काठमाडौं– इन्डियन प्रिमियर लिग (आईपीएल)को यस सिजन चेन्नई सुपर किंग्स र मुम्बई इन्डियन्स दुवैको सुरुआत खराब रह्यो। अब अर्को हारले दुवै टोलीको अवस्था झन् बिग्रन्छ। यसको मतलब प्लेअफको यात्रा जिवितै राख्न यहाँबाट दुवै टोलीले लगातार खेल जित्नुपर्ने हुन्छ।
यी दुई टोलीले एकअर्काविरुद्ध खेल्दा यो उत्साह उत्कर्षमा पुग्ने गरेको छ। यस कारणले यसलाई एल क्लासिको (द ग्रेटेस्ट म्याच) पनि भनिन्छ। आईपीएलमा दुवै टोलीले राम्रो कीर्तिमान बनाएर यो नाम कमाएका हुन्। चेन्नईले २०१ खेलमा ११८ जितेको छ र ८२ मा हार व्यहोरेको छ। अर्कोतर्फ, मुम्बईले २२३ खेलमा १२७ जितेको छ।
जारी सिजनमा पहिलो चरणका ६ खेल सिकिँदा चार पटकको उपाधि विजेता चेन्नई १ खेलमा जित निकाल्दै अंक तालिकाको ९औं स्थानमा छ। यता, जितविहीन रहेको मुम्बई पुछारमा रहेको छ।
जारी सिजन ब्याटिङ र बलिङ दुवै कमजोर देखिएको चेन्नई कोलकाता नाईट राइडर्ससँग ६, लखनाऊ सुपर जायन्ट्ससँग ६, सनराइजर्स हैदराबादसँग ८ र गुजरात टाइटन्ससँग ३ विकेटले पराजित हुँदा रोयल च्यालेन्जर्स बैंग्लोरसँग २३ रनको जित निकालेको थियो।
यता, पाँच पटकको उपाधि विजेता मुम्बईको पनि यस सिजन यात्रा सुखद् रहन सकेन। मुम्बई पहिलो खेलमै दिल्ली क्यापिटल्ससँग ४ विकेटले पराजित भएको थियो। यस्तै, दोस्रो खेलमा राजस्थान रोयल्ससँग २३ रनले पाराजित भएको मुम्बई चौथो खेलमा कोलकातासँग ५ र पाँचौ खेलमा बैंग्लोरसँग ७ विकेटको नमिठो हार ब्यहोरेको थियो।
छैटौं खेलमा भने पञ्जबसँग जितिसकेको खेल अन्तिम समयमा ब्याटरको गल्तिले १२ रनले हार्न पुगेको थियो।
यस आईपीएलमा दुवै टोली समान स्तरमा छन्। दुवै टोलीको ब्याट र बल चलेका छैन। यसका साथै बलरले खराब इकोनोमी पनि हारको प्रमुख कारण हो। चेन्नईले ९ को इकोनोमीमा र मुम्बईले ९.६ को इकोनोमीमा रन दिएका छन्। योसँगै दुवैको नाम १८० रनभन्दा बढी खर्च गर्ने टोलीमा पनि परेको छ। ६ खेलमा दुवैले तीन–तीन पटक १८० भन्दा बढी रन दिएका छन् ।
रोहितको खराब प्रदर्शन
रोहित शर्माको खराब प्रदर्शन पनि मुम्बईले यो सिजन राम्रो प्रदर्शन नगर्नुको एउटा कारण हो। अहिलेसम्म ६ इनिङ्समा उनले एक पटक मात्र (दिल्ली क्यापिटल्सविरुद्धको पहिलो खेलमा) ३० भन्दा बढी रन बनाएका छन्। यी ६ इनिङ्समा उनले क्रमशः ४१, १०, ३, २६, २८, ६ रन बनाएका छन् ।
यो पहिलो सिजन होइन, पछिल्ला केही सिजनमा रोहितले ३० को औसतमा पनि रन बनाएका छैनन्। उनले २०१७ मा २३.८, २०१८ मा २३.८, २०१९ मा २८.९, २०२० मा २७.७ र २०२१ मा २९.३ को औसतमा रन बनाएका छन्।
ऋतुराजको पुनरागमन
पाँच इनिङ्समा खराब प्रदर्शन गरेपछि अन्ततः ऋतुराज गायकवाड फर्ममा फर्किएका छन्। उनले गुजरात टाइटन्सविरुद्ध ७३ रन बनाए। २६ खेलमा ऋतुराजले ओपनिङ गरेका छन्, जसमध्ये १२ पटक ३० भन्दा कम स्कोरमा आउट भएका छन्।
ऋतुराजले नयाँ बलमा हरेक पटक ३० भन्दा बढी रन बनाएका छन्। १४ पटक पावरप्लेमा नटआउट रहेका ऋतुराज ९ पटक ५० भन्दा बढी रन बनाउन सफल भएका छन्।
उनले अन्तिम पटक २०२१ मा मुम्बईविरुद्ध खेल्दा ५८ बलमा ८८ रन बनाएका थिए। यस सिजनमा पनि मुम्बईविरुद्धको ओपनरको ६४.३३ को औसत र १४१.९६ को स्ट्राइक रेट रहेको छ, जसले उनलाई यो खेलमा कप्तानको उत्कृष्ट रोजाइ बनाएको छ।
जोर्डनको खराब लय
चेन्नईका लागि क्रिस जोर्डनको यो सिजन राम्रो हुन सकेको छैन। उनले चार खेलमा दुई विकेट मात्रै लिएका छन्। एक खेलमा ५.८ को इकोनोमीलाई छोडेर जोर्डनले ११.३, १०.०,र १५. १ को इकोनोमीमा रन दिएका छन्। जोर्डनले एक खेलमा ३.५ ओभरमा ५८ रन दिए र एक विकेट पनि लिन सकेन। जुन आईपीएल २०२२ को दोस्रो सबैभन्दा खराब बलिङ फिगर हो। यस्तो अवस्थामा चेन्नईले ड्वेन प्रिटोरियसलाई मौका दिनुपर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
