैंग्लोरबीच रोचक खेल हुने अपेक्षा गरिएको छ।
भुवनेश्वरको भर
पावरप्लेमा भुवनेश्वर कुमारले एक वा बढी विकेट लिएपछि हैदराबादको जितको ८० प्रतिशत पुग्छ भन्ने तथ्याङ्कले देखाउँछ।
भुवनेश्वरले आईपीएल २०१९ यता पावरप्लेमा १० पटक एक वा बढी विकेट लिएका छन्, जसमा हैदराबादले कुल ८ पटक खेल जितेको छ। अर्कोतर्फ, हैदराबादका ब्याट्सम्यानले आईपीएल २०१९ यता ८ पटक पावरप्लेमा ६० भन्दा बढी रन बनाएका छन्, जसमा हैदराबादले ७ पटक जितेको छ।
यता, बैंग्लोरले आईपीएल २०१९ देखि १२ खेलको पावरप्लेमा दुई वा बढी विकेट लिँदा ११ पटक नतिजा आफ्नो पक्षमा पारेको छ। यता, बलर जोश हेझलउडले आईपीएलको कुनै पनि खेलमा दुई वा सोभन्दा बढी विकेट लिए उनको टोलीले जितेको छ। उनले टी२० मा कुल ६ पटक यस्तो गरेका छन्।
बैंग्लोरका ब्याटरलाई त्रास
बैंग्लोरको टोली जब ब्याटिङ गर्न आउँछ, तब भुवनेश्वर र टी नटराजनका अगाडि ब्याट्सम्यानले होसियारीसाथ ब्याटिङ गर्नुपर्नेछ। टोलीका कप्तान फाफ डु प्लेसिस, विराट कोहली र ग्लेन म्याक्सवेल दुवै बलरविरुद्ध हात खोल्न सक्दैनन्। भुवनेश्वर र नटराजनविरुद्ध यी तीनै ब्याट्सम्यानले १०० को स्ट्राइक रेटमा रन बनाएका छन्।
भुवनेश्वरविरुद्ध कोहलीले १२१ को स्ट्राइक रेटमा ७५ रन (६२ बल) बनाएका छन्, जबकि तीन पटक उनी प्याभिलियनको बाटो लिन बाध्य भएका छन्। कोहलीले नटराजनको १३ बलको सामना गरेका छन्, जसमा उनले १०८ को स्ट्राइक रेटमा १४ रन बनाएका छन् र एक पटक आउट भएका छन्।
यता, फाफ डु प्लेसिसले भुवनेश्वरबाट मात्र ११२ को स्ट्राइक रेटमा ५६ रन (५० बल) बनाएका छन्। उनलाई भुवनेश्वरले पनि आउट गरेका थिए। म्याक्सवेलले भुवनेश्वरको ३१ बलमा ८४ को स्ट्राइक रेटमा २६ रन बनाउन सफल भएका छन् भने भुवनेश्वरले म्याक्सवेललाई पनि दुई पटक प्याभिलियन पठाएका छन्।
म्याक्सवेलले जगदीश सुचितको तीन बलभन्दा बढी खेल्न पाएका छैनन्। सुचितले हालसम्म टी२० आईमा म्याक्सवेललाई जम्मा ५ बल फ्याँकेका छन्, जसमा म्याक्सवेल दुई पटक प्याभिलियन फर्किएका छन्। टी नटराजनले २६ बलमा २७ रन दिएका छन् भने म्याक्सवेलले दुई पटक विकेट गुमाइसकेका छन्।
यद्यपि, म्याक्सवेल यस सिजन राम्रो लयमा छन्। उनले अहिलेसम्म १९३.१० को स्ट्राइक रेटमा ११२ रन बनाएका छन्। गत सिजन उनले हैदराबादविरुद्ध ४० (२५) र ५९ (४१) रन बनाएका थिए। उनी आईपीएल २०२१ मा मध्य ओभरमा सर्वाधिक रन बनाउने खेलाडी थिए। उनले १३ इनिङ्समा १३५.२४ को स्ट्राइक रेटमा ३५३ रन बनाएका थिए।
टी नटराजन र भुवनेश्वरविरुद्ध बैंग्लोरका तीन ठूला ब्याट्सम्यानले हात खोल्न नसके पनि दिनेश कार्तिक ब्याटिङमा आउँदा तस्विर उल्टो हुन्छ। कार्तिकले दुवै बलरविरुद्ध धेरै रन बनाएका छन्। कार्तिकले भुवनेश्वरबाट टी२० मा १३० को स्ट्राइक रेटमा ५७ बलमा ७४ रन बनाएका छन्। जहाँ नटराजनले २० बलमा १७० को स्ट्राइक रेटमा ३४ रन दिएका छन्।
यस आईपीएलमा कार्तिकले उत्कृष्ट इनिङ्स खेल्दै टी२० टोलीमा पुनरागमन गरेका छन्। उनी यो सिजन एक पटक मात्रै आउट भएका छन् र उनले ७ खेलमा २०५.८८ को स्ट्राइक रेटमा २१० रन बनाएका छन्। विशेषगरी फास्ट बलरमा उनले २३८.२३ को स्ट्राइक रेटमा १६२ रन बनाएका छन्।
विलियम्सनलाई डर
सनराइजर्स हैदरावादका कप्तान केन विलियम्सनको बैंग्लोरका अधिकांश बलरहरूविरुद्ध खराब रेकर्ड छ। धेरै बलरहरूले विलियम्सनलाई कम्तिमा एक पटक टी२० आईमा आउट गरेका छन्। म्याक्सवेल र सिराजले विलियम्सनलाई ५/५ टी२० मा २/२पटक प्रहार गरेका छन्।
यता, हर्षल पटेल र जोश हेझलउडले विलियम्सनलाई एक/एक पटक आउट गरेका छन्। यी दुईविरुद्ध विलियम्सनले क्रमशः ७५ र ९२ को स्ट्राइक रेटमा रन बटुलेका छन्।
बेंग्लोरका लागि शुरुवाती केही खेलहरू गुमाएपछि हेझलउडले पछिल्लो दुई जितमा महत्वपूर्ण भूमिका खेलेका छन्। उनको बलिङ फिगर ४/२५ र ३/२८ रहेको छ। उनी २०२२ मा भएको टी२०आई प्रतियोगितामा राम्रो फर्ममा छन्। उनले ६ खेलमा १६ विकेट लिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
