काठमाडौं– मुम्बई इन्डियन्सले इन्डियन प्रिमियर लिग (आईपीएल) २०२२ मा लगातार छैटौं हार बेहोरेको छ। पाँच पटकको च्याम्पियन मुम्बई शुक्रबार लखनऊ सुपर जायन्ट्ससँग १८ रनले पराजित भएपछि आफ्नो इतिहासकै खराब सुरुआत गरेको हो।
जितका लागि २ सय रनको विशाल विजयी लक्ष्य पछ्याएको मुम्बईले निर्धारित २० ओभरमा ९ विकेट गुमाउँदै १ सय ८१ रनमा समेटियो। मुम्बईका सूर्यकुमार यादवले सर्वाधिक ३७ रन बनाए। उनले २७ बलमा ३ चौका प्रहार गरे।
युवा ब्याटर डेवाल्ड ब्रेभिसले १३ बलमा ६ चौका र १ छक्कासहित ३१ रनमा आउट भए। यता, तिलक बर्मा २६, काइरन पोलार्ड २५, जयदेव उनादकट १४ र ओपनर ईशान किशन १३ रनमा आउट भए।
मुम्बईका अन्य ब्याटरले भने दोहोरो अंकमा रन बटुल्न सकेनन्। फबिएन एलेन ८, कप्तान ररोहित शर्मा ६ र मुरुगन आश्विन ६ रनमा आउट भए।
आवेश खानले सर्वाधिक ३ विकेट लिए। उनले ४ ओभरमा ३० रन खर्चे। दुश्मन्था चामिरा, मार्कस स्टोइनिस, रवि विश्रोई र जेसन होल्डरले १/१ विकेट लिए।
त्यसअघि ब्रेबोन स्टेडियम मुम्बईमा टस हारेर ब्याटिङ थालेको लखनऊले निर्धारित २० ओभरमा ४ विकेट गुमाउँदै १ सय ९९ रन बनाएको थियो। लखनऊका कप्तान लोकेश राहुलले सर्वाधिक १ सय ३ रनको अविजित शतकीय इनिङ्स खेले। उनले ६० बलमा ९ चौका र ५ छक्का प्रहार गरे। राहुलको यो आईपीएल करिअरको यो तेस्रो शतक हो।
मनिष पाण्डेले २९ बलमा ६ चौकासहित ३८ रन बनाए। ओपनर क्विन्टन ड कक २४ रनमा आउट भए। दीपक हुडा १५ र मार्कस स्टोइनिस १० रनमा आउट भए। मुम्बईका जयदेव उनादकटले सर्वाधिक २ विकेट लिए। मुरुगन आश्विन र फबिएन एलेनले १(१ विकेट लिए।
मुम्बई सुरुआती ६ खेलमा हारका साथ पुछारमा छ। मुम्बईले आईपीएल इतिहासमा पहिलो पटक सुरुआती ६ खेल गुमाएको हो। यसअघि मुम्बईले २०१४ मा सुरुआती पाँच खेल लगातार गुमाएको थियो।
मुम्बईले रोयल च्यालेन्जर्स बेंगलोर र दिल्ली क्यापिटल्ससँग खराब कीर्तिमानीमा पनि बराबर गरेको छ। दिल्लीले सन् २०१३ मा आफ्नो पहिलो चरणको ६ खेल नै पराजय भोग्यो। त्यस्तै, बेंगलोर २०१९ मा पहिलो चरणका ६ खेल मध्य कुनै पनि जित्न सकेन।
लखनऊको यो चौथो जित हो। जितसँगै लखनऊ ८ अंकका साथ दोस्रो स्थानमा उक्लिएको छ। मुम्बईले बिहीबार चेन्नई सुपरकिंग्ससँग खेल्नेछ। लखनऊले मंगलबार रोयल च्यालेन्जर्स बेंगलोरसँग खेल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
