कुनै बेला आफ्नो मिल्ने साथी मुरली विजय र आफ्नै श्रीमतीबाट भारतीय क्रिकेट टिमका पूर्वविकेटकिपर ब्याटर दिनेश कार्तिकले धोका पाएका थिए। जसकारण उनको जीवन नै ‘नर्क’ बनेको थियो। तनावका कारण उनले आत्महत्या गर्ने सोचसमेत बनाएका थिए।
तर, अहिले उनी सम्हालिएका मात्र छैनन्, सशक्त प्रदर्शन गरिरहेका छन्। कार्तिक आईपीएल २०२२ मा उत्कृष्ट लयमा छन्। ३६ वर्षका यी ब्याट्सम्यानको एक्लो प्रयासमा रोयल च्यालेञ्जर्स बैंग्लोरले उम्दा प्रदर्शन गरिरहेको छ। यो उमेरमा अन्य खेलाडीहरू सन्यास लिने सोचमा हुन्छन्, तर उनको प्रदर्शन थप निखारिँदै गएको छ। आज उनी जुन स्थानमा छन्, उनको लागि त्यहाँ पुग्न त्यति सहज थिएन।
सन् २००७–२०११ को बीचमा कार्तिकलाई भारतीय राष्ट्रिय क्रिकेट टोलीमा महेन्द्र सिंह धोनीपछि विकेटकिपर ब्याट्सम्यानको दोस्रो विकल्पको रूपमा लिइन्थ्यो। धोनीले टीमबाट आराम पाएको भए कार्तिक विकेटको पछाडि देखिने थिए। घरेलु क्रिकेटमा उम्दा प्रदर्शन गरेकै कारण उनलाई तमिलनाडु टोलीको कप्तानसमेत बनाइएको थियो। तर, उनको यो सबै उपलब्धिले पनि उनको घाउ पुरिएको थिएन।
कार्तिकले सन् २००७ मा आफ्नो बाल्यकालकी साथी निकिता भान्जारासँग विवाह गरेका थिए। केही वर्षपछि कार्तिकका साथी तथा सहकर्मी मुरली विजयसँग निकिताको ‘अफेयर’ चल्न थाल्यो। उनी मुरलीको बच्चाकी आमा बन्न लागेकी थिइन्। यो कुरा कार्तिकबाहेक तमिलनाडुका सबै खेलाडीलाई थाहा थियो। अचानक एक दिन निकिताले कार्तिकलाई यो सत्य बताइन् र सम्बन्धविच्छेद गर्न दबाब दिन थालिन्।
दुवैको सम्बन्धविच्छेदपछि निकिता र मुरली सँगै बस्न थाले। मुरलीले आईपीएलमा चेन्नई सुपर किंग्सको लागि उत्कृष्ट प्रदर्शन गरिरहेका थिए। उनी भारतीय टीममा समेत छनोट भएका थिए। यता, पारिवारिक रूपमा विचलित भएका कार्तिकको प्रदर्शन भने लगातार खस्किन थालेको थियो। उनी टोलीबाट निकालिए।
खराब फर्मका कारण तमिलनाडु टोलीको कप्तानी पनि खोसेर मुरलीलाई दिइयो। आईपीएलमा पनि उनको ब्याटबाट रन निस्किरहेको थिएन। उनी ‘डिप्रेसन’मा गए। आफ्नो जीवनबाट यति विचलित भए कि आत्महत्या गर्ने सोच बनाउन थालेका थिए।
कार्तिकले प्रशिक्षणसमेत छोडिसकेका थिए। जिम जान छाडे। उनका प्रशिक्षक चिन्तित भएर घर गए। ट्रेनरले कार्तिकलाई देवदास जस्तै दाह्री बढाएर कुनामा बसेको देखे। त्यसपछि, उनलाई आफ्नो प्रशिक्षण पुनः सुरु गर्न जोड दिए। लामो प्रयासपछि ट्रेनर उनलाई सम्झाउन सफल भए। कार्तिकले फेरि जिम ज्वाइन गरे। जिममै कार्तिकको भेट दीपिका पल्लीकल नाम गरेकी अर्की युवतीसँग भयो।
दीपिका र कार्तिक मिल्ने साथी बने। कार्तिकले फेरि नेटमा अभ्यास थाले र घरेलु खेलमा पनि रन बनाउन थाले। उनलाई दीपिकाले पाइलापाइलामा साथ दिइरहेकी थिइन्। उनी फेरि भारतीय राष्ट्रिय टोलीमा छनोट भए। केही दिनपछि उनले दीपिकासँग विवाह गरे। उनी आईपीएलमा कोलकाता नाइट राइडर्सको कप्तान पनि बने।
३४ वर्षको उमेरमा कप्तान हुँदा उनी सन्यास लिएर फ्रेन्चाइजी क्रिकेट मात्र खेल्न चाहन्थे। यसै क्रममा दीपिका गर्भवती भइन् र सन् २०२१ मा जुम्ल्याहा छोरालाई जन्म दिइन्। कार्तिकले खेल्न छोडे। कमेन्ट्री गर्न थाले र यो क्षेत्रमा पनि उनले पूर्ण प्रभुत्व जमाए।
दिनेशको धेरै अगाडिको सपना थियो, चेन्नईको महंगो बस्ती पोएस गार्डेनमा एउटा भव्य घर किन्ने। दीपिकाले यतिबेला दिनेशलाई एउटा सुझाव दिएकी थिइन्– ‘किन हामी दुवै आफ्नो खेलमा एकाग्र नहुने, जसले गर्दा घर किन्न सजिलो होस्।’
दीपिका आफैं स्क्वास खेलाडी हुन्। यी दुवैले आफ्नो खेलमा ध्यान दिए। अहिले यो जोडीले पोएस गार्डेनमा घर बनाइसकेको छ।
आईपीएल २०२२ अघि चेन्नईले कार्तिकलाई आफ्नो टोलीमा लिन चाहेको थियो। अक्सनमा चेन्नईले कार्तिकमाथि लगातार बोली लगाए पनि बैंग्लोरको टोलीले बाजी जित्यो। फ्रेन्चाइजीले उनलाई ५ करोड ५० लाख भारुमा आफ्नो टोलीमा अनुबन्ध गरेको थियो।
उता दीपिकाले स्क्वासमा पनि उत्कृष्ट खेल देखाइन्। दीपिकाले ग्लास्कोमा भएको विश्व च्याम्पियनसिपमा जोसना चिनप्पासँग मिलेर महिला डबल्स र सौरभ घोषालसँग मिलेर मिक्स डबल्सको उपाधि जितिन्।
कार्तिकलाई यसै वर्ष हुने टी२० विश्वकपका लागि भारतीय टिममा स्थान दिने चर्चा चुलिएको छ। उनले आईपीएल २०२२ को सिजनमा सात खेलमा २१० रन बनाइसकेका छन्। बैंग्लोरका यी स्टारको कथा कुनै फिल्मभन्दा कम छैन।
दैनिक भास्करबाट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
